دەپۋتاتتار استاناعا ەلباسىنىڭ ەسىمىن بەرۋدى ۇسىندى دەگەن اقپارات پورتالىمىزدا شىققان بولاتىن. اقپارات تارالىسىمەن ەلوردا اتاۋىنىڭ وزگەرۋىنە بايلانىستى جان-جاقتان ءارتۇرلى وي-پىكىر ايتىلا باستادى. قامشى پورتالى ەل الدىندا جۇرگەن ازاماتتاردىڭ اتالمىش ماسەلە توڭىرەگىندە بىلدىرگەن كوزقاراستارىن وقىرمان نازارىنا ۇسىنىپ وتىر.

ق ر پارلامەنت ءماجىلىسىنىڭ دەپۋتاتى بەكبولات تىلەۋحان:

«جالپى بۇل ءبىرىنشى رەت ۇسىنىلىپ وتىرعان جوق. وسى ماسەلەنى كەزىندە پارلامەنت دەپۋتاتى ءسات توقپاقبايەۆتىڭ (اۆتور - 2008 جىلى ەلباسىنىڭ اتىمەن اتاۋدى ۇسىنعان) تاراپىنان كوتەرىلگەن بولاتىن. شيرەك عاسىرلىق مەرەكەنىڭ قارساڭىندا بۇل باستامانى جەكە ءوز باسىم قولدايمىن. نەگە دەسەڭىز، بۇل تاريحتا بار جاعداي. مەملەكەتتى قۇرعان ادامنىڭ ەسىمىمەن قالانى اتاۋ تاجىريبەسى بار. ماسەلەن، ۆاشينگتون قالاسى بارشاعا ءمالىم. نۇرسۇلتان اتىنداعى قالانىڭ بولعانى تاۋەلسىزدىكتىڭ سيمۆولى ىسپەتتەس. تاۋەلسىز قازاقستان مەن نازاربايەۆتىڭ اتى سينونيمدەر سياقتى. مەنى جاعىندى نەمەسە باسقا دەپ تۇسىنسەڭىزدەر، وزدەرىڭىز بىلىڭىزدەر، ءبىراق تاريحي كوزقاراسپەن جانە ەگەمەندى ەلدىڭ ازاماتى رەتىندە، مۇنى وتە ءبىر ءادىل ۇسىنىس دەپ ويلايمىن»، - دەدى دەپۋتات.

بۇدان بۇرىن حابارلانعانداي، بۇگىن ق ر پارلامەنتى پالاتالارىنىڭ بىرلەسكەن وتىرىسىندا «تاۋەلسىزدىكتىڭ 25 جىلدىعى قازاقستان جەتىستىكتەرىنىڭ دەكلاراسياسى» قابىلدانىپ، وندا ەلباسىنىڭ ەسىمىن ەلوردانىڭ جانە ەلىمىزدىڭ باسقا دا نىساندارىندا كورسەتۋ ۇسىنىلعان ەدى. 

اقىن-جۋرناليست جۇماش كوكبورى:

«ماڭگىلىك» دەپۋتات ق. سۇلتانوۆتىڭ مەملەكەت باسشىسىنىڭ ەسىمىن  استاناعا بەرۋ تۋرالى ۇسىنىسىن، ونى قولداي كەتكەن كوساريەۆتىڭ بۇل قادامدارىن - جەكە باسقا تابىنۋشىلىق دەپ باعالاۋ كەرەك!

بىرىنشىدەن، ن. نازاربايەۆتىڭ كوزى تىرىسىندە ول ادامعا استانا اتىن بەرۋ – بارىپ تۇرعان جاعىمپازدىقتىڭ جارقىن ءبىر كورىنىسى دەپ تۇسىنگەن ءجون. بولماسا، بۇل ادامدار ۇلت كوشباسشىسىنان قۇتىلا الماي ءجۇر مە دەگەن دە ويعا قالادى ەكەنسىڭ... ادام ەسىمىن تاريحتا قالدىرۋ ءۇشىن، ول پەندە بۇل ومىردە بولماۋى كەرەك!..

بۇكىل الەم الدىندا كۇلكىگە قالمايىق دەسەك، بۇل ەسەرسوق ۇسىنىستارعا توسقاۋىل قويۋ كەرەك! جانە دە انا سۇلتانوۆ، كوساريەۆ، ت.ب. كىم ەدى، سول جاعىمپازداردى جازالاماي، جاعداي تۇزەلمەيتىن سياقتى.

1986 جىلعى ايگىلى جەلتوقسان قاسىرەتى وتە سالا  ورتالىق كوميتەتتەگى ءبىر پلەنۋمدا وسى قۋانىش سۇلتانوۆتىڭ كوبيننىڭ الدىندا: «مەن جەتىم ەدىم...» دەپ بوتاداي بوزداعانىن، كەشە ءوزىن ادام ەتكەن د. قوناۆتى ادام دەمەگەنىن ءبىز ۇمىتقامىز جوق.

كەشە كولبينگە جاعىمپازدانسا، بۇگىن نۇراعاڭا جاعىمپازداناتىنداي، بۇل پەندەنىڭ باسىنا نە كۇن تۋدى ەكەن؟..

بۇل پەندە ءوزىنىڭ وسى ءبىر وسپادار مىنەزى ارقىلى ءبىزدىڭ سۇيىكتى مەملەكەت باسشىسىن بۇكىل الەم الدىندا كۇلكىگە قالدىرايىن دەپ وتىرعانى انىق...

كوساريەۆكە «بار بير»، ونىڭ ەرتەڭ باراتىن جەرى، ەلى، مەملەكەتى بار. ال، ق.سۇلتانوۆ قايدا بارادى؟..

مىناداي جاعىمپازدارعا ەرىپ، كۇلكىگە قالمايىق، اعايىن؟..