- الەمدە بولىپ جاتقان سوڭعى وقيعالاردىڭ كورىنىسى اقپاراتتىق سوعىستىڭ ايقىن ناتيجەسى، - دەپ جازادى بەلگىلى تەلەجۇرگىزۋشى اسحات سادىرباي جەلىدەگى پاراقشاسىندا.

وكىنىشكە وراي قازاقستاندىقتار اقپارات الۋدا، ىزدەۋدە وتاندىق جانە رەسەيلىك بۇقارالىق اقپارات قۇرالدارىمەن عانا شەكتەلەدى. ءتىل بىلمەگەندىكتەن كەز-كەلگەن جاڭالىقتىڭ ورىسشاسىن ىزدەپ وقيمىز. دەرەككوزگە ءمان بەرمەيمىز، امەريكا، ەۋروپا، اعىلشىن باسپاسوزدەرى قاي جاڭالىقتى قاي ۋاقىتتا قالاي بەرگەنىنەن بەيxابارمىز. بۇل تەك قالىڭ بۇقاراعا عانا ەمەس وتاندىق باق-عى جاڭالىقتار قىزمەتىندە جۇمىس ىستەپ جۇرگەن ارىپتەستەرگە دە قاتىستى. ينتەرنەت قارىشتاپ دامىپ، سپۋتنيكتىك تەلەارنالارعا قولىمىز جەتىپ قۋانعانىمىزبەن اقپارات كەڭىستىگىمىزدىڭ كۇننەن-كۇنگە تارىلىپ، ءسال دە بولسا ساياسيلانىپ بارا جاتقان سياقتى ەكەنىن بايقاۋ قيىن ەمەس. مىسالى، الدىڭگۇنى سيرياعا ساپارعا شىققان رەسەيدىڭ 100-گە جۋىق ازاماتى تۋ-154 ۇشاعىمەن اپاتقا ۇشىراپ قازا بولدى. جانتۇرشىگەرلىك اۋىر وقيعا. قارا تەڭىزدەن ونشاقتى عانا ادامنىڭ ءمايىتى تابىلدى، قالعاندارى ءالى ىزدەستىرىلۋدە. ءبىز دە كورشىلەس ەلگە كوڭىل ايتىپ، قازا بولعانداردىڭ وتباسىنا سابىر تىلەدىك. ەشقانداي ارتىق ماقساتى جوق، ارتىستەر، جۋرناليستەر، باس-اياعى توقسان ءۇش ادامنىڭ ءبىر ساتتە وپات بولۋى جۇرەككە تيەدى. بۇل جەردە ۇلتى، ءدىنى، ءناسىلى ءرول وينامايدى. ادام با ادام. بىرەۋدىڭ اكەسى، بىرەۋدىڭ بالاسى... بايقاساڭىز، رەسەيدىڭ بۇكىل تەلەارناسى، ءباسپاسوزى، سايتتارى مينۋت سايىن بولعان جايتتان xابار بەرىپ، جارىسا جازۋدا. ءبىزدىڭ اقپارات قۇرالدارى دا ادەتتەگىدەي قىزمەت اتقارۋدا.
ال، سيرياداعى سوعىستان سوڭعى 5 جىلدا كوز جۇمعانداردىڭ سانى كەيبىر دەرەككوزدەردىڭ مالىمدەۋىنشە 300.000 عا، كەيبىرىنىڭ ايتۋىنشا 500.000 عا جەتكەن. ولار دا ادامدار، ول جەردە دە جازىقسىز جاپا شەگىپ جاتقاندار بار. انالار، بالالار... ءبىراق ءبىز ءجۇز مىڭداعان جۇرتتىڭ ومىرىنە ەمەس، ءجۇز شاقتى ادامنىڭ تاعدىرىنا عانا قايعىرىپ وتىرمىز... الەۋمەتتىك جەلىلەردە بۇل جونىندە نەشە ءتۇرلى پىكىرتالاستار بوپ جاتىر. ءبىراق ول نە بەرەدى؟ بۇل جاعداي مەنى ادام رەتىندە دە، جۋرناليست رەتىندە قاتتى الاڭداتادى. ارى قاراي نە بولار ەكەن؟