قازاقستاننىڭ حالىق ءارتىسى تۇڭعىشباي جامانقۇلوۆتىڭ باسىنا قيىن كۇن تۋدى. ەسىمى ەل اۋزىنان تۇسپەيتىن ول مۇنداي «تانىمال» ەشۋاقىتتا بولعان ەمەس. تۇڭعىشبايدىڭ ونەر-تالانتىن مويىنداعان جاميعات ونى جاماندىققا ەش قيمايدى. «Facebook» الەۋمەتتىك جەلىسىندەگى وقىرماندار جامانقۇلوۆقا اراشا تۇسۋدە. ءبىرى قولداۋىن ولەڭ ارقىلى جەتكىزسە، ءبىرى ەلباسىنا ءسوز ۇندەۋ تاستادى. qamshy.kz سايتى ءوز كەزەگىندە حالىقتىڭ تالاپ-تىلەگىن نازارلارىڭىزعا ۇسىنادى.

بۇلبۇل بەيبىتوۆا – تۇڭعىشباي اعاما

مەن نە ىستەيىن؟ تۇڭىرەنگەن كەشتەيمىن،
دەپ جاتىر ما قىرانىمدى كەشپەيمىن.
سەنىڭ نارداي قازاق سىيعان كەۋدەڭدە،

قويمادى عوي قويمادى عوي كەشپەي مۇڭ.

قالاي عانا قارالاۋعا ءدات باردى،
قايتەم ەندى قازاقتاعى جاتتاردى.
ولار ءوزىن قازاقپىن دەپ جۇرگەنمەن،
شىن جاناشىر ەرلەرىمدى داتتادى.

ساقتا ءتاڭىر جالعان جالا ايىپتان،
مىناۋ دالا جالعاندىقتان جالىققان
سەنىڭ ءۇنىڭ جۇرەكتەردى پىشاقتاپ،
تۇلا بويىن تىنىشتىقتان ايىققان.

ەستىدى مە قازاق سەنىڭ زارىندى،
ۇلى دالام ۇلىلارعا تابىندى.
كوزدەرىنەن كورگەندەي بوپ شىندىقتى،
تابا المادىم قويارعا جەر جانىمدى.

شۋاق بولىپ جىلىتار ادام جانىن،
مەيىر توگىپ، سەرگىتەر ساناڭدا مۇڭ.
قۇبىلمالى جانداردىڭ قىلىعىنا،
قايران قالىپ، ويلانىپ، الاڭدادىم!

ادالدىقتان قاشاندا جانادى رەڭ،
ادامدىقتى جوعالتساڭ قالادى نەڭ؟!
ۇعۋ جاقسى ەگىلگەن جۇرەكتەردى،
كوڭىل ەمەس، جۇرەكتىڭ جانارىمەن!

مەن نە دەيىن، سوكپەڭدەرشى نارىمدى،
تەاتردا قالعان جالعىز بارىمدى.
ە، ءتاڭىرىم، قولدا ءوزىڭ، قورعاپ ال،
قازاعىما بىتكەن ۇلى دارىندى.

«قۇرمەتتى ەلباسى! 
مەن ءساندى اقىلاي جەتى بالانىڭ اناسىمىن. ءسىزدىڭ الدىڭىزعا باسپانا سۇراپ بارماي-اق قويايىنشى. ءوز كەزەگىم كەلگەندە الارمىن. مەن مىنا ۆيدەونى كورىپ جىلاپ وتىرمىن. تاياقتىڭ ەكى ۇشى بار!؟ تۇڭعىشباي اعانى دا تىڭداڭىزشى. ەگەر مەنى يت قاپسا، قولىم، جۇرەگىم، باسىم، ءبارى اۋىرادى. ال ونەردىڭ مىنا حالگە ءتۇسۋى ماعان دا تاياق بوپ ءتيدى. سەبەبى مەن ولەڭ جازامىن. مەن ءسۇيىپ تىڭداعان اندەردى، كورگەن كينولارىمدى، كوركەم سوزدەردى ونەر ارقىلى تۇڭعىشباي اعام جەتكىزىپ تالاي سۇيسىنگەن ەدىم. قازاق ونەرىنە، ءوزىمنىڭ قازاق بولعانىما قاتتى قۋاناتىن سەزىمدەر تۋعىزعان ونەر ادامى ەدى. تۇڭعىشباي اعانىڭ مەن جەرلەسى دە، تانىسى دا ەمەسپىن. ارىستانبەك اعانى دا جەك كورىپ وتىرعام جوق. مەن ارىستانبەك اعا باسقارعان ءبىلىم سالاسىندا جۇمىس جاساپ وتباسىمدى اسىراپ وتىرمىن. ونەر سالاسىنان دا الشاق ەمەسپىن، سەبەبى ولەڭدى ەسىم كىرگەلى سەرىك ەتىپ كەلەمىن. ارىستانبەك اعا تۇڭعىشباي اعاسىمەن تۇسىنىسۋگە كەلىپ نۇكتە قويىلسا ەكەن. ءسىز شەشەسىز وسى جاعدايدى. سۇرىنبەيتىن تۇياق بولماس دەپ اتالار ايتقان ەدى. مەن الىس اۋىلدا جاتىرمىن. قاراپايىم ۇستاز انامىن. ساياساتقا ەش قاتىسىم جوق. ادام رەتىندە جۇرەگىم اۋىرىپ، اقىن رەتىندە تولعانىپ تەبىرەنىپ وتىرمىن. قازاققا وسى تىنىشتىق جاقپاي وتىر ما؟ نەگە جاقسىلىقتى ويلامايمىز؟ ەلىمىز امان جۇرت تىنىش بولسا ەكەن!

مەن اقىن انا، ۇستاز ءساندى اقىلاي»

سايات ابەنوۆ – تۇلعاعا تۇساۋ

اڭىز ادام، تاۋداي تۇلعا – تۇڭعىشباي،

قورىپ جۇرگەن  ءوز قازاعىن قىزعىشتاي.

جەسە جەسىن، اساسا دا جاراسار،

كىم جەمەي ءجۇر وسى كۇندە كىم قۇسپاي؟!

تاپقان ەكەن، تاققان ەكەن ايىپتى،

ءىسى قانداي ايىبىنا لايىقتى؟

كورەگەندەر كورمەي قالىپ كەمەنى،

كورگەن ەكەن شەتتە جۇزگەن قايىقتى.

جالا جاۋىپ، جاعىپ وتىر كۇيەسىن،

تەاتردىڭ تۇسىنبەيتىن كيەسىن.

جۇرت سۇيەدى، ەگەردە جۇرت قالاسا،

حاننىڭ ءوزى سويار جالعىز تۇيەسىن.

الاش قايدا ءوز ۇلىنا قارايتىن،

كسرو-نىڭ سىزى بىزدە بار ايقىن.

«جەرىم» دەگەن ەرلەرىڭدى قانايتىن،

«ەلىم» دەگەن ەرلەرىڭدى قامايتىن.

ءبىز وتىرمىز نە بولار دەپ الاڭداپ،

جاعىمپازدار جار سالىپ ءجۇر جامانداپ.

ارىستاردىڭ كۇيىن كەشتى... اقتالار،

ارىستاننىڭ اۋزىنان امان قاپ.

اقتىڭ ءوزىن قارا قىلىپ قويعان شىن،

قۋ ساياسات قۋلىق تابار ويدان سۇم.

«تۇڭعىشبايلار» ۇستالاتىن كۇن جەتسە،

ءبىزدىڭ «تۇڭعىش پرەزيدەنت تە» ويلانسىن!

راشيد جاقسىلىقوۆ – اشىق xات

اسا قۇرمەتتى نۇرسۇلتان ءابىش ۇلى!
ءسىز الىستا، ءىس-ساپاردا جۇرگەن كەزىڭىزدە مازاڭىزدى الىپ وتىرمىن. بۇل xاتتى جازۋعا سەبەپ بولىپ تۇرعان جاعداي – ول سوڭعى كەزدە ەلىمىزدىڭ ىشىندە قىزۋ تالقىدا جۇرگەن مادەنيەت ءمينيسترى ا. مۇxامەدي ۇلى مەن xالىق ءارتىسى ت. جامانقۇلوۆتىڭ اراسىنداعى تۇسىنىسپەۋشىلىك. ەل الدىندا ءوتىپ جاتقان اعا مەن ءىنىنىڭ بىتپەس داۋى كوڭىلىمىزگە قاياۋ ءتۇسىرىپ ءجۇر. كەلەر ۇرپاققا اۋىز بىرلىگىمىزدى مۇرا قىلىپ قالدىرساق دەپ ارماندايمىز، ءبىراق وكىنىشكە وراي ءىنىنىڭ اعاسىنىڭ جاعاسىنا جابىسقان تاربيەنى كورۋگە ءماجبۇر بولىپ وتىرمىز!
قۇرمەتتى نۇرسۇلتان ءابىش ۇلى، اعامىزعا اراشا كورسەتۋىڭىزدى سۇرايمىز!

قۇلاق سالساڭ، ەلباسى، 
ويلايمىز-اۋ جامان جوق. 
ءبىرىن-بىرى داتتاعان،
اقىلدى بولعان ادام كوپ.

وزا شاپقان پەندەگە، 
قاقپان بولعان قادام كوپ. 
سۇمپايى جانە سۇرىقسىز، 
بارا جاتىر زامان بوپ.

وسەر ەلدىڭ بالاسى ءبىرىن-بىرى قولدايدى. 
بىرىنە-بىرى جاۋ بولسا،
ەلىڭ ءۇشىن سول قايعى. 
ماڭدايعا بىتكەن تۇڭعىشباي، 
جاسىتىپ الساق جىگەرىن، 
وكپەنىڭ ورنى تولمايدى.

تۇڭعىشبايداي ۇلىڭا، 
اراشا سۇراپ حالقىڭ تۇر.
قازاقتاي ۇلى حالقىڭا،
ونەرمەن بولعان التىن قۇل. 
ۇزبەيدى حالىق كۇدەرىن.

جاسىتۋعا جول بەرمە، 
دارىنىڭنىڭ جىگەرىن. 
اراشا بولشى اراشا، 
سىزدەن سونى تىلەدىم.