كەشە №2 اتىراۋ قالالىق سوتىندا قوعام بەلسەندىلەرى ماكس بوقايەۆ پەن تالعات ايانوۆ سوڭعى سوزدەرىن ايتتى. تاراپتار جارىسسوزىنەن كەيىن سوتتالۋشىلاردىڭ سوڭعى ءسوزىن تىڭداعان سۋديا گ.داۋلەشوۆا ۇكىم شىعارۋ ءۇشىن كەڭەسۋ بولمەسىنە كەتتى.

 «جەر كودەكسى تۇبەگەيلى وزگەرتىلسىن. تالعات ەكەۋمىزدىڭ ايتارىمىز بار، بۇل ءبىزدىڭ سوڭعى ءسوزىمىز ەمەس. قازاقستاننىڭ دامۋىنا ءوز ۇلەسىمىزدى قوسا الاتىنىمىزعا سەنىمدىمىن. ەلىمىزدىڭ گۇلدەنۋىنە بارلىق مۇمكىنشىلىكتەردىڭ بار ەكەنىنە سەنەمىن»، - دەدى م.بوقايەۆ سوڭعى سوزىندە.

ال تالعات ايانوۆتىڭ ءسوزى ادەتتەگىدەي قىسقا دا نۇسقا بولدى. ول سوڭعى سوزىندە ءوزىنىڭ كىنالى ەمەستىگىن ايتتى.

ءوز كەزەگىندە، سۋديا گ.داۋلەشوۆا ەكى ايعا جۋىق ۋاقىتقا سوزىلعان باستى سوت پروسەسىن قورىتىپ، ۇكىم شىعارۋ ءۇشىن كەڭەسۋ بولمەسىنە كەتتى.

ەسكە سالا كەتسەك، كەشەگى سوتتا تاراپتار ءجارىسسوزى ءوتىپ، ونىڭ بارىسىندا مەملەكەتتىك ايىپتاۋشى مارات حابيبۋللين سوتتان م.بوقايەۆ پەن ت.ايانوۆتى 8 جىلعا باس بوستاندىعىنان ايىرۋدى سۇرادى. پروكۋرور سوت پروسەسى بارىسىندا سوتتالۋشىلاردان، كوپتەگەن كۋاگەرلەر مەن ساراپشىلاردان جاۋاپ الىنعانىن، ءىس بويىنشا بارلىق دالەلدەر مەن ماتەريالداردىڭ، زاتتاي ايعاقتاردىڭ زەرتتەلىپ، وتىنىشتەردىڭ قارالعانىن ايتتى. ول بوقايەۆ پەن ايانوۆقا تاعىلعان ايىپتاردىڭ تولىق دالەلدەنگەنىن جەتكىزدى. سوتتالۋشىلارعا ق ر قىلمىستىق كودەكسىنىڭ ءۇش بابى: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ىس-ارەكەتتەر جاساۋ، ازاماتتاردىڭ ۇلتتىق نامىسى مەن ءقادىر قاسيەتىنە ءتىل تيگىزۋ؛ 274 باپتىڭ 4 تارماعى، ياعني، قوعامدىق ءتارتىپتى بۇزۋعا ءقاۋىپ توندىرەتىن كوپە-كورىنەۋ جالعان اقپارات تاراتۋ؛ 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ بويىنشا ايىپتار تاعىلىپ وتىر.