قىركۇيەك ايىندا «قامشى» پورتالىندا «قىزىلوردالىق پوليسەي كۇلىكبايەۆتىڭ كەسىرىنەن قىزمەتتەن قۋىلعانىن ايتادى» اتتى ماقالا جارىق كورىپ، وندا مەن ءوز باسىمنان وتكەن ءبىرقاتار جايتتاردى بايانداعان ەدىم.
وندا ايتىلعانداردى قىسقاشا قايتالاسام، جاز ايىندا الماتىدا ر. كۇلىكبايەۆ سالعان قىرعىن كەسىرىنەن ونىڭ تۇرعىلىقتى جەرى قىزىلوردا وبلىسى بايقوڭىر قالاسىنداعى ءىىم وكىلدىگىندە قىزمەت ەتىپ جۇرگەن ماعان جانە بىرنەشە پوليسيا قىزمەتكەرىنە كەسىرى ءتيدى. باسشىلىق ر. كۇلىكبايەۆتىڭ الماتىعا كەتكەنىن ءتيىستى ورىندارعا باياندامادىڭدار دەپ ايىپتاپ، مەنى قىزمەتتەن شەتتەتتى.
وسىعان بايلانىستى مەن ءبىرقاتار اقپارات قۇرالدارىنا حابارلاسىپ، ءوزىمنىڭ قىزمەتتەن قۋىلعانىمدى ايتىپ شاعىمداندىم. «ازاتتىق»، «قامشى» سايتتارىنىڭ جۋرناليستەرىنە بولعان جايدى بايانداپ ايتتىم. سونىمەن بىرگە، وكىلدىكتە كۇندەلىكتى قىزمەتتە بولاتىن كەيبىر جاعدايلارعا قاتىستى دا ءوز كوزقاراستارىمدى ءبىلدىرىپ، ءوزىم ادىلەتسىزدىك دەپ سانايتىن جايتتاردى كورسەتتىم. ماسەلەن، وكىلدىكتە قىزمەت اتقاراتىن ا. ماشراپوۆ پەن ا. ماماتوۆ دەگەن ازاماتتاردىڭ جول ەرەجەسىنە قاتىستى قۇقىقبۇزۋشىلىق جاساپ، بايقوڭىر قالاسىنداعى رەسەي فەدەراسياسى جول پوليسياسى قىزمەتكەرلەرى جازاعا تارتقانىن، جۇرگىزۋشى كۋالىكتەرىنەن ايرىلعاندارىن، الايدا، سوعان قاراماستان ولاردىڭ ق ر ءىىم بايقوڭىر قالاسىنداعى وكىلدىگىندە قىزمەت ەتىپ جۇرگەنىن ايتقان بولاتىنمىن. ولاردىڭ پوليسيا وكىلدىگىنىڭ باسشىسى ى. يسايەۆ پەن ونىڭ ورىنباسارى ب. قۇراقبايەۆقا تۋىستىق قاتىستارىنىڭ بولۋى مۇمكىندىگىن بۇرىن ەستيتىنمىن.
سول ماقالادا اتتارى اتالعان د. ماشراپوۆ پەن ا. ماماتوۆ مەنىڭ ۇستىمنەن بايقوڭىر قالالىق سوتىنا ارىز ءتۇسىرىپ، ماقالادا ايتىلعان جايتتاردى جوققا شىعارۋدى جانە كەشىرىم سۇراۋدى، موراللىق شىعىن رەتىندە 1 ميلليون تەڭگە ءوندىرىپ بەرۋدى سۇرادى. سوتتا تاراپتاردىڭ ويلارى تىڭدالدى.
سول سوت پروسەسسى بارىسىندا اتالعان ەكى قىزمەتكەر، ياعني، م. ماشراپوۆ: «2012 جىلعى 17 قىركۇيەكتە رف مەملەكەتىنىڭ سوتىنىڭ اكىمشىلىك قاۋلىسىمەن رف اقبك-نىڭ 12،26 بابىنىڭ 1 بولىگىندە كورسەتىلگەن جول ءجۇرۋ ەرەجەسىن بۇزعانى ءۇشىن تارتىپتىك جازاعا تارتىلعانىم (1 جىل 6 اي جۇرگىزۋشى كۋالىگىنەن ايىرىلعان) راس، ءبىراق تا اكىمشىلىك قۇقىق بۇزۋشىلىققا تارتقان بوتەن مەملەكەتتىڭ سوتىمەن، بوتەن ەلدىڭ زاڭىمەن تارتىلعان تارتىپتىك جازانىڭ كۇشى التى ايدان كەيىن زاڭدى كۇشى جويىلادى جانە قازاق ەلىنىڭ ازاماتى بولعاندىقتان، قازاقستان زاڭى بويىنشا جازاعا تارتىلعان ەمەسپىن، قازاقستان رەسپۋبليكاسىنىڭ نورماتيۆتىك زاڭدارىن بۇزعان بولىپ سانالمايمىن. سونىمەن قاتار، جۇرگىزۋشى كۋالىگىمدى جازاعا تارتۋ مەرزىمى ءوتىپ، قايتا العاننان كەيىن، 26.03.2015 جىلى وكىلدىكتە ەمتيحان تىركەۋ توبىنىڭ ينسپەكتورى لاۋازىمىنا تاعايىندالدىم، ونىڭ بارلىعى زاڭدى، سونىمەن مەنى جۇرگىزۋشى كۋالىگىمنەن ايىرىلعان كەزدە ماعان جازا تاعايىنداعان وكىلدىك باسشىسى ى. يسايەۆ ەمەس، ونىڭ ورىنباسارى گ. كيم بولاتىن» - دەپ، مەنىڭ جازعان ماقالامنىڭ كەيبىر جەرلەرى شىندىققا كەلمەيتىندىگىن ايتتى.
