الماتى قالالىق سوتى «فەنيكس» ءفيلمىنىڭ رەجيسسەرى تالعات جانىبەكوۆتى قاماۋ مەرزىمىن ۇزارتتى دەپ، حابارلايدى Today.kz ءتىلشىسى. ۇستالعان رەجيسسەردىڭ ادۆوكاتى سەرىك ايتبايەۆتىڭ ايتۋىنشا، سۋديا شاعىمنان باس تارتۋعا شەشىم قابىلداعان.

قورعاۋشىنىڭ ايتۋىنشا، تەرگەۋ 23 قاڭتارعا دەيىن ۇزارتىلدى.

«ءبىز باعالاۋ تۋرالى ەسەپتىڭ ءتۇپنۇسقاسىن ۇسىندىق. كەپىلدەگى مۇلىك اۋىرتپالىعىنىڭ جوق ەكەندىگى تۋرالى تۇزەتۋ، كەپىل بەرۋشىنىڭ جازباشا كەلىسىمى، اۋىل اكىمىنىڭ جازباشا مىنەزدەمەسى، اۋىل تۇرعىندارىنان مىنەزدەمە. سۋديا بۇل قۇجاتتاردىڭ بارلىعى ءىستى جەڭىلدەتەدى دەپ وتىر. ولار اقىلداسا كەلە، شاعىمنان باس تارتۋعا شەشىم قابىلدادى. ونىڭ سەبەبىن بىزگە حابارلاعان جوق. بەس جۇمىس كۇنىنىڭ ىشىندە قاۋلىنىڭ شىعاتىندىعىن ايتتى. ءبىراق، سانكسيالانعان قاماۋ ەكى ايعا دەيىن كۇشىندە قالادى. بىزگە اكىم مىنەزدەمە بەردى. وسى ۋاقىتقا دەيىن ەشقانداي كۇدىكتى مۇنداي انىقتاما اكەلگەن جوق. بۇل ادام اۋىلدا بۇرىننان بەرى تۇرادى. ول ءۇش بالا تاربيەلەپ وتىر. ءتورت ايلىق بالاسى جانە كارى شەشەسى بار. ەگەر ول تەرگەۋدەن قاشىقىسى كەلسە، باياعىدا-اق كەدەرگى كەلتىرىپ، كەتىپ قالار ەدى. كۇنىنە ەكى رەت تەرگەۋگە بارىپ ءجۇردى. ونىڭ قاماۋعا نە ءۇشىن الىنعانىن بىلمەيمىن. رەسمي سەبەبى – تەرگەۋگە كەدەرگى كەلتىرگەن. بۇگىن تەرگەۋدىڭ 23 قاڭتارعا دەيىن ۇزارتىلعانى بەلگىلى بولدى»،-دەدى سەرىك ايتبايەۆ.

تالعات جانىبەكوۆتىڭ ۇستالۋى

28 جەلتوقساندا، ۇستالعان تالعات جانىبەكوۆ اسا ءىرى مولشەردە مەملەكەت مۇلكىن جىمقىردى دەگەن كۇدىكپەن ايىپتالىپ وتىر. تەرگەۋدىڭ اقپاراتى بويىنشا، الماتى قالاسىنىڭ سىبايلاس جەمقورلىققا قارسى ءىس-قيمىل ۇلتتىق بيۋروسى دەپارتامەنتىنىڭ قىزمەتكەرلەرىمەن تالعات جانىبەكوۆ ق ر قك-نىڭ  189 بابىنىڭ 4-بولىگى 2-تارماعى بويىنشا (سەنىپ تاپسىرعان اسا ءىرى كولەمدەگى بوتەن مۇلىكتى قىلمىستىق توپپەن يەمدەنىپ الۋ نەمەسە جىمقىرۋ) كىنالى دەپ تانىلىپ، قىلمىس ۇستىندە ۇستالدى. 29 جەلتوقساندا بەلگىلى بولعانداي، تالعات جانىبەكوۆ 28 اقپانعا دەيىن قاماۋعا الىندى.

رەجيسسەردى ايىپتاۋ

ەستەرىڭىزگە سالايىق، «فەنيكس» فيلمىنە بايلانىستى جاعداي سوتتىڭ تالقىلاۋىنا تۇسكەن بولاتىن. اتاپ ايتقاندا، استانا قالاسىنىڭ سارىارقا اۋداندىق سوتىندا ق ر مادەنيەت جانە سپورت ءمينيسترى ارىستانبەك مۇحامەديۇلىنى اقشا بوپسالادى دەپ كىنالاعان تالعات جانىبەكوۆكە قاتىستى قىلمىستىق ءىس قارالعان. رەجيسسەردىڭ ايتۋىنشا، ءمينيستردىڭ كەسىرىنەن «فەنيكس» اتتى فانتاستيكالىق ءفيلمىن ءتۇسىرۋ جۇمىستارى توقتاپ قالعان.

Today.kz رەداكسياسىنا بەرگەن ەكسكليۋزيۆتى سۇحباتىندا ا. مۇحامەدي ۇلى شيەلەنىسىپ جاتقان جاعدايدى ونىڭ بەدەلىن ءتۇسىرۋ ارقىلى لاۋازىمىنان ايىرۋعا باعىتتالىپ ۇيىمداستىرىلعان كامپانيامەن بايلانىستىردى. ءمينيستردىڭ پىكىرىنشە، ايىپتىلار تاراپىنان كوتەرىلگەن بايبالام – بيۋدجەتتىك قاراجاتتى ۇرلاعاندارى ءۇشىن جاۋاپكەرشىلىكتەن قۇتىلۋدىڭ امالى.

ءمينيستردىڭ ادۆوكاتى ەسكەندىر الىمبايەۆتىڭ ايتۋىنشا، ت. جانىبەكوۆتىڭ ايىپتارى شىندىققا جاناسپايدى. زاڭگەر «فەنيكس» ءفيلمىن قويۋشىنىڭ مينيسترگە تاعىپ وتىرعان ايىپ-شاعىمدارى كۇماندى مالىمەتتەرگە سۇيەنگەندىگىنەن، سوتتا دالەلدەنبەي، تەرىسكە شىعارىلىپ وتىرعاندىعىن ايتتى.

بۇعان دەيىن رەسەي كينەماتوگرافيستەرى وداعى ءتوراعاسىنىڭ ورىنباسارى ولەگ يۆانوۆ ايىپ تاعىلعان مينيسترگە اراشا ءتۇستى.

21 قازاندا، وسى كۇندەرى «وسكار» سىيلىعىنىڭ نومينانتى بولىپ جۇرگەن بەلگىلى رەجيسسەر ەرمەك تۇرسىنوۆ تا ارىستانبەك مۇحامەديۇلىنا قاتىستى وقيعالار بويىنشا ءوز پىكىرىن بىلدىرگەن. ول «فەنيكس» ءفيلمىنىڭ تيزەرىن ساراپتاي كەلە، ونىڭ ەسكىلىك جولمەن ءتۇسىرىلىپ، بۇرىنعىنى قايتالاعان ستۋدەنتتىڭ كۋرستىق جۇمىسى دەڭگەيىندە جاسالعان دۇنيە دەپ، تومەن باعا بەردى. رەجيسسەر تۇسىرىلگەن تيزەردىڭ قۇنى بولىنگەن قاراجاتقا سايكەس ەمەستىگى مەن مۇحامەديۇلىنا توپ بولىپ ورىنسىز ايىپ تاعۋدى قولدامايتىنىن ايتتى.  

24 قازاندا Today.kz تۇڭعىشباي جامانقۇلوۆ پەن «قازاقفيلم» كينوستۋدياسىنىڭ بۇرىڭعى باسشىلارىنىڭ ءبىرى گاۋحار ىسقاقوۆاعا قاتىستى سوتقا دەيىنگى تەرگەۋدىڭ جۇرگىزىلە باستاعانى تۋرالى حابارلاعان.

25 قازان كۇنى ق ر مادەنيەت جانە سپورت ءمينيسترى ارىستانبەك مۇحامەديۇلىعا جالا تاعۋ جونىندەگى ءىس بويىنشا سوت تالعات جانىبەكوۆتى ايىپتى دەپ تاۋىپ، وعان ق ر قىلمىستىق كودەكسىنىڭ 130 بابىنىڭ 3 تارماعىنا سايكەس 500 ايلىق ەسەپتىك كورسەتكىش كولەمىندە ايىپپۇل تاقتى. سوت شەشىمى بويىنشا پىكىر بىلدىرگەن مينيستر ا. مۇحامەدي ۇلى ت. جانىبەكوۆكە قاتىستى اۋىر جازانىڭ قولدانىلماۋىنا قولىنان كەلگەن بار امالدىڭ قولدانعانىن اتاپ وتكەن بولاتىن. 

2 قاراشادا، تۇڭعىشباي جامانقۇلوۆ 60 ميلليون تەڭگە جىمقىرعان دەگەن كۇدىكپەن ۇستالعان بولاتىن. ەكى كۇن وتكەن سوڭ، جامانقۇلوۆ ءوزىنىڭ قورعاۋشىسىنىڭ قاتىسۋىمەن، بيۋدجەتتىك قاراجاتتى ۇرلاعانىن مويىنداپ، كەلتىرىلگەن زالالدى وتەۋگە مىندەتتەندى.

5 جەلتوقساندا، «فەنيكس» ءفيلمىن تۇسىرۋگە بولىنگەن بيۋدجەتتىك قاراجاتتىڭ ۇرلانۋىنا بايلانىستى كوتەرىلگەن ءىس بويىنشا، قارجىنى وتەۋ شارالارى باستالدى. بۇل تۋرالى سىبايلاس جەمقورلىققا قارسى ءىس-قيمىل ۇلتتىق بيۋروسى Today.kz  رەداكسياسىنىڭ رەمي ساۋالىنا جاۋاپ بەردى.