قىتايدىڭ باتىسىنداعى شىڭجاڭ ۇيعىر اۆتونوميالىق اۋدانىندا بىرنەشە ادامى بار كولىك ۇكىمەتتىك مەكەمەگە كەلىپ سوقتىعىپ، ءبىر ادام قازا تاپتى. ايماق بيلىگىنىڭ حابارلاۋىنشا، شابۋىل 28 جەلتوقسان كۇنى بولدى. پوليسيا كولىكپەن كەلگەن ءتورت ادامدى اتىپ ءولتىردى. شابۋىلدان ءۇش ادام جارالاندى. بۇل تۋرالى ازاتتىق جازدى.

قىتايدىڭ ورتالىق ازيا ەلدەرىمەن شەكتەسەتىن شىڭجاڭ ايماعىندا سوڭعى جىلدارى جەرگىلىكتى حالىق - مۇسىلمان ۇيعىرلار مەن ەتنيكالىق ازشىلىقتى قۇرايتىن قىتايلار اراسىنداعى زورلىق-زومبىلىقتاردان جۇزدەگەن ادام قازا تاپتى.

قۇقىق قورعاۋشى ۇيىمدار مەن قۋعىنداعى ۇيعىرلار زورلىق-زومبىلىققا پەكيننىڭ ۇيعىرلاردىڭ مادەنيەتى مەن دىنىنە باقىلاۋ ورناتپاق بولعان ارەكەتى كىنالى دەسە، جۇڭگو بيلىگى ونى يسلامشىل ەكسترەميستەردەن كورەدى. پەكين شىڭجاڭدا قانداي دا ءبىر قۋدالاۋ جاساپ جاتقانىن جوققا شىعارادى.

شىڭجاڭ باسشىلىعىنىڭ حابارلاۋىنشا، وقيعا ايماقتىڭ وڭتۇستىگىندەگى قاراقاش اۋدانىندا بولعان. رەسمي مالىمەت بويىنشا، كولىك مىنگەن ءتورت "باسكەسەر" جۇڭگو كوممۋنيستىك پارتياسىنىڭ اۋداندىق ءبولىمى عيماراتىنا كەلىپ سوقتىعىپ، "جارىلعىش زاتتى ىسكە قوسقان".

The Gurardian  تاراتقان اقپاراتتا قارۋلى شابۋىلدىڭ 28 جەلتوقسان ساعات 17:00 شاماسىندا جاسالعانى ايتىلعان. 

حالىقارالىق اگەنتتىكتەردىڭ تىلشىلەرى ۇكىمەتتىڭ رەسمي اقپاراتىن دەربەس دەرەككوزىنەن انىقتاي الماي وتىر.