«ومىرگە وپتيميستىك تۇرعىدان قارايتىن ايەلدەردىڭ ءقاۋىپتى اۋرۋلارعا شالدىعۋى از كەزدەسەدى»  دەپ حابارلايدى گارۆارد ينستيتۋنىڭ زەرتتەۋشىلەرى.
 

عالىمدار 70 مىڭ ايەلدىڭ دەنساۋلىعىن باقىلاي وتىرىپ، وپتيميستتەر قاتەرلى ىسىككە، جۇرەك تالماسىنا ءجيى ۇشىرامايتىنىن انىقتادى.

ەكسپەرتتەر زەرتتەۋ ناتيجەسىندە 70 مىڭ قاتىسۋشى سالاۋاتتى ءومىر سالتىن ۇستاناتىن ايەلدەر بولعانىمەن، ءپوزيتيۆتى پسيحولوگيالىق ويلاۋ جۇيەسى ادام ومىرىندە ماڭىزدى ءرول وينايدى دەگەن پىكىردە.

ونىڭ ۇستىنە وپتيميزمگە ۇيرەنۋگە بولادى.

American Journal of Epidemiology-دا جاريالانعان ماقالانىڭ اۆتورلارى: «ەگەر ادامداردى بولاشاققا جاقسى ۇمىتپەن قاراۋىنا ۇگىتتەيتىن بولساق، جالپى قوعامداعى ادامداردىڭ دەنساۋلىعىنا وڭ اسەرىن تيگىزەتىن ەدى»، – دەگەن بايلامعا كەلگەن.

زەرتتەۋشىلەر زەينەتكە شىققان جانە ءالى دە جۇمىس جاسايتىن امەريكالىق مەدبيكەلەردىڭ دەنساۋلىعىن زەرتتەدى.

مەدبيكەلەردەن ءوزىنىڭ وپتيميزمدىك بالىن 0-دەن 24-كە دەيىنگى شكالا بويىنشا بەلگىلەپ شىعۋىن ءوتىندى.

58 بەن 83 جاستاعى بارلىق قاتىسۋشىلاردىڭ دەنساۋلىق جاعدايلارى جاقسى بولعانىمەن، زەرتتەۋشىلەر سەگىز جىل بويى اۋرۋعا بايلانىستى قايتىس بولعانداردىڭ بارلىعىن تىركەدى. وسى ۋاقىت ىشىندە 4566 ەكسپەريمەنت قاتىسۋشىسى قايتىس بولىپ كەتكەن ەكەن.

ءوپتيميزمنىڭ جوعارعى كورسەتكىشىن كورسەتكەندەر وتباسى جاعدايى، الەۋمەتتىك شىعۋ تەگى، ديابەتپەن اۋرۋى، حولەستەرين مەن دەپرەسسيانىڭ جوعارعى دەڭگەيىنە قاراماستان ولىمگە از دۋشار بولعان.

زەرتتەۋشىلەر، سونداي-اق، جاقسى ويلاۋ ءبىلۋ – تەك قانا ساۋ پسيحيكا ءۇشىن ەمەس، ادامنىڭ دەنەسىنە دە بيولوگيالىق اسەرى بار دەپ تۇجىرىمداپ وتىر.

جاتتىعۋ

گارۆارد ينستيتۋنىڭ دوكتورى ەريك كيم وپتيميزم دەڭگەيىن كوتەرۋدىڭ بىرنەشە ءتاسىلىن كورسەتتى:

• ءارتۇرلى ومىرلىك سيتۋاسيالاردا، وتباسىڭىزدا نەمەسە جۇمىستا «ءوزىڭىزدىڭ ەڭ قۋانىشتى ءساتىڭىزدى» ەلەستەتىڭىز. ەگەر جاقسى جۇمىس جاساساڭىز جانە جاقسى ناتيجەلەرگە جەتسەڭىز، ءوزىڭىزدى قالاي سەزىنەتىڭىز جايلى ويلاڭىز.
• كۇن سايىن قاعازعا ومىرىڭىزدە العىس ايتاتىن ءۇش نارسەنى جازىڭىز. وسىنى اپتا بويى قايتالاپ جۇرسەڭىز، كوڭىل-كۇيىڭىزدىڭ جاقسى جاققا قاراي وزگەرگەنىن بايقايسىز.
• ەكى اپتا بويى باسقا ادامدارعا جاقسىلىق جاساپ، جازىپ ءجۇرىڭىز.

كيم دوكتوردىڭ ەگىزدەرگە جۇرگىزگەن زەرتتەۋى بويىنشا وپتيميزمنىڭ 25%-ى عانا گەنكە بايلانىستى، قالعان 75%-ى ءوزىڭىزدىڭ قولىڭىزدا.

اۋدارعان شايحى مارال