الماتى وبلىسى اكىمىنىڭ ورىنباسارى جاقسىلىق ومار وسىدان ءبىراز ۋاقىت بۇرىن ءبىلىم مەكەمەلەرىن ارالاپ، جاتاقحانالارداعى ستۋدەنتتەردىڭ جاي-كۇيىمەن تانىسقان ەدى. وندا بىلىمگەرلەر جاتۋى ءتيىس بولمەلەردە سول وقۋ ورىنىندا جۇمىس ىستەيتىن مامانداردىڭ تۇرىپ جاتقانىن كورىپ، رەنىش بىلدىرگەن. وتباسىلى ادامدار تۇرعان جەردە ۋ-شۋ بولادى. بالالاردىڭ ساباققا دايىندالىپ، بوس ۋاقىتتارىندا ءارتۇرلى شارا ۇيىمداستىرۋى ءۇشىن جاتاقحانا ءىشى بوزبالا مەن بويجەتكەندەردىڭ ءوز ەنشىلەرىندە بولۋى ءتيىس. جاتاقحانانىڭ زاڭدىلىعى بويىنشا، وندا دەمالىس ورنى، كىتاپ وقيتىن بولمە بولۋى ءتيىس. تاربيەشىلەر «دوڭگەلەك ۇستەل» ۇيىمداستىرىپ، تالىم-تاربيەلىك كەشتەر وتكىزۋى ءتيىس ەكەندىگى بارشاعا ءمالىم. كوللەدجەردى ارالاۋ بارىسىندا جاقسىلىق مۇقاش ۇلى بۇدان بىلاي ءبىلىم شاڭىراعى وسى زاڭدىلىقتاردى قاتاڭ ساقتاۋى ءتيىس ەكەندىگىن ەسكەرتكەن. بۇگىنگى تەكسەرىس بارىسىندا دا وبلىس اكىمىنىڭ ورىنباسارى ستۋدەنتتەردىڭ زاماناۋي ءبىلىم الىپ، تىنىعىپ، بوس ۋاقىتىن ءتيىمدى وتكىزۋىنە باسا كوڭىل ءبولدى. ول ۇستازدارعا :

– وتباسىلى ادامدار تۇرعان جەرگە سىرتتان بوتەن ادامداردىڭ كەلەتىنى ايدان انىق. ونداي جەردە ىشىمدىك ءىشىلۋى ابدەن مۇمكىن. ءبىز ءجاسوسپىرىم ۇل-قىزداردىڭ قاۋىپسىزدىگىن ساقتاۋىمىز كەرەك. جاستاردى ادەپتىلىككە ۇيرەتىپ، بويىن جامان ادەتتەردەن ساقتاۋ ءۇشىن تاربيەسىنە، الاڭداماۋىنا باسا كوڭىل اۋدارامىز. جاتاقحاناداعى تىنىشتىقتى ساقتاۋ ءۇشىن پوليسيا ينسپەكتورلارىنىڭ قىزمەتى كۇشەيتىلەدى. بولاشاقتا وبلىس بويىنشا ءبىلىم شاڭىراقتارىندا مەكەن ەتىپ جاتقان 360 ەرەسەك ادامدار كوكتەم شىعىسىمەن جاتاقحانالاردان شىعارىلاتىن بولسىن. باسپاناسىز مامانداردىڭ ماسەلەسىن شەشۋ ءۇشىن باسقا جولداردى قاراستىرۋىمىز كەرەك، – دەگەندى ايتتى باسشى. 

    وبلىس اكىمىنىڭ ورىنباسارى جاقسىلىق ومار ءبىلىم بەرۋ مەكەمەلەرىن ارالاۋ بارىسىندا تالدىقورعان قالاسىنداعى سەرۆيس جانە تەحنولوگيا كوللەدجىنىڭ مامان دايارلاۋداعى ءادىسىن جان-جاقتى قاداعالادى ءدۋالدى وقىتۋ باعدارلاماسىمەن ءبىلىم بەرۋ، تۇلەكتەردى جۇمىسقا ورنالاستىرۋ جايىنا باسا كوڭىل اۋداردى. مامان تاربيەلەۋدە ۋاقىتتى ءتيىمدى پايدالانىپ، وقىتۋ باعدارلاماسى اياسىندا جاستاردى بىرنەشە كاسىپتىك ماماندىققا باۋلۋ، سۇرانىسقا يە ماماندىقتار بويىنشا وقىتۋ جايى سالانىڭ جاۋاپتى جەتەكشىلەرىنە قاداي تاپسىرىلدى.