نۇراش ايتكەن قىزى
اكەشىمە دەگەن الاقانىمنىڭ حاتى
اكە ، مۇندا كۇن سۋىق ، ءۇي دە سۋىق .
ءومىر عاجاپ دەپ ايتام كىمگە وتىرىك ؟
مۇز - قاتقاق تابانىمنان قاريدى ەپتەپ
سوڭىمدا ءجۇر توپ ۋايىم سۇيرەتىلىپ .
اكە ، ءبىزدىڭ اۋىلعا قار جاۋدى ما ،
جاپىراقتار جاتىرما ءوز باعىندا ؟
شەشەم ءجيى كۇرسىنىپ جۇرگەن شىعار
بىزدەن حابار جەتكەنشە اندا- مۇندا .
مۇزتاۋ ءۇنسىز ، باسى قار ، ماڭگى مۇنار-
كومىلىپ سوندا جاتقان از مۇڭىم بار
تىڭدايىنشى- الپىس كۇز اڭگىمەسىن
مىسالى ، شاشىڭداعى اق قاي جىلعى قار ؟
ماحابباتتار . . . قاتەلىك ، ساعىنشتار ،
تاۋىڭىزدا جاتىرما جامىلىپ قار ؟
قالاي قاراي ، قاي كۇزدە ۇشىپ كەتتى ،
قاناتىندا جازۋ بار ساعىم قۇستار ؟
ال ، بيىل قۇس قايتقالى ، كۇز كەلگەلى
مەنى ولەڭ ىزدەمەدى . ۇندەمەيدى .
قاردىڭ سۋىن كۇتەتىن شىعار مۇمكىن
جاستىعىمنىڭ اڭساۋىق قىر -بەلەڭى .
ءيىنى قانىپ جارىقتىق قارا تاۋدىڭ ،
جاتادى -اۋ ءوز بيىگى . . . ءوز وتانى . . .
كۇن سۋىق . اكە -الىستا . قار ىپ -ىستىق ،
كوڭىل بەيجاي .
كۇيىپ تۇر الاقانىم .
ءسۇيۋ دەپ ءبىل
كوكە !
قيىن شاقتاردا ،
مۇڭلى ساتتەردە
ىزدەمەيتىنمدى ،
قاراڭعى تۇسقا سۇيرەمەيتىنمدى ،
كۇيرەگەن داۋال تۇبىندە ۇيىقتاپ
كۇيرەمەيتىنمدى ،
نازدانىپ كۇلەر ”قىرىق حانشاڭدى “
كۇندەمەيتىنمدى
ءسۇيۋ دەپ ءبىل .
ءسوزىمنىڭ باسى ،
كوزىمنىڭ جاسى
ەكەندىگىڭدى ،
ەڭ جاقىن ءارى بوتەندىگىڭدى ،
تەمىرقازىق پەن تاۋىڭدى جالعاپ
ءۇيىڭدى اينالا وتەر مۇڭىمدى
ايتپاعانىمدى
اقتانگەرىم -وۋ ،
ءسۇيۋ دەپ ءبىل .
جاراڭدى ەمدەر ،
جانىڭدى تەربەر ،
جۇمباق دىبىستى
اڭسايتىنڭدى ،
شاشىما قونعان اق ءتۇيىر شاڭدى
بارىنەن بۇرىن بايقايتىنىڭدى ،
سەزەتىنمدى ،
سەنەتىنمدى
ءسۇيۋ دەپ ءبىل ، كوكە ! . . .
دومبىرا ءمۇسىندى جۇرەگىم
كۇندەردەن وزگە كۇندەردىڭ، شاقتاردان وزگە شاقتاردىڭ
ويلادىم با ەكەن سوناۋ-ۋدا، سۇيىپ قالام دەپ اسپانىن.
جۇلدىزى عاجاپ سول تۇننىڭ، مۇڭلىلاۋ اسەم تولقىنىن
دومبىرا تارتىپ وتىرىپ، كوزىڭدى قاداپ ماقتادىڭ.
ماقتادىڭ ٴتۇننىڭ ىستىعىن، بۇلتتاردىڭ دا ىستىق ەكەنىن،
كوزىمدى قايدا اپارسام، قولىڭدى سوندا كوتەردىڭ.
ساعىنىپ قاباق شىتاسىڭ.
كوپ قاراۋعا دا ايايسىڭ،
ۇناتتىم نۇردان جارالعان ماحابباتىڭنىڭ مەكەنىن.
قولىما ٴيسىن سەبەدى ٴماۋىلجىپ پىسقان اق جۋسان،
القوڭىر» مەن «تەلقوڭىر» - جۇرەكتە كەزەك جاڭعىرسا،
تامىرعا بويلار كۇيلەردىڭ تاعدىرى مەندە شىعار-اق،
قوس ىشەگىنە جىلىنام، جۇلدىزدى ٴتۇنىڭ توڭدىرسا.
دومبىرا-ساۋساق اراسى، ەكەۋىمىزدەگى ارالىق،
تەلەگەي مۇڭنىڭ تامشىسى جۇلدىزدان ٴجيى تامادى.
قۇلاق كۇيى ٴبىر كەلمەگەن مىنا دۇنيەنىڭ ازابىن
كوزگە ىلمەي تۇردىق.
ەڭىستە
بۇلدىراپ جۇردى.
ايادىق.
كۇمبىرلى كۇيمەن قىمتادىڭ، سۋىق جەل سوققان ىرگەمدى،
كۇي قوسىپتى عوي، ەندەشە، ارانى سول جىل كىم ٴبولدى؟
كوزىڭنىڭ جالعىز تامشىسىن قۇلاتا كورمە ، نار كوكە
وزىڭە سىيلاپ وتىرمىن، كۇندەردەن وزگە كۇندەردى. . .
سىرنايلى قوسباسار
مىناۋ نە، سارى دالاما ساعىمى مول ،
ءورت تيگەن نۋ ورمانداي جالىنى ۇدەر .
سىرنايلى قوسباسار بۇل .
ەكى ىشەكتىڭ
ەكى مىڭ جىلدا قانباس زارىعى دەر .
مىناۋ نە- ساربازدارما مىڭ سان اتتى ،
قالىڭ قول لاپ قوياما كىل جاراقتى ؟ !
كۇرە جۇيكەڭ جۇقارعان، ەي، قارا جەر
سىز تۇگىل ، ۇلى اسپان دا تىنىسىنان
توقتارداي كىلىت اداستى .
ەكى ىشەك تىڭداي قالسا ءبىرىن ءبىرى ،
الماسىپ ەكى الەمنىڭ تىنىعۋى .
بىرەۋى ساعىنشتىڭ دابىسىنداي
بىرەۋى جان جىلاتار سۇيۋ ءۇنى .
سىرنايلى ، بەۋ ، قوسباسار ، ارمانىم -اي !
لۇپىلدەپ بۇل دۇنيەنىڭ قالعانىنداي .
كەۋدەمدى تىرناپ تۇرار ماڭگى باقي
كەرەمەت كەزدەسۋدەن قالعان مۇڭداي .
قوس ىشەك- جانارىڭنان جالىن اتىپ ،
مىڭ ويدى كوگەنىڭنەن جامىراتشى . . .
جۇرەگىم جۇرت تىڭداماس ءامىرشى عوي
قوسباسار ، مەن توقتايىن ، ءوزىڭ ايتشى !
اسپالى جۇرەكتەر
قوشتاسىپ ەدىڭ قولىمنىڭ سىرتىنان سيپاپ
جارىق جۇلدىزىم سەكىلدى تۇردىڭ الىستاپ .
ءبىر شۋماق ولەڭ كوزىمنەن قۇس بولىپ ۇشىپ
اراسىندا اي مەن توعايدىڭ جۇردى قالىقتاپ .
كىنالاي بەردىڭ باعىڭ مەن بالاشاعىڭدى ،
بولمادىم دەدىڭ تىم اساۋ قارا تاي عۇرلى .
بۇرىلعانىڭدى كورگەم جوق .
كوز جاسىم تامىپ
ءىزىڭدى سيپاپ جىلتتىم الاقانىمدى
شەگىرتكەلەردە سەن جايلى اڭگىمە قوزعاپ ،
اقىل ايتادى وزىڭ بوپ ومىردەن ازداپ .
سىر تولى توعاي سەنىكى ، مىنا جولدارمەن
ءجۇرىپ كەلدىڭ بە اڭعالىم ، سۇرىنە جازداپ؟ ؟
توعايدان ەمەس ، قاشتىڭ سەن ءوز جۇرەگىڭنەن ،
اياپ تۇرمىن دەپ اياماي كەلدىڭ عوي ، بىلەم !
تەرەككە سۇيەپ ارقاڭدى اڭگىمە ايتقانىڭ-
جاڭساق قىزىعىم شىعار-اۋ كەمدى كۇن كورگەن .
كوڭىلدە ۋايىم ، كوكتە بۇلىت استاسقانىن -اي ،
باعىمدى ىزدەپ كەلمەپ پە ەم باستاپتا مۇندا ؟ !
قوزىقا- قوڭىر مىنەزبەن سۇيىپ وتەرسىڭ،
قولىمنىڭ سيپاپ سىرتىنان قوشتاسقانىڭداي .
دايىنداعان: بۇلعىن سۋسار
