قازاقستاندىق بوكسشى قانات يسلام (22-0، 18 كو) ءبىرىنشى ورتا سالماقتا WBO تۇجىرىمى بويىنشا الەم چەمپيونى ساۋل «كانەلو