كورسەتكەن كومەگى كوزبوياۋشىلىق بوپ شىققان! الماتىدا كەزىندە ۇيلەرىن سۋ شايىپ كەتكەن شاڭىراق ىقشاماۋدانىنىڭ تۇرعىندارى احمەتجان ەسىموۆكە وكپەلى دەپ حابارلايدى www.ktk.kz. ول شاھار باسشىسى بولعاندا تاسقىننان زارداپ شەككەن جۇرتقا جاپپاي جەڭىلدىكپەن باسپانا سالدىرتىپ، ال جەرىن كومەك رەتىندە بەرگىزگەن ەكەن. ءبىراق ارادا جەتى جىل وتكەندە، ول تەلىمدەر تەگىن بولماي شىعىپ، كەزىندە قالا اكىمىمەن بىرگە قونىس تويىن تويلاعان جۇرت ەندى دالادا قالايىن دەپ تۇر.                                

سۋ تاسقىنىنىڭ سوڭى قونىس تويىنا ۇلاسىپ، ال كىلتىن سول كەزدەگى قالا اكىمى احمەتجان ەسىموۆتىڭ ءوزى تابىستاعان. ەندى ارادا 7 جىل وتكەندە قايتادان شىرىلداپ قالدى. ويتكەنى كەزىندە مەملەكەت ەسەبىنەن جاردەم رەتىندە ءۇي سالىپ بەرگەن شەنەۋنىكتەر ونى جەكەشەلەندىرۋگە كەلگەندە تاعى اقشا سۇراپتى. 

نۇرلىحان مالدىبەكوۆ:

-ۇكىمەتتەن ساتىپ الۋلارىڭ كەرەك دەيدى. ال ۇكىمەت  بىزگە تەگىن بەردى عوي جەردى.  270 مىڭ كەلىسىمدە جوق. ول اقشانى ءبىز نەلىكتەن تولەۋىمىز كەرەك.  بارلىقتارىندا دا كرەديتى  بار مويىندارىندا. 7 جىل بويى وزدەرى ارەڭ تولەپ كەلگەندە، ەندى كەلىپ تاعى دا 270 مىڭ تەڭگەنى قايدان تولەيدى ول؟

دينا نۇسىپبەكوۆا ءۇيىنىڭ اقىسىن بىلتىر تولەگەن. ءبىراق اكىمدىكتەگىلەر وعان ناق وسى 270 مىڭ تەڭگەنى تاۋىپ بەرە الماعانى ءۇشىن پاتەرىن جەكەشەلەندىرمەي قويىپتى.    

دينا نۇسىپبەكوۆا:

-سۋ تاسقىنىنان زارداپ شەككەندەرگە بەرىلگەن باسپانانىڭ ءوزى بار-جوعى ءبىر جارىم بولمە. 24 شارشى مەتر. ءبىراق سونىڭ ءوزى 7 جىلعا جالعا بەرگەندەر ءبىر جانۇيادا ءتىپتى 7ء-ى بالا بولسا دا، سول ءبىر جارىم بولمەگە جارتى بولمە قوسۋعا دا رۇقسات ەتپەپتى.

جۇرت بۇل شارتىن دا ورىنداعان. ءبىراق، شەنەۋنىكتەر ۋادەسىندە تۇرمادى. ويتكەنى ەسىموۆ كەزىندە تەگىن دەپ ۇلەستىرگەن جەرلەر 7 جىل وتكەندە ۋاقىتشا قولدانا تۇرۋعا بەرىلگەن بوپ شىقتى.   

الەكساندر رومانچيكوۆ، الماتى قالاسى اكىمدىگى كۇردەلى قۇرىلىس كاسىپورنى ج ش س زاڭگەرى:

-جەر دە، ءۇي دە تەگىن بەرىلگەن جوق. تەك قولدانا تۇرۋعا عانا بەرىلدى. جەكەگە بەرىلسە تەك ءۇي بەرىلەدى. زاڭعا سايكەس تۇرعىندار جەردى جەكەگە الۋ ءۇشىن ساتىپ الۋى قاجەت.

وسىلايشا، كەزىندە ءۇيىن سۋ شايعان شاڭىراقتىقتارعا بۇل جولى دا شاڭىراق بۇيىرماي تۇر. ويتكەنى جەردىڭ اقىسى تەز ارادا تولەنبەگەن جاعدايدا، ەسىموۆ تابىستاعان كىلتتەر كەرى قايتارىلۋى مۇمكىن.