وتكەن جىلى رەسپۋبليكالىق ونوماستيكالىق كوميسسيا 4 رەت باس قوسىپ، يدەيالوگيالىق تۇرعىدان ەسكىرگەن 147 كوشەنى، 32 مەكتەپ پەن مادەنيەت ءۇيىن، 85 تەمىرجول ستانسياسىن قازاقشالاعان. سوعان قاراماستان ءالى كۇنگە دەيىن لەنيننىڭ اتىندا 352 كوشە بار. بۇدان بولەك سولتۇستىك وڭىردە 650 ەلدىمەكەن اتاۋىنىڭ تەك 35%-ى عانا قازاقشالانعان دەپ حابارلايدى «قازاقستان» ۇلتتىق ارناسىنىڭ جاڭالىقتار قىزمەتى. 

ەسكىرگەن كوشە اتاۋلارى ازايار ەمەس.  ق ر مادەنيەت جانە سپورت مينيسترلىگىنىڭ ونوماستيكالىق بازاسىندا ەلدىمەكەن، كىتاپحانا، مەكتەپ پەن مادەنيەت ءۇيى سەكىلدى نىسانداردى ايتپاعاندا، لەنين اتىنداعى 352 كوشە بار ەكەن. ال قازاقستاندا «وكتيابر» اتىندا 275 كوشە، ال «سوۆەتسكيي» اتىنداعى 267 كوشە تىركەلگەن. بۇل كوشەلەردىڭ اتاۋى كوبىنەسە قوستاناي، سولتۇستىك قازاقستان وبلىسى جانە شىعىس قازاقستان وبلىستارىندا ءجيى كەزدەسەدى.

رەسمي مالىمەت بويىنشا قوستاناي قالاسىنىڭ تەك 15%-ى، پەتروپاۆل قالاسىنىڭ 12%-ى، شىعىس قازاقستان وبلىسى كوشەلەرىنىڭ 18%-ى قازاقشالانعان. باستى سەبەپ،  ەلىمىزدە 7 جىل كولەمىندە موراتوريي بولعان. ەكىنشىدەن، ەلدىمەكەندە كوشەنىڭ اتاۋىن اۋىستىرۋ كەزىندە داۋىس بەرۋ كەزىندە ازاماتتار قارسىلىق بىلدىرۋدە. وسى سەبەپتى  كوپتەگەن كوشە اتاۋلارى اۋىستىرىلماي قالادى» دەلىنگەن سيۋجەتتە. ايتا كەتەيىك، كەڭەستىك ءداۋىر كوسەمىنىڭ اتىمەن اتالعان كوشەلەر قىزىلوردا، وڭتۇستىك قازاقستان وبلىسى، جامبىل، اتىراۋ مەن ماڭعىستاۋ وبلىستارىندا مۇلدەم جوق ەكەن.