(ءازىل – شىنى ارالاس)
وتىرىكتى ءبارىمىز ايتامىز، ءبىراق ءبىزدىڭ ۇكىمەت وتىرىكتى «ءولتىرىپ» ايتادى. بيلىك قاشان حالىققا شىندىقتى ايتادى – دەگەن، وي عوي...
* * *
جالپى ءبىزدىڭ دەپۋتاتتار ۇشكە بولىنەدى ەكەن: 1- «قىسىپ» وتىراتىندار. 2- «قىشىپ» وتىراتىندار. 3 - «قالعىپ» وتىراتىندار. ەلدىڭ جاعدايىن ويلاپ «قىشىپ» وتىراتىندارعا، كەلەسى سايلاۋدا حالىق كوپ داۋىس بەرسە ەكەن- دەگەن، وي عوي...
* * *
ادامنىڭ ىشەگىندە اسكاريدا قۇرتى بولسا، ول ادام ۋاقىت وتكەن سايىن ارىقتاي بەرەدى ەكەن. اسكاريدانى تۇسىرمەسە، ادام وڭالىپ قالپىنا كەلمەيدى ەكەن. سول سياقتى مەملەكەتتىڭ بيلىك باسىنداعى پارتياسىنىڭ قاتارىندا تويىمسىز جەمقورلار كوپ بولسا، سول مەملەكەتتىڭ ەكونوميكاسى قۇلدىراپ، باسقا ەلگە قارىزعا بەلشەسىنەن باتىپ، بارلىق سالانى قىمباتشىلىق جايلاپ، حالقى كەدەيلەنە تۇسەدى ەكەن. ءبىزدىڭ مەملەكەتتىڭ بيلىگىندەگى پارتيا «ىشەگىندەگى اسكاريدا قۇرتىنان» قاشان قۇتىلادى ەكەن – دەگەن، وي عوي...
* * *
ءبىر كوسەمنىڭ «بىلگىشتىگى» ميللياردتاعان حالىقتى «اقىماق» قىلادى ەكەن! (لەنين، ماو، گيتلەر، ستالين، كيم ەر سەن، گورباچيەۆ، پۋتين ت.ب.). ءبىزدىڭ ەلباسى سولاردىڭ «بىلگىشتىگىنەن» ساق بولسا ەكەن – دەگەن، وي عوي...
* * *
زاڭدى جازاتىن ۇكىمەت، ونى بەكىتەتىن پارلامەنت. ال، سول زاڭدى ورىندامايتىن دا، بۇزاتىن دا بيلىكتەگىلەر مەن دەپۋتاتتار اراسىنان شىعادى ەكەن. نەگە سولاي ەكەن؟! – دەگەن، وي عوي...
* * *
ءبىز 25 جىلدا ءبىر كىسىدەن ءبارى قورقاتىن، بارىنەن ءبىر كىسى «قورقاتىن» ەل بولدىق. سوندا بىزدە دەموكراتيانىڭ جاعداي قالاي؟ – دەگەن، وي عوي...
* * *
20- عاسىردا «ەكى ادىم العا، ءبىر ادىم كەيىن»(لەنين)، «ۇلى سەكىرىس»(ماو)، «قايتا قۇرۋ» (گورباچيەۆ) جوسپارلارىنىڭ «قادامى دا»، «سەكىرىسى دە»، «قۇرۋى دا» قۇردىمعا كەتكەن ەدى. ءبىزدىڭ 21 – عاسىرداعى «100 قادامىمىز» جۇزەگە اسىپ، «ءجۇزىمىز جارىق» بولسا ەكەن – دەگەن، وي عوي...
* * *
جۇڭگو 51 كاسىپ ورىنىن قازاقستانعا كوشىرىپ اكەلمەكشى ەكەن. ەگەر ول كاسىپ ورىندار قىتايعا «قىپ – قىزىل» پايدا بەرىپ تۇرسا، «قۋ باستان قۋىرداق» جاسايتىن قىتايلار ول كاسىپ ورىنداردى «اكە- تاي»- دەپ، جالىنساڭ دا، قازاقستانعا اكەلمەيدى. ولار تۇرماق، «اڭقاۋ» قازاقتا ءسۇتتى سيىرىن نە ساتپايدى، نە ايىرباستامايدى. قالايشا ەسەپشىل جۇڭگو اياق استىنان «اقىماق» بولا قالدى – دەگەن، وي عوي...
* * *
ءبىز قازاقتار ەكى تىلدە وقىپ، 40 پايىزى انا ءتىلىن بىلمەيتىن حالگە جەتىپ، ماڭگۇرتەنىپ ەدىك. تاۋەلسىزدىك الساق تا، 25 جىل بويى زاڭىمىزدىڭ ءتۇپنۇسقاسى ورىسشا جازىلىپ، پرەزيدەنت، پارلامەنت، ۇكىمەت، بارلىق دەڭگەيدەگى اكىمدەر جينالىستارىن نەگىزىنەن مەملەكتتىك تىلدە ەمەس، كورشى مەملەكەتتىڭ تىلىندە جۇرگىزەتىن الەمدەگى بىردەن- ءبىر "اتاقتى" ەلمىز! مىنە مەكتەپ ءۇش تىلگە كوشتى! ەندى بىزگە اعىلشىن ءتىلى "اتا ءتىلى" بولا ما؟! - دەگەن، وي عوي...
ايمۇحانبەت بەيسەمبەكوۆ
