9 جاسار قىز مەيىرگۇل اتا-اناسىمەن قاۋىشتى دەپ حابارلايدى "قامشى" پورتالى. اقىن اۋىت مۇقيبەك الەۋمەتتىك جەلىدە 9 جاستاعى مەيىرگۇلدىڭ اتا-اناسىنىڭ ورتاسىندا وتىرعان سۋرەتىن جاريالادى.
"قامشى" پورتالى 7 جەلتوقساندا قازاقستانعا ورالعانىمەن ەلىمىزدىڭ كوشى-قون زاڭناماسىن بۇزعانى ءۇشىن كەرى قايتارىلعان قانداستارىمىزدىڭ ءبىرى 9 جاستاعى مەيىرگۇلدىڭ اتا-اناسى تۋرالى جازعان بولاتىن. ولاردىڭ شەگارادان شىعارىلۋىنان كەيىن مەيىرگۇل قازاقستاندا جالعىز قالىپ قالعان.
مەيىرگۇلدىڭ اكەسى سامەت ۇلاربەك پەن شەشەسى تۇرسىن ورالحان 2016 جىلعى 8 تامىزدا الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ قاۋلىسىمەن ق ر اكىمشىلىك قۇقىق بۇزۋشىلىق تۋرالى كودەكسىنىڭ 517-بابى 4-بولىمىنە سايكەس (بەلگىلەنگەن مەرزىمدە ەلدەن شىعۋدان جالتارۋ) اكىمشىلىك جاۋاپكەرشىلىككە تارتىلىپ، سوت شەشىمىمەن اكەسى ءبىر تاۋلىككە قاماۋعا الىنعان، شەشەسى ايىپپۇل تولەگەن. 2016 جىلعى 14 تامىزدا ولار قازاقستاننان «قورعاس» باقىلاۋ-وتكىزۋ پۋنكتى ارقىلى شىعىپ كەتكەن. ولاردىڭ قازاقستانعا 5 جىل بويى كىرۋىنە تىيىم سالىنعان.
2016 جىلعى 7 جەلتوقساندا «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە ىشكى ىستەر ءمينيسترى ق.قاسىموۆپەن وتكەن قابىلداۋدا مەيىرگۇل ۇلاربەك قىزى استانادا ءمينيستردىڭ قابىلداۋىندا بولعانىن جازعان ەدىك. ءوتىنىشىن ايتىپ، اتا-اناسىنىڭ تەزىرەك قازاقستانعا ورالۋىنا راقىمشىلىق جاساۋىن سۇراعان بولاتىن. ىشكى ىستەر ءمينيسترى مەيىرگۇلدىڭ ءوتىنىشى بويىنشا، ق ر سىرتقى ىستەر مينيسترلىگىنىڭ كونسۋلدىق دەپارتامەنتىنە حات جازىپ، ۇرىمجىدەگى كونسۋلدىقتان سامەت ۇلاربەك پەن شەشەسى تۇرسىن ورالحانعا ەلىمىزگە كىرۋ ۆيزاسىن بەرۋدى سۇراپتى. 22 جەلتوقساندا «نۇر وتان» پارتياسىنىڭ قوعامدىق قابىلداۋ بولمەسىنە ۇرىمجىدەگى مەيىرگۇلدىڭ اناسىنان ەلىمىز كونسۋلدىعىنان قازاقستانعا كەلۋ ۆيزاسىن العانى تۋرالى حابارلاعان بولاتىنبىز.
