ماڭعىستاۋ وبلىسىنىڭ بەينەۋ اۋدانىنداعى ج.كالدىعارايەۆ اتىنداعى ورتا مەكتەپتە 8ء-شى سىنىپ وقۋشىسى عالىمجان كۇزەمبايەۆقا «ورتتە كورسەتكەن قايسارلىعى ءۇشىن» اتتى مەدالى سالتاناتتى جاعدايدا تابىس ەتىلدى دەپ حابارلايدى www.inform.kz. مەكتەپ وقۋشىسى ءورت تۇتانعان ۇيدە قالىپ قويعان كورشىسىنىڭ بالالارىن امان الىپ قالعان. «2016 جىلدىڭ 7 قاراشاسى كۇنى جەرگىلىكتى ساعات 11-50 مينۋتتار شاماسىندا بەينەۋ اۋىلىنداعى تۇرعىن ۇيدە ءورت ورىن العاندىعى جونىندە حابار كەلىپ ءتۇستى. وقيعا ورنىنا ماڭعىستاۋ وبلىستىق توتەنشە جاعدايلار دەپارتامەنتىنىڭ «ءورت ءسوندىرۋ جانە اپاتتان قۇتقارۋ جۇمىستارى قىزمەتىنىڭ» №6 ءورت ءسوندىرۋ ءبولىمىنىڭ بريگاداسى اتتاندى. ءورت تۇتانعان كەزدە ءۇي ىشىندە 2010، 2011، 2012 جىلدارى تۋعان بالالار قالىپ قويعان. ولارمەن كورشى تۇراتىن وقۋشى، بالالاردىڭ ورتەنگەن ءۇيدىڭ تەرەزەسىنەن شىعۋىنا كومەكتەسىپ، ولاردى امان الىپ قالدى. وقيعا ورنىنا كەلگەن ماماندار ءورتتىڭ ورىن الۋىنا جاتىن بولمەدەگى ۇيدە پايدالانىلاتىن تەحنيكالىق قۇرىلعىلاردىڭ سەبەپ بولعاندىعىن انىقتادى»،-دەپ حابارلادى ماڭعىستاۋ وبلىستىق توتەنشە جاعدايلار دەپارتامەنتىنىڭ باسپا ءسوز حاتشىسى گۇلنار قوجابەكوۆا. عالىمجانعا سونداي-اق قۇتقارۋشىلاردان العىس حات پەن باعالى سىيلىق تابىس ەتىلدى. «ق ر ازاماتىنا لايىقتى ارەكەت، ال، وسى ارەكەتكە باسقا ەمەس مەكتەپ وقۋشىسىنىڭ بارۋى ءبىزدىڭ ەلىمىزدە پاتريوتيزمگە باعىتتالعان ۇراندارمەن ەمەس، ءوز ءىسىن ناقتى ارەكەتىمەن كورسەتە الاتىن ۇرپاقتىڭ ءوسىپ كەلە جاتقاندىعىنىڭ بەلگىسى. عالىمجان - ناعىز ۇلگى بولارلىق ازامات!»،-دەدى ماڭعىستاۋ وبلىستىق توتەنشە جاعدايلار دەپارتامەنتىنىڭ باسشىسى قۋانار بازاربايەۆ. وسى كۇنى ماڭعىستاۋ وبلىستىق توتەنشە جاعدايلار دەپارتامەنتى تاراپىنان تاۋەلسىزدىكتىڭ 25 جىلدىعىنا وراي «مەكتەپ وقۋشىسى» دەگەن اتاۋمەن ۇيىمداستىرىلعان سۋرەتتەر بايقاۋىنىڭ جەڭىمپازدارى دا ماراتاپاتتالدى.