ال، ەكىنشىسى ا. ماماتوۆ: «01.01.2015 جىلى مەن بايقوڭىر قالاسىندا ءجۇرىپ رف اقبك-نىڭ 12.27 بابىنىڭ 2 بولىگىندە كورسەتىلگەن جول ءجۇرۋ ەرەجەلەرىن بۇزعاندىعىمدى جوققا شىعارمايمىن، راس. بۇل جونىندە وكىلدىكتىڭ جەكە قۇرامىندا تالقىلانىپ، سول كەزدەگى وكىلدىكتىڭ باستىعىنىڭ ورىنباسارى ق. اپپازوۆتىڭ بۇيرىعىمەن «قىزمەتىنە تولىق سايكەس ەمەس تۋرالى» تارتىپتىك جازاعا تارتىلعانمىن. ا. تۇرعانبايەۆتىڭ جازعان ارىزىندا، مەن جول كولىك وقيعاسىن جاساپ، اعاسى ب. قۇراقبايەۆتىڭ كومەگىمەن جازادان قۇتىلىپ، تەك «سوگىس» جازاسىن العان دەگەن سوزدەرىمەن كەلىسپەيمىن، ول مەنىڭ ۇستىمنەن جاسالعان جالا » - دەپ كورسەتتى.
مەن ءوز تاراپىمنان، سوتتا «قامشى» پورتالىنا جازعان ماقالامدا اتالعان ەكى قىزمەتكەردى وكىلدىك باسشىلارى ى. يسايەۆ پەن ب. قۇراقبايەۆتىڭ ارەكەتتەرىنە كەلىسپەيتىنىمدى بىلدىرە وتىرىپ، ادىلدىك تۇرعىسىنان مىسالعا كەلتىرگەنىمدى، اتالعان ەكى قىزمەتكەر ا. ماشراپوۆ پەن ا. ماماتوۆتى جەكە باسىنا ءتيىسىپ، نۇقسان كەلتىرۋدى كوزدەمەگەنىمدى ايتتىم. ءسويتىپ، سوتتا تاراپتار ىمىراعا كەلىپ، ءىس توقتاتىلدى. ىمىرا تالابىنا ساي، مەن جوعارىدا ايتىلعان ماقالانىڭ ا. ماشراپوۆ پەن ا. ماماتوۆ تۋرالى ايتىلعان تۇستارىن الىپ تاستاپ، باسشىلارىمنىڭ ادىلەتسىزدىگى تۋرالى ايتا كەلىپ ول ەكەۋىن مىسالعا كەلتىرگەنىم ءۇشىن كەشىرىم سۇرايمىن. قىزمەتكە قاتىستى ماقالا جازعاندا مەن ول ەكى قىزمەتكەردىڭ ار-وجدانىنا نۇقسان كەلتىرۋدى كوزدەمەدىم جانە ونداي ويىم جوق. مەنىڭ جانايقايىما قۇلاق اسىپ، اقپاراتتىق الاڭ ۇسىنعان "قامشى" پورتالى ۇجىمىنا العىسىم شەكسىز جانە اقپارات قۇرالى بۇل ماسەلەدە بەيتاراپتىق تانىتقانىن، ەشكىمنىڭ ار-وجدانىنا نۇقسان كەلتىرىپ نەمەس جالعان اقپارات تاراتپاعانىن ايتا كەتكىم كەلەدى. ال، ءوزىمنىڭ ءاۋ باستاعى شاعىمىما كەلەر بولسام، سول ۋاقىتتان بەرى ەشتەڭە وزگەرمەدى. پوليسيا وكىلدىگىنىڭ باسشىسى ى. يسايەۆ وسى كۇنگە دەيىن مەنى ناقتى ءبىر قىزمەتكە الماي وتىر. ايتەۋىر ءتۇبى ادىلدىك جەڭەدى دەگەن سەنىمىمنەن ايىرىلعان جوقپىن.
الماز تۇرعانبايەۆ
پىكىر قالدىرۋ