6 قىركۇيەكتە قازاقستان رەسپۋبليكاسى يندۋستريا جانە دامۋ مينيسترلىگى عيماراتىندا مينيستر جەڭىس قاسىمبەك پەن ەۋرازيا باسەكەلەستىك باعدارلاماسىنىڭ ديرەكتورى انتونيو سوممامەن كەزدەسۋى بولىپ ءوتتى. ايتا كەتەرلىگى، ەكونوميكالىق ىنتىماقتاستىق جانە دامۋ ۇيىمى مينيسترلىكتىڭ ءبىرقاتار سالالارى بويىنشا ارىپتەسى بولىپ تابىلادى، ال قازىرگى تاڭدا ەىدۇ-نىڭ بيزنەس كليماتتى جاقسارتۋ بويىنشا كوپتەگەن كەپىلدەمەلەرى قولدانىستاعى جانە ازىرلەنىپ جاتقان زاڭنامالاردا ورىن تاپقان.

قازىرگى تاڭدا، مينيسترلىك ءبىرقاتار سالالارعا قاتىستى «قازاقستاننىڭ ينۆەستيسيالىق كليماتىنا ەكىنشى شولۋ»، «قازاقستاننىڭ تاۋ-كەن ونەركاسىبى باسەكەلەستىگىن ارتتىرۋ»، «قازاقستاننىڭ سالالىق باسەكەلەستىگىن ارتتىرۋ ستراتەگياسى» سياقتى جوبالاردى ىسكە اسىرۋدا. اتالعان جوبالاردىڭ ءساتتى ىسكە اسىرىلۋى ەىدۇ-عا مۇشە مەملەكەتتەردىڭ جوعارى ستاندارتتارىنا وتۋگە جول بەرەدى.

كەزدەسۋ بارىسىندا ەىدۇ وكىلدەرى مينيسترلىكتىڭ ينۆەستيسيالار كوميتەتى، قۇرىش كوميتەتى جانە يندۋستريا، يننوۆاسيالار جانە كاسىپكەرلىك كوميتەتى سياقتى ەىدۇ-ڭ سالالىق ورگاندارىنا مۇشەلىك ەتۋ ماقساتىندا قازاقستاننىڭ اتقارىپ وتىرعان جۇمىستارىن جوعارى باعالادى جانە قويىلعان ماقساتتارعا قول جەتكىزۋگە جان-جاقتى جاردەم كورسەتۋدى ۇسىندى.

كەزدەسۋ قورىتىندىلارى بويىنشا، ج. قاسىمبەك باسەكەلەستىكتى ارتتىرۋ ماسەلەلەرىنە جاۋاپتى ەىدۇ مەملەكەتتەرى دامۋ مينيسترلەرىنىڭ باسىن قوساتىن بيىل قاراشا ايىندا پاريج قالاسىندا وتەتىن «ەۋرازيا اپتاسى» اتتى جىل سايىنعى ماڭىزدى ءىس-شاراعا قاتىسۋعا شاقىرىلدى.