الەمنىڭ ميلليوننان اسا باعدارلاما جاساۋشىسىن بىرىكتىرەتىن HackerRank پلاتفورماسى ۋنيۆەرسيتەتتەردىڭ كودتاۋ بويىنشا مامانداندىرىلعان باعدارلاما جاساۋشىلارىن دايىنداۋداعى دەڭگەيىن انىقتاپ، جوعارى وقۋ ورىندارىنىڭ رەيتينگىن جاسادى. تىزىمدە الماتىلىق قازاق-تۇرىك ليسەيى دە بار، - دەپ حابارلايدى Tengrinews.kz ءتىلشىسى.

ءتىزىم قولدانۋشىلاردىڭ بەرىلگەن تاپسىرمالاردى قالاي شەشكەنىنە بايلانىستى جاسالدى. رەيتينگكە الەمنىڭ 126 ۋنيۆەرسيتەتى مەن كوللەدجدەردىڭ 5،5 مىڭنان اسا ستۋدەنتى قاتىستى. ءاربىر تاپسىرما ءۇشىن ءار ۋنيۆەرسيتەتتە بەلگىلى ءبىر ۇپاي قوسىلىپ وتىرعان.

وسىلايشا HackerRank نۇسقاسى بويىنشا، رەيتينگتىڭ 1-ورنىندا سانكت-پەتەربۋرگ اقپاراتتىق تەحنولوگيالار، مەحانيكا جانە وپتيكا ۇلتتىق زەرتتەۋ ۋنيۆەرسيتەتى تۇر. ال ەكىنشى بولىپ قىتايداعى Sun Yat-sen Memorial Middle School تۇرسا، 3-ورىنعا ۆەتنامداعى Ho Chi Minh City University of Science ۋنيۆەرسيتەتى تۇراقتادى. ال الماتىداعى قازاق-تۇرىك ليسەي بولسا، رەيتينگتىڭ 21-ورنىندا تۇر.