قازاقستان رەسپۋبليكاسىنىڭ ۇلتتىق ەكونوميكا ءمينيسترى قىزمەتىن اتقارىپ، ەكى اپتا بۇرىن قىزمەتتەن كەتكەن قۋاندىق بيشىمبايەۆ تۇتقىندالدى. بۇل تۋرالى جەمقورلىققا قارسى ۇلتتىق بيۋرو حابارلادى. 

مالىمدەمەدە ەكس-مينيستردىڭ قوماقتى كولەمدە پارا الىپ، جەكە ماقساتقا جۇمساعانى ءۇشىن تۇتقىندالعانى ايتىلعان.

بيشىمبايەۆ ق ر قپك 128-بابىنا سايكەس، استانا قالالىق ءىىد ۋاقىتشا ۇستاۋ وقشاۋلاعىشىنا قامالدى.

ول، 28 جەلتوقسان كۇنى قىزمەتتەن بوساتىلدى. ول بۇل قىزمەتتە 8 اي عانا بولعان. قۋاندىق بيشىمبايەۆ ۇلتتىق ەكونوميكا ءمينيسترى قىزمەتىنە دەيىن "بايتەرەك" حولدينگىن باسقارعان.

17 قاراشادا "بايتەرەك DEVELOPMENT" اق باسشىلارى ۇستالعان بولاتىن. سىبايلاس جەمقورلىققا قارسى ءىس-قيمىل ۇلتتىق بيۋروسى "بايتەرەك DEVELOPMENT" اق باسشىسىنىڭ پارا الۋ دەرەگىنە قاتىستى سوتقا دەيىنگى تەرگەۋ جۇمىستارىن جۇرگىزگەن ەدى. تەرگەۋ بارىسىندا "بايتەرەك DEVELOPMENT" اق لاۋازىمدى جاقىپوۆ ا. (باسقارما ءتوراعاسىنىڭ ورىنباسارى)، ايتىمبەتوۆ ب. (مەملەكەتتىك-جەكەمەنشىك سەرىكتەستىك ديرەكسياسى دەپارتامەنتىنىڭ باسشىسى) جانە سارييەۆ ع. (باسقارۋشى ديرەكتور) ەسىمدى لاۋازىمدى تۇلعالار جۇيەلى تۇردە "نۇرلى جول" مەملەكەتتىك باعدارلاماسى اياسىندا جالدامالى تۇرعىن ءۇي كەشەنىن ساتۋ قىزمەتتەرىن كورسەتەتىن قۇرىلىس كومپانيالارىنان ءىرى كولەمدە پارا العانى انىقتالدى.

ايتا كەتەر بولساق، 30 جەلتوقسان كۇنى پرەزيدەنت نازاربايەۆ بۇرىنعى ەكونوميكا ءمينيسترى قۋاندىق بيشىمبايەۆقا قاتىستى تەرگەۋ شارالارى جۇرگىزىلىپ جاتقانىن ايتقان ەدى. 

ەسكە سالساق، 1980 جىلدىڭ تۋماسى، جاس كادرلار وكىلى بولعان بيشىمبايەۆ «بولاشاق» باعدارلاماسى بويىنشا دج. ۆاشينگتون ۋنيۆەرسيتەتىن بىتىرگەن.