ازاماتتاردىڭ قۇقىقتىق ساناسىن ارتتىرۋ ماقساتىندا، قازاقستان رەسپۋبليكاسىنىڭ باس پروكۋراتۋراسى قاداعالاۋ قىزمەتىنىڭ ماتەريالدارى نەگىزىندە «پروكۋروردىڭ 100 كەڭەسى» انىقتامالىعىن ازىرلەدى دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.
بۇل قۇرالدا زاڭ تۇرعىسىنان كۇندەلىكتى ومىردە ءجيى تۋىندايتىن سۇراقتارعا جاۋاپتار بەرىلەدى.
«پروكۋروردىڭ 100 كەڭەسى» - 9 بولىمنەن تۇرادى.
ولار: 1. وتباسىڭىز ءۇشىن
2. تۇرمىستىق زورلىق-زومبىلىقتى بولدىرماۋ جايلى
3. ءسىزدىڭ بيزنەسىڭىز ءۇشىن
4. ەڭبەك قاتىناستارى بويىنشا
5. قۇقىق قورعاۋ ورگاندارىمەن قاتىناستاعى
6. تەرروريزم مەن ەكسترەميزمگە قارسى ءىس-قيمىل جونىندە
7. ءوزىڭدى الاياقتاردان قالاي قاۋىپسىزدەندىرۋ كەرەك
8. سوت ورگاندارىمەن قاتىناستارداعى
9. ءوتىنىش بەرۋ كەزىندە.
ونىڭ ءارقايسىسىندا 10-20 كەڭەس بار. ءارقايسىسىنا جەكە-جەكە توقتالساق.
- «وتباسىڭىز ءۇشىن» بولىمىندە – بالانىڭ قۇقىعى، بالا جوعالىپ كەتكەن جاعدايدا نە ىستەۋ كەرەك؟ اتا-انا قانداي جاعدايدا اتا-انا قۇقىعىنان ايىرادى جانە اليمەنت، بالانى بالاباقشاعا ورنالاستىرۋ ت.ب وتباسىنا قاتىستى حالىق اراسىندا ءجيى تۋىندايتىن ساۋالدارعا جاۋاپ بەرەدى.
- تۇرمىستىق زورلىق-زومبىلىقتى بولدىرماۋ جايلى. بۇل بولىمدە وتباسىندا زورلىق-زومبىلىق كورگەن ادامعا قانداي ءىس-قيمىل جاساۋ كەرەكتىگىن، ءقاۋىپ تونگەن جاعدايدا، زورلىق جاساۋى مۇمكىن ادامدى زاڭ تۇرعىسىنا وزىڭنەن قالاي الشاقتاتۋ كەرەك؟ وسى جانە وزگە دە ماسەلەگە قاتىستى كەڭەس بەرەدى.
- ءسىزدىڭ بيزنەسىڭىز ءۇشىن. اتالمىش بولىمدە - تەكسەرىس كەزىندە كاسىپكەردىڭ قانداي قۇقىقتارى بار جانە ونى تەكسەرۋشىلەر ونى بۇزعان جاعدايدا نە ىستەۋ كەرەك؟ كاسىپكەرلەرگە مەملەكەت تاراپىنان كورسەتىلەتىن كومەكتەر. سونىمەن قاتار، مەملەكەتتىك ساتىپ الۋلار تۋراسىندا نەنى ءبىلۋ كەرەك؟ دەگەن ساۋالدارعا جاۋاپ بەرەدى.
- ەڭبەك قاتىناستارى بويىنشا. بۇل جەردەن ءسىز - جۇمىستان قىسقارتىلعان جاعدايدا جۇمىسكەردىڭ قانداي قۇقىقتارى بار؟ ەڭبەك قۇقىقتارى بۇزىلعاندا نە ىستەۋ كەرەك؟ ەڭبەك شارتىندا قامتىلۋى ءتيىس بولىمدەر جانە ت.ب سۇراقتار قامتىلعان.
- قۇقىق قورعاۋ ورگاندارىمەن قاتىناستاعى بولىمىنەن، قۇقىققورعاۋ ورگاندارىنا ءسىزدى قانداي جاعدايدا جەتكىزە الادى؟ 72 ساعات بويى ءسىزدى نە ءۇشىن ۇستاۋى مۇمكىن جانە ءسىزدى كۇدىكتى دەپ تانىسا نەنى ءبىلۋ كەرەك؟ بۇدان بولەك باسقا دا كوپتەگەن ءسۇراقتارعا جاۋاپ بەرەدى.
- تەرروريزم مەن ەكسترەميزمگە قارسى ءىس-قيمىل جونىندە. بۇل بولىمنەن جاقىن ادامدارىڭىزدىڭ ازعىندىرۋ تۇزاعىنا ىلىنسە نە ىستەۋ كەرەك؟ كەپىلگە الىنساڭىز ءوزىڭىزدى قالاي ۇستاۋ كەرەك؟ تەراكتى كەزىندە نە ىستەۋ كەرەك، ونىڭ ءتارتىبى. تەرروريزم مەن ەكسترەميزمگە قاتىستى كوپتەگەن سۇراقتارعا جاۋاپ بەرەدى.
- ءوزىڭدى الاياقتاردان قالاي قاۋىپسىزدەندىرۋ كەرەك. مۇندا جەردى راسىمدەۋ كەزىندەگى الاياقتىق، قارجىلىق پيراميدا، عالامتورداعى الاياقتىق، شارت جاساسۋ ت.ب ماسەلەلەرگە قاتىستى كەڭەس بەرەدى.
- سوت ورگاندارىمەن قاتىناستارداعى. اتالمىش بولىمنەن قىلمىستىق ءىس سوتتا قالاي قارالاتىنى، سوت ۇكىمىنە كىم شاعىم تۇسىرە الادى؟ قانداي جاعدايدا اپەللياسيالىق شاعىم ءتۇسىرۋ كەرەك؟ دەگەن سەكىلدى سۇراقتارعا جاۋاپ الىپ، پروكۋرور كەڭەسىن وقي الاسىز.
- ءوتىنىش بەرۋ كەزىندە قاجەتتى. اتى ايتىپ تۇرعانداي، ءارتۇرلى سەبەپپەن بەرىلگەن وتىنىشكە قاتىستى بارلىق سۇراقتارعا دەرلىك جاۋاپ بەرەدى. ماسەلەن، ءسىزدىڭ ءوتىنىشىڭىزدى قارايتىن ادام نەگە مىندەتتەلەدى؟ وتىنىشىڭىزگە بەرىلگەن جاۋاپقا قاناعاتتانباساڭىز نە ىستەۋ كەرەك؟ پروكۋراتۋرا باسشىلىعىنىڭ جەكە قابىلداۋىنا جازىلۋ ءۇشىن نە ىستەۋ كەرەك؟ وسى جانە وزگە دە سۇراقتاردى اتالمىش بولىمنەن وقي الاسىز.
«پروكۋروردىڭ 100 كەڭەسىن» ءاربىر ادام ۇيالى تەلەفونىنا ورناتا الادى.
