پروسەدۋرالاردى اۆتوماتتاندىرۋ ماقساتىندا ق ر ينۆەستيسيالار جانە دامۋ مينيسترلىگى گەولوگيا جانە جەر قويناۋىن پايدالانۋ بويىنشا ينتەراكتيۆتى كارتانى ىسكە قوستى. وندا قازاقستاننىڭ بۇكىل اۋماعىنىڭ گەولوگيالىق كارتالارى ورنالاستىرىلعان. ەندى قولدانىستاعى جانە جوسپارلانىپ وتىرعان كەلىسىم-شارت اۋماقتارى بويىنشا اقپارات الۋعا بولادى. اتالمىش ينتەراكتيۆتى كارتا جەتىلدىرىلەتىن بولادى. ياعني، جەر قويناۋىن پايدالانۋ قۇقىعىن بەرۋ مەن ونلاين رەجيمدە باقىلاۋ جۇرگىزۋ جوسپارلانعان.

سونىمەن قاتار، جەر قويناۋىن پايدالانۋ قۇقىعىن بەرۋدىڭ جەڭىلدەتىلگەن جاڭا تاسىلدەرى (اۆستراليالىق تاجىريبە) ەنگىزىلىپ وتىر. اقمولا وبلىسى ستەپنوگورسك قالاسىنىڭ ماڭايىنداعى تولىق زەرتتەلمەگەن ۋچاسكەلەردە وسى تاسىلدەر پايدالانىلىپ، جۋىردا بەكىتىلگەن 17 كەلىسىم بويىنشا قولدانىلا باستادى. جىل سوڭىنا دەيىن شىعىس قازاقستان وبلىسىنداعى تولىق زەرتتەلمەگەن ۋچاسكەلەردە جۇمىستار باستالىپ، ارى قاراي بۇل جۇمىس رەسپۋبليكانىڭ بارلىق اۋماعىن قامتىماق. 

مينيسترلىك حالىقارالىق CRIRSCO كوميتەتىنىڭ قۇرامىنا كىرۋ بويىنشا جۇمىستار جۇرگىزىپ، الەمدىك قاۋىمداستىققا قوعامدىق ەسەپتىلىك ستاندارتتارىنا ارنالعان گەولوگيالىق بارلاۋ جۇمىستارىنىڭ ناتيجەسى بويىنشا مينەرالدىق رەسۋرستار مەن قورلار جايىندا تانىستىرۋ جۇمىستارىن اتقاردى. 

سونداي-اق، بارلىق جۇرگىزىلگەن رەفورمالاردىڭ شەشۋشى كەزەڭى رەتىندە «جەر قويناۋى جانە جەر قويناۋىن پايدالانۋ تۋرالى» ق ر كودەكسى جوباسىن دامىتۋ بولماق. بۇل رەتتە ۆەدومستۆو، كودەكستىڭ جەر قويناۋىن پايدالانۋ سالاسىنداعى الەمدىك ستاندارتقا ساي كەلەتىن ۇزدىك «سەرپىندى» زاڭنامالىق اكت بولۋىن قالايدى.

جوعارىدا اتالعان جاڭالىقتار گەولوگيالىق بارلاۋ بويىنشا ينۆەستيسيالىق تارتىمدىلىقتى ارتتىرادى جانە شاعىن كومپانيالاردىڭ دامۋىنا ىقپال ەتەدى. سونىمەن قاتار، سالاعا قوسىمشا ينۆەستيسيا تارتۋعا سەپتىگى تيەتىن بولادى.