جاپونيادا وساكا قالاسىنا جاقىن تسۋ دەگەن جەردە 20-27 تامىز ارالىعىندا وتكەن IESO– 2016 جەر تۋرالى حالىقارالىق عىلىمي وليمپياداسىندا جاس گەولوگتاردىڭ قازاقستاندىق كومانداسى جۇلدەلى ورىندارعا يە بولدى.    

وليمپياداعا قازاقستاننىڭ وكىلدەرى رەتىندە 4 قاتىسۋشى باردى. استانا قالاسى №4 گيمنازيا-مەكتەبىنىڭ 10-سىنىپ وقۋشىسى جاعىپاروۆا ءاليا جەكە سىناقتا قولا مەدالىن جەڭىپ الدى، سونداي-اق حالىقارالىق كوماندا قۇرامىندا جەر تۋرالى عىلىمدار جونىندەگى جوبادا (Earth Science Project)  ءبىرىنشى ورىنعا يە بولدى.  

نازاربايەۆ زياتكەرلىك مەكتەبىنىڭ 10-سىنىپ وقۋشىسى بايمۋرزينا ءاديا ITFI (حالىقارالىق كوماندالىق دالالىق زەرتتەۋ) كوماندالىق سايىستا ءبىرىنشى ورىنعا يە بولدى.

نازاربايەۆ زياتكەرلىك مەكتەبىنىڭ 10-سىنىپ وقۋشىلارى ايمۋحامبەتوۆا ءازيزا مەن تولەگەنوۆا ارۋجان ارۋجان دا بارلىق سايىستارعا بەلسەندى قاتىسىپ، ەلىمىزدى لايىقتى دەڭگەيدە تانىتا الدى.  

«جاس گەولوگ» كورپوراتيۆتىك قورىنىڭ ديرەكتورى جانات يسمايلوۆانىڭ ايتۋىنشا، قازاقستاندىق كوماندانىڭ ۇلتتىق كوستيۋممەن ونەر كورسەتۋى وليمپيادانىڭ جابىلۋ سالتاناتىنا  ارنالعان گالا-كونسەرتكە ەرەكشە كورىك بەردى. سونىمەن قاتار، وليمپيادا اياسىندا قاتىسۋشىلار مەن قوناقتارعا ەكسپو 2017 كورمەسىنە شاقىرۋ رەتىندە ءبىزدىڭ قوناقجاي ەلىمىز تۋرالى بەينەروليك كورسەتىلدى.  

جەر تۋرالى حالىقارالىق عىلىمي وليمپيادا (IESO – International Earth Science Olympiad) – گەولوگيا، مەتەورولوگيا، مۇحيتتانۋ جانە استرونوميا پاندەرى بويىنشا ورتا مەكتەپ وقۋشىلارى اراسىندا وتكىزىلەتىن جىل سايىنعى سايىس. وليمپيادا مەكتەپتەردە جەر تۋرالى عىلىمداردى وقىتۋدى جەتىلدىرۋگە سەبەپ بولادى. ەڭ باستىسى، IESO وليمپياداسى ءار ءتۇرلى ەلدەردىڭ جاس عالىمدارى اراسىنداعى دوستىق قارىم-قاتىناستى دامىتادى، سونداي-اق جەر تۋرالى عىلىمدار بويىنشا يدەيالارمەن جانە ماتەريالدارمەن الماسۋ سالاسىنداعى حالىقارالىق ىنتىماقتاستىقتى  دامىتۋعا ىقپال ەتەدى. 

بارلىق قاتىسۋشىلار استانا قالاسىنداعى «جاس گەولوگ» ۇيىرمەسىنىڭ مۇشەلەرى، سونداي-اق 2016 جىلعى جاس گەولوگتاردىڭ IV  قازاقستاندىق اشىق دالا وليمپياداسىنا قاتىسۋشىلار بولىپ تابىلادى. 2016 جىلى حالىقارالىق وليمپياداعا الەمنىڭ 33 ەلىنەن 132 كوماندا قاتىستى.