الماتى وبلىسى ۇزىناعاش كەنتىنىڭ ماڭىندا ولتىرىلگەن ءۇش ازاماتتىڭ ءىسى بويىنشا سوت باستالدى، - دەپ حابارلايدى Qamshy.kz.
بۇگىن سوتتىڭ الدىن الا سوت ءماجىلىسى ءوتتى. وندا سوت تەرگەۋىن باستاۋ جونىندە ايىپتاۋشى، ايىپتالۋشى تاراپتاردىڭ، قورعاۋشىلاردىڭ پىكىرلەرى تىڭدالدى. العاشقى سوت وتىرىسى 17 قاراشا كۇنى وتەتىن بولىپ بەلگىلەندى.
«سول وتىرىستا كۋالاردان، ايىپتالۋشىلاردان جاۋاپ الىنا باستايدى. سونداي-اق، بۇگىنگى وتىرىستا پروكۋرور ايىپتاۋ اكتىسىن وقىپ، كۇدىكتىلەردىڭ ءومىر دەرەكتەرىن ناقتىلادى»، - دەيدى جابىرلەنۋشى تاراپتىڭ قورعاۋشىسى مۇحتاريما كاربانوۆا.
ايۋاندىقپەن ولتىرىلگەن ءۇش ازاماتتىڭ تۋىستارى بولسا، سوتقا دەيىنگى تەرگەۋ امالدارىنا كوڭىلىمىز تولمايدى دەپ وتىر.
«بۇگىنگى وتىرىستا ءۇش كۇدىكتىنى دە كوردىك. ولاردىڭ بىرەۋى قىلمىستى كورە تۇرا، زاڭ ورىندارىنا مالىمدەمەگەنى ءۇشىن ايىپتالىپ وتىر. ول قولحاتپەن بوستاندىقتا ءجۇر. تەرگەۋ كەزىندە قاماۋعا الىنباعان. قىلمىس جاسالعان قارۋ ج. سۇلەيمەنوۆ دەگەن كىسىنىكى ەكەن. ول بويىنشا بولەك سوت بولادى دەيدى. مالدى كۇدىكتىلەردەن د. سۇلەيمەنوۆ دەگەن تۋىسى ساتىپ العان. بۇل جەردە دە باسى اشىلماعان جايتتار كوپ»، - دەيدى قازا تاپقان ءۇش جىگىتتىڭ تۋىسى ەركىن بەيسەكەي ۇلى.
مارقۇمداردىڭ تۋىسى تۇرسىن ءامىرباي ۇلى دا قىلمىسقا قاتىستى كۇدىك كوپ ەكەنىن ايتادى.
«باۋىرلارىمىزدى اتىپ ولتىرگەن قارۋ، ول كىمنىڭ قارۋى، قىلمىس جاسالعاننان سوڭ قايدا جاسىرىلدى، كىم جاسىردى، نەگە دەر كەزىندە پوليسياعا حابار بەرىلمەدى، ءۇش ازاماتتى ىزدەستىرۋ شارالارى نەگە باياۋ ءجۇردى، پوليسيانىڭ مارقۇمداردىڭ تۋىستارى مەن دوستارى شۋلاعاننان كەيىن بارىپ قانا قوزعالعانى، دەرەۋ ەكى كۇدىكتىنى ۇستاپ العانى قالاي دەگەن سياقتى سۇراقتار كوپ. تەرگەۋ بارىسىندا بۇل سۇراقتارعا جاۋاپ الا المادىق. ەندىگى ءۇمىتىمىز سوتتا. سۋديا ادىلدىك جاساپ، ءىستى زەرتتەيدى، كەم-كەتىك جەرلەرىن ايتىپ، قىلمىسكەرلەردىڭ ءادىل جازاسىن بەرەدى دەپ سەنەمىز»، - دەيدى ول.
قازا بولعان ءۇش جىگىتتىڭ ءبىرى مۇقيات زارلىحان ۇلىنىڭ اعاسى ادال زارلىحان وسى قىلمىسقا قاتىسى بار دەگەن ءۇشىنشى كۇدىكتى باقىت ەسىمدى ازاماتتىڭ بۇرىن دا سوتتالعانىن ەستىگەنىن، ازىرگە ونى قاماۋعا الماي، قولحاتپەن بوستاندىققا جىبەرگەنىنە نارازى.
ەستەرىڭىزگە سالساق، قىركۇيەك ايىندا الماتى وبلىسى جامبىل اۋدانىنا وبلىستىڭ كوكسۋ اۋدانىنان مال ساتۋعا كەلگەن ءۇش ازامات – مۇقيات زارلىحان ۇلى، قادىلبەك ءالىمحان ۇلى مەن جارقىنبەك دولدان ۇلى حابارسىز كەتىپ، ارتىنان ۇشەۋىنىڭ دە ايۋاندىقپەن ولتىرىلگەنى حابارلانعان بولاتىن. باستاپقىدا وسى قىلمىسقا قاتىسى بار دەگەن كۇدىكپەن ەكى ازامات قاماۋعا الىنسا، كەيىن جامبىل اۋدانىنىڭ تاعى ءبىر تۇرعىنىنا قىلمىس تۋرالى بىلە تۇرا ءتيىستى ورگاندارعا حابارلامادى دەگەن ايىپ تاعىلعان بولاتىن.
ەرلان تولەۋباي
