ەستەرىڭىزگە سالا كەتسەك، 17 جەلتوقسان كۇنى «قامشى» پورتالىندا ءالي وقاپوۆ پەن قايرات نۇرتاسقا باعىتتالعان مارال ەسىمدى قازاق قىزىنىڭ حاتى جاريالانعان بولاتىن. حاتتا ءالي مەن قايراتتىڭ «دارىن» مەملەكەتتىك سىيلىعىنىڭ يەگەرى اتانعانى جايلى ايتىلىپ، انشىلەرگە «وزدەرىڭىزدى العان وردەن-مەدالدارىڭىزعا لايىقپىن دەپ سانايسىزدار ما؟» دەگەن ساۋال قويىلعان. وسى سۇراققا انشىلەردىڭ ءوز اۋزىنان جاۋاپ الۋ ماقساتىندا «قامشى» ءتىلشىسى تەلەفون ارقىلى ولارعا حابارلاسىپ ەدى، الايدا بىردەن جاۋاپ الۋ مۇمكىن بولمادى. اراعا ءبىر اپتا سالىپ، ءتىلشىمىز ولارعا قايتا حابارلاسىپ، اتالعان حاتقا بايلانىستى جاۋابىن بىلمەك بولدى. حاتتا اتى اتالعان انشىلەردىڭ ءبىرى – قايرات نۇرتاستىڭ ديرەكتورى لاۋرا حانىم: «21 جەلتوقسان كۇنى وتكەن كونسەرتتىڭ ەسەبىن جاساپ وتىرعاندىقتان، ءقازىر جاۋاپ بەرۋگە مۇمكىنشىلىگىم جوق»، - دەپ سەبەبىن تۇسىندىرسە، ءالي وقاپوۆتىڭ تىلشىمىزگە بەرگەن جاۋابى مۇلدەم باسقاشا بولدى.

«نە سەبەپتى ماعان تىكەلەي حابارلاسىپ وتىرسىز، ءارتىستىڭ جەكە نومەرىنە حابارلاسۋعا ەشكىمنىڭ دە قۇقى جوق»، - دەپ ءاي-شاي جوق، وسىلاي باستادى اڭگىمەسىن ءالي وقاپوۆ. «مەن ءتورت كۇن بويى ۇيىقتاعانىم جوق، سىزگە دە ءتۇن ورتاسىندا، ۇيىقتاپ جاتقان جەرىڭىزدە حابارلاسسا اشۋىڭىز كەلەدى عوي... مەن سىزدەردىڭ قانداي حات بويىنشا حابارلاسىپ تۇرعاندارىڭىزدى بىلەمىن، ونى وقىپ شىقتىم. الايدا، مەن وعان جاۋاپ بەرۋگە مىندەتتى ەمەسپىن. حات بولسا، حات كۇيىندە قالسىن. بۇل مەنىڭ ەشقانداي دا تاكاپپارلىق نەمەسە بىرەۋدى مەنسىنبەگەندىگىم ەمەس، ماعان قويىلعان سۇراقتاردىڭ بارلىعىنا جاۋاپ بەرىپ وتىراتىن مەنىڭ مۇمكىندىگىم جوق. مۇنداي تىرلىكتەرمەن اينالىساتىن مەنىڭ ارنايى ادامىم بار، وسىنداي جاعدايلاردى شەشىپ وتىرسىن دەپ سايلاپ قويعانمىن. نەگە سول كىسىگە حابارلاسپايسىزدار؟» - دەپ اشۋلانا كەتتى.

ءاليدىڭ ايتىپ وتىرعانى، ونىڭ ديرەكتورى – ەرلان ءالىموۆ. نەگىزىندە ەڭ ءبىرىنشى كەزەكتە ءدال سول ەرلانعا بايلانىسقا شىققان ەدىك. ەرلانمەن ءبىر رەت ەمەس، بىرنەشە رەت تىلدەستىك. اتالمىش سۇراققا بايلانىستى ەرلاننىڭ ايتقان جاۋابى مىناداي بولدى: «بۇل حات اليگە تىكەلەي ارنالعان حات ەكەن، مۇنداعى قويىلعان سۇراققا مەن جاۋاپ بەرە المايمىن. ءاليدىڭ وزىنە حابارلاسىپ، جاۋابىن وزىنەن الىڭىزدار».

مىنە جاقىندا عانا «دارىن» سىيلىعىنىڭ يەگەرى اتانعان ءالي وقاپوۆتىڭ جاۋابى وسىلاي بولدى. ال، تاعى ءبىر «دارىندى» ءانشى، «قۇرمەت» وردەنىنىڭ يەگەرى قايرات نۇرتاستىڭ  جاۋابىن كەلەسى اپتادا «قامشى» پورتالىنان وقيتىن بولاسىزدار.

قامشىگەر: نازەركە لابيحان