№157 ورتا مەكتەپ باسشىلىعى «ۇلى دالا بالاسى تورەعالي تورەالى اتىنداعى ءماجىلىس زالى» اشىلدى دەگەن اقپاراتتى جوققا شىعاردى.

ەستەرىڭىزگە سالا كەتەيىك، بۇدان بۇرىن ءوزىن تورەعالي تورەالىنىڭ ديرەكتورىمىن دەپ تانىستىرعان فاريزا سپاندياروۆا ءوزىنىڭ ينستاگرام پاراقشاسىندا  «بۇگىن بىزدە تاعى ءبىر قۋانىشتى جاڭالىق. ناۋرىزباي اۋدانىنداعى، ءنومىرى 157ء-شى مەكتەپتىڭ ىشىنەن ۇلى دالا بالاسى - تورەعالي تورەالى اتىنداعى “ءماجىلىس زالى“ اشىلدى. ەندi مەكتەپتىڭ بارلىق ءىس-شارالارى وسىندا وتەتىن بولادى» دەپ جازعان ەدى. وسى جازبانى كورگەننەن كەيىن «قامشى» سايتى  جازبانىڭ اۆتورىنا حابارلاستى.

فاريزا سپاندياروۆا بىزگە بەرگەن سۇحباتىندا مەكتەپ باسشىلىعىنا وقۋشىلار «تورەعالي تورەالى اتىنداعى ءماجىلىس-زالىن» اشۋ تۋرالى ۇسىنىس تاستاعانىن ايتقان.  مەكتەپ باسشىلىعى قابىل الىپ، ونىڭ اشىلۋ سالتاناتىنا ءانشىنى شاقىرعان. تورەعالي ۇسىنىستى قۋانا قابىل الىپ، وقۋشىلارعا ءان ايتىپ بەرگەنىن ايتتى.

ءانشىنىڭ ديرەكتورى بىزگە ءماجىلىس زالىنىڭ اشىلۋ سالتاناتىنان دەپ تورەعاليدىڭ وقۋشىلارمەن بىرگە تۇسكەن جانە تورەعاليدىڭ «ۇلى دالا بالاسى تورەعالي تورەالى اتىنداعى ءماجىلىس زالى» دەپ جازىلعان تاقتايشانى ۇستاپ تۇرعان فوتوسى مەن ۆيدەونى جىبەردى. ول qamshy.kz جاريالاندى.

ناۋرىزباي اۋدانىنداعى №157 مەكتەپكە حابارلاسقانىمىزدا، مەكتەپ ديرەكتورى احمەتوۆا سۆەتا اعابەك قىزى اتالمىش ءماجىلىس-زالى جوق ەكەنىن جانە بولاشاقتا دا اشىلمايتىنىن ايتتى.

«تورەعاليدىڭ پروديۋسەرى «تورەعالي تورەالىنىڭ اتىنداعى ءماجىلىس زالدى اشۋ» تۋرالى ۇسىنىس جاسادى. الايدا ءبىز ءوز بەتىمىزبەن ونداي زال اشا المايمىز. ول ءۇشىن اكىمشىلىكتىڭ، ءبىلىم باسقارماسىنىڭ رۇقساتى كەرەك. ءبىز اتى اتالعان مەكەمەلەرگە ول ۇسىنىستى جىبەرگەن دە جوقپىز. سوندىقتان «ۇلى دالا بالاسى تورەعالي تورەالى اتىنداعى ءماجىلىس زالى» №157 مەكتەپتە اشىلمادى جانە بولمايدى دا. ال فوتو مەن ۆيدەوعا قاتىستى ايتار بولسام، تاۋەلسىزدىكتىڭ 25 جىلدىعىنا وراي ۇيىمداستىرىلعان مەرەكەلىك ءىس-شاراعا تورەعالي قوناق رەتىندە كەلىپ كەتكەن. سول ۋاقىتتا تۇسىرىلگەن فوتو مەن ۆيدەو» دەدى مەكتەپ ديرەكتورى.

qamshy.kz سايتىندا ءانشىنىڭ اتىندا ءماجىلىس زالى اشىلعانى تۋرالى اقپارات شىققاندا وقىرماندار تاراپىنان مەكتەپ باسشىلىعىنا نارازىلىق بىلدىرگەندەر كوپ بولدى. ءبىلىم ورداسىنداعى زالدا ءانشىنىڭ ەمەس ۇلت زيالىلارىنىڭ ەسىمدەرى بەرىلۋى كەرەك ەدى عوي دەپ رەنىشتەرىن ءبىلدىردى. «قامشى.كز» پورتالى ءوز تاراپىنان جانە وقىرمانداردىڭ تىلەگىن №157 مەكتەپ باسشىلىعىنا جەتكىزدى. 

 №157 مەكتەپتە «ۇلى دالا بالاسى تورەعالي تورەالى اتىنداعى ءماجىلىس زالى» اشىلعانىنا قاتىستى كەلەڭسىزدىك ورىن الىپتى. مەكتەپ ديرەكتورىنا  ءارتاراپتان قىسىم كورسەتىلىپ جاتىر ەكەن. ءىس ناسىرعا شاپپاۋى ءۇشىن «قامشى» بارشا وقىرمانداردى سابىرلىققا شاقىرادى.