عالامتوردىڭ جات اعىمداردىڭ ناسيحات وشاعىنا اينالىپ وتىرعانى جاسىرىن ەمەس. ءدىني تانىمنان حابارى از جاستار وسىنداي جەلىلەرگە كىرىپ، بايقاماي بىرەۋدىڭ قازعان ورلارىنا تۇسەدى. اقمولا وبلىسىندا ءبىر جاس ازاماتقا قاتىستى سوت پروسەسى باستالدى. ول الگىندەي جەلىدە وتىرىپ، جيھادقا ۇندەيتىن اقپاراتقا «لايك» باسقان.  بۇل تۋرالى اقمولا ءدىن ىستەرى باسقارماسى باسشىسىنىڭ مىندەتىن اتقارۋشى بولات قاسەنوۆ  مالىمدەدى  دەپ حابارلايدى bnews.kz.

ءبىر قاراعاندا بۇدان نە وزگەردى دەيسىز عوي. جاڭاعى بىلمەستىكتەن باسقان «لايك» سول جەلىدەگى جات اعىمنىڭ ناسيحاتىن تاراتۋ دەپ ەسەپتەلەدى ەكەن. سەبەبى، ول ءوزى وقىعان اقپاراتقا لايك باسىپ قانا قويماي، ونى ءوز دوستارىنا تاراتقان. دەمەك، ول عالامتورداعى زاڭسىز اقپاراتتى تاراتۋشىلاردىڭ ءبىرى سانالادى.

«جات اعىمنىڭ وكىلدەرى جاستاردى وزدەرىنە تارتۋ ءۇشىن  الەۋمەتتىك جەلىگە قۇران مەن حاديستەن  اسىل سوزدەردى كەلتىرىپ، ءبىر جەرىندە عانا جيھادقا شاقىرۋى مۇمكىن. بۇل دا ادامدى قۇران اياتتارى ارقىلى باۋراۋدىڭ ءبىر قۇيتىرقى جولى. اڭقاۋ ادام قۇران اياتىنا لايك باسىپ جاتىرمىن دەپ ويلاۋى مۇمكىن. ءبىراق، ول جاڭاعى جات اعىمنىڭ تەرىس ناسيحاتىن تاراتۋشى بولىپ شىعا كەلەتىنىن اڭعارمايدى»،–دەيدى اقمولا ءدىن ىستەرى باسقارماسى باسشىسىنىڭ مىندەتىن اتقارۋشى بولات قاسەنوۆ.

بۇگىندە تۇزەتۋ مەكەمەلەرى سالافيلىك اعىم وكىلدەرىنىڭ دە جازاسىن وتەۋ ورنىنا اينالدى. جەرگىلىكتى ءدىن باسقارماسى مەن تەولوگتار دا ولاردى رايلارىنان قايتارۋ ءۇشىن قىرۋار جۇمىس ىستەۋدە. اقمولا وبلىسىندا سىرتتان الدىرىلعان ءبىر عانا تەولوگ بار. ونعا تارتا تۇزەتۋ مەكەمەسىندەگى جازاسىن وتەۋشىلەرمەن ونىڭ جەكە جۇمىستارى ناتيجەسىن بەرە مە؟! بيىل وبلىس بويىنشا تۇزەتۋ مەكەمەلەرىندە 16 ادام رايلارىنان قايتىپ، ءداستۇرلى دىنىمىزگە ورالدى.

اقمولا وبلىسىنىڭ ادىلەت جانە باسقا دا قۇزىرلى ورگاندارىندا بارلىعى 122 ءدىني ۇيىمدار جانە 70-تەن اسا ميسسيونەرلەر تىركەلگەن. ءدىن باسقارماسىنىڭ وكىلى تىركەۋدەن باس تارتىپ، وزدەرىنىڭ ناسيحات جۇمىستارىن زاڭسىز جۇرگىزۋگە تىرىساتىندار دا جوق ەمەستىگىن دە اتاپ ءوتتى.

«ەلىمىزدەگى ءدىن سالاسىنداعى زاڭدا ءدىني عيبادات ورنىنان تىس جەردە ءوز ناسيحاتتارىن جۇرگىزۋگە تىيىم سالىنادى دەلىنەدى. اكىمشىلىك قۇقىق بۇزۋشىلىق زاڭدارىمەن ونداي زاڭ بۇزۋشىلارعا 50-دەن 200-گە دەيىنگى ايلىق ەسەپتىك كورسەتكىش كولەمىندە ايىپپۇل سالىناتىنى دا ايتىلادى. ءبىراق، ادامداردىڭ ءبارى زاڭدى ورىنداي بەرمەيدى. ارنايى بەلگىلەنگەن ورىنداردان تىس جەرلەردە ءدىني ادەبيەتتەر تاراتادى. قاراپايىم ادامداردى ءوز قارماقتارىنا ءتۇسىرىپ، اربايدى، الدايدى»، – دەيدى ب.قاسەنوۆ.