وڭتۇستىك قازاقستان وبلىسىندا 2 قاباتتى جەكە باراق ءتارىزدى تۇرعىن ءۇي وپىرىلىپ قۇلادى. بۇل تۋرالى قازاقپارات جازدى.

وقىس وقيعادان قازا تاپقاندار بار، دەپ حابارلايدى وبلىستىق تجد-نىڭ باسپا ءسوز قىزمەتى. باستاپقى نۇسقا بويىنشا، گاز-اۋا قوسىندىسى جارىلعان. «8 قاڭتاردا ساعات 03-55-تە وقو تج دەپارتامەنتىنىڭ شۇعىل كەزەكشىلەرىنە الدىن الا گاز-اۋا قوسىندىسىنىڭ جارىلىسىنان باراق تارىزدە سالىنعان 2 قاباتتى جەكە تۇرعىن ءۇيدىڭ وپىرىلىپ قۇلاۋى تۋرالى حابار كەلىپ تۇسكەن. قيراۋدىڭ كولەمى 64 شارشى مەتردى قۇرادى.   ساعات 04.07-دە وقيعا ورنىنا ءبىرىنشى بولىپ جەدەل-قۇتقارۋ جاساعىنىڭ قۇتقارۋ بولىمشەسىنىڭ 11 قىزمەتكەرى جانە 2 تەحنيكا كەلىپ جەتتى. اۆاريالىق-قۇتقارۋ جۇمىستارىن جۇرگىزۋ كەزىندە ءۇيىندىنىڭ استىنان 4 ادام شىعارىلدى، ولاردىڭ ىشىندە ۇشەى اۋرۋحاناعا جەتكىزىلدى، 1 ادام اۋرۋحاناعا بارۋدان باس تارتتى.. ساعات 04.25-تە ءۇيىندىنىڭ استىنان ءبىرىنشى بولىپ 2015 جىلعى ءسابي تابىلىپ، شىعارىلدى. ساعات 04.28-دە بالانىڭ اكەسى ءۇيىندىنىڭ استىنان شىعارىلدى، 4 مينۋتتان كەيىن اناسىنىڭ مۇردەسى شىعارىلدى. ساعات 04.32-دە 1 ادام تابىلدى. ساعات 04.53-تە تاعى 1 ادام تابىلىپ، شىعارىلدى»، دەلىنگەن حابارلامادا.

دەپارتامەنتتىڭ باسپا ءسوز قىزمەتىنىڭ حابارلاۋىنشا، قۇتقارۋ جۇمىستارىنا تجد-نىڭ 23 قۇتقارۋشىسى جانە 3 تەحنيكا، جەدەل-قۇتقارۋ جاساعىنىڭ 44 قىزمەتكەرى جانە 6 تەحنيكاسى (ونىڭ ىشىندە 3 ءيىسشىل يتپەن ءۇش كينولوگيالىق جاساق، 1 مەديكالىق-پسيحولوگيالىق قىزمەت مامانى)، ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ 17 ادامى جانە 4 تەحنيكاسى، مەديسينا اپاتتار ورتالىعىنىڭ 3 قىزمەتكەرى، قۇرامىندا 16 ادام جانە 4 تەحنيكاسىمەن جەدەل مەديسينالىق قىزمەتىنىڭ قىزمەتكەرلەرى تارتىلعان. وبلىستىق ءىىد قىزمەتكەرلەرى وقيعا ورنىن قورشاۋعا الىپ، ەنەرگەتيكا جانە گاز شارۋاشىلىعىنىڭ قىزمەتكەرلەرى تۇرعىن ءۇيدى ەلەكتر قۋاتى مەن گازدان اجىراتتى. 

ايتا كەتەر بولساق، جىلدىڭ العاشقى كۇنى قاراعاندى وبلىسىندا دا تۇرعىن ءۇي قۇلاپ، 9 ادام قازا تاپقان ەدى. ءۇيدىڭ قۇلاۋ سەبەبى رەتىندە جىلۋ قازاندىعى اقاۋى اتالعان ەدى.