ساناۋلى كۇن بۇرىن ايتىس جاناشىرى ءجۇرسىن ەرمان الەۋمەتتىك جەلىدە جازبا جاريالاپ، ايتىستىڭ جاعدايى تۋراسىندا يمانعالي تاسماعامبەتوۆكە مۇڭىن شاققان ەدى. ەندى ءجۇرسىن ەرمان جەتەكشىلىك ەتەتىن WWW.AITYSKER.ORG سايتىنىڭ بايلانىس ءبولىمى جاۋاپتىسى، ايتىسكەر اقىن شۇعايىپ سەزىمحان ايتىستىڭ تەلەارنالاردان كورسەتىلمەي جاتقانىن جازىپ دابىل قاقتى. سالماقتى وي مەن سۇراققا تولى ماقالانى «قامشى» پورتالى دا وقىرمان نازارىنا ۇسىنادى.
بىلتىر ەلىمىزدىڭ تۇكپىر-تۇكپىرىندە رەسپۋبليكالىق جانە حالىقارالىق ون ءۇش ايتىس ءوتىپتى. وكىنىشكە وراي، سول ون ءۇش ايتىستىڭ بىرەۋى عانا ۇلتتىق ارنادان توبە كورسەتتى. ونىڭ ءوزىن «ءجۇنىن جۇلعان تاۋىقتاي» كۇيگە تۇسىرگەندەرىن كوزىمەن كورگەندەر ءبىز ايتپاي-اق جاقسى بىلەتىن شىعار. دەسە دە كورسەتپەگەننەن جاقسى عوي دەپ شۇكىرشىلىك ەتكەنىمىز دە ءجون-اۋ… ال قالعان 12 ايتىستىڭ كوپشىلىككە كوكجاشىك ارقىلى جول تارتپاۋىنىڭ ءمانىسىن ءبىز دە ۇققان جوقپىز، ايتەۋىر ەفيردەن الاستاتىلعانعا ۇقسايدى.
ناۋرىزدىڭ 12 كۇنى الماتىدا وتكەن «اسقاقتاي بەر الماتى» اتتى ايتىستى الماتى ارناسى تۇسىرگەن بولاتىن. تەلەديدارعا تەلمىرگەنىمىزدى قايتەيىك، كورسەتكەن جوق.
شىلدەنىڭ التىسىنداعى استانانىڭ ءتول مەرەكەسىنە وراي وتكەن «باعانالى وردام- باستى وردام» اتتى ايتىستى تۇسىرگەن «حابار» ارناسىنىڭ سول كەزدەگى ديرەكتورى رينات دۋمان ۇلى كەرتايەۆ: «ايتىستى جاقىندا «حابار» ارناسىنان كەسپەي، قيماي تولىق كورسەتەتىن بولامىز» دەگەن ۋادەسىندە تۇرعان جوق. ول ايتىس تا ەفيردەن عايىپ بولدى.
جەلتوقساننىڭ 3-4 كۇنى الماتى قالاسىندا جىلدىڭ قورىتىندى «التىن دومبىرا» ايتىسى ءوتتى. بۇل ايتىستى تۇسىرۋگە ەش تەلەارنا ىقىلاس تانىتپاعان سوڭ الماتى قالاسى اكىمشىلىگىنىڭ ءوتىنىشى بويىنشا «ەۋرازيا» تەلەارناسى ءتۇسىرىپ، 31 جەلتوقسان مەن 1-2 قاڭتار كۇندەرى كورسەتەمىز دەگەن بولاتىن. جارنامامەن سولاي جار سالعانىمەن، قالىڭ قازاق تاعى دا ءماسساعان، «مەن الداندىم» دەگەندەي تاعى ءبىر سانىن سوعىپ قالا بەردى. ەڭ سوراقىسى، بۇل جولى بەرىلەتىن ايتىستىڭ ۋاقىتىندا ايتىس ەمەس، ايتىستىڭ ورنىنا كوگىلدىرلەر كولبەڭدەپ كونسەرت بەردى. بۇل سوندا ايتىستى مازاق قىلۋ ما نە؟
قىتايدا قازاق تىلىندەگى حابار تاراتاتىن «شىڭجان 3» جانە «شىڭجان 8» تەلەارنالارى مەن «شىڭجان حالىق راديوسى»، ارعى بەتتەگى اعايىندار اراسىندا وتكەن ايتىستاردى مىندەتتى تۇردە كورسەتىپ وتىرادى ەكەن. ال ءوز ەلىمىزدە ءتول ونەرىمىزدى اسپەتتەۋدىڭ ورنىنا، تەلەارنا بىتكەن ايتىس دەسە ات توڭىن الا قاشادى. وسىنشاما ءتول ونەردەن بەزەتىندەي باسىمىزعا نە كۇن تۋدى؟! نەنى اسىرا سىلتەپ ايتىپ قويىپ ەدىك؟ باسقاسىن ايتپاعاندا «قازاقتىڭ قۇلاعى»، «ۇلتتىڭ ءۇنجارياسى» دەپ جۇرگەن «قازاق» راديوسى دا ايتىستان ىرگەسىن اۋلاق سالدى. بىلتىر ايتىس «يۋنەسكو-نىڭ مادەني مۇرالار تىزىمىنە ەندى»،- دەپ الەمگە جار سالدىق. ءبىراق سودان ايتىستىڭ كوسەگەسى كوگەرگەنى شامالى. سوندا بۇگىنگى تاڭدا كوگىلدىر ەكرانعا ەنۋ ءۇشىن، ادام تۇسىنبەيتىن سوزدەرگە جازىلعان ءان سالىپ، ماقتاۋ مەن ماداقتاۋلار ايتۋ كەرەك پە؟ ايتپەسە ون ءۇش ايتىستىڭ بىرەۋى عانا جارىققا شىعاتىنداي ايتىس جەرگە قاراپ تۇرعان جوق ەدى عوي. جوق الدە، ولگەن سوڭ ۇلىلارى تۋرالى اۋىز تولتىرىپ ايتاتىن باعدارلاما اشىپ جوقتاۋعا كىرىسەتىن تەلەارنالارعا ايتىس تا مىندەتتى تۇردە «قايتىس» بولۋى كەرەك پا؟
شۇعايىپ سەزىمحان، ايتىسكەر اقىن
