بۇگىن استانادا قازاقستان مەن رەسەي ىنتىماقتاستىعىنىڭ ءوڭىرارالىق XIII فورۋمى اياسىندا «ەۋرازيالىق كەڭىستىكتەگى كولىك-لوگيستيكالىق الەۋەتتى دامىتۋ» تاقىرىبىندا ەكى ەلدىڭ رەسمي تۇلعالارىنىڭ جانە ىسكەرلىك ورتالارىنىڭ قاتىسۋىمەن قازاقستاندىق-رەسەيلىك بيزنەس-فورۋم وتۋدە.

ءىس-شاراعا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ، رەسەي فەدەراسياسىنىڭ پرەزيدەنتى ۆلاديمير پۋتين قاتىسادى. سوداي-اق، 1300-دەن استام مەملەكەتتىك ورگانداردان، كۆازيمەملەكەتتىك جانە قازاقستان مەن رەسەيدىڭ ءىرى جەكە كومپانيالاردان وكىلدەر قاتىسۋدا.

قازىرگى ۋاقىتتا قازاقستاندا رەسەيلىكتەردىڭ  قاتىسۋىمەن 6453 كومپانيا ءساتتى جۇمىس ىستەپ جاتىر. ولاردىڭ قاتارىندا ەكونوميكا، مۇناي مەن گاز ءوندىرۋ، وڭدەۋ ونەركاسىبى، كولىك، بايلانىس، ماشينا جاساۋ، عارىشتىق سالاداعى ىنتىماقتاستىق، اتوم ەنەرگياسىن بەيبىت ماقساتتا پايدالانۋ سياقتى سالالار بار.

رەسەي مەن قازاقستاننىڭ ءوڭىرارالىق ىنتىماقتاستىق فورۋمدارى 2003 جىلدان باستاپ وتكىزىلۋدە. الدىڭعى فورۋم 2015 جىلى سوچي قالاسىندا «اگروونەركاسىپتىك كەشەن سالاسىنداعى ىنتىماقتاستىق جانە ازىق-تۇلىك قاۋىپسىزدىگىن قامتاماسىز ەتۋ» تاقىرىبىندا وتكەن بولاتىن.

رەسەي ءداستۇر بويىنشا قازاقستاننىڭ ەڭ ءىرى ساۋدا ارىپتەسى بولىپ تابىلادى. قازاقستان مەن رەسەي اراسىنداعى تاۋار اينالىمى 2015 جىلدىڭ قورىتىندىسى بويىنشا 14،57 ملرد. اقش دوللارىن قۇرادى، ونىڭ ىشىندە ەكسپورت – 4،34 ملرد. اقش دوللارى، يمپورت – 10،23 ملرد. اقش دوللارى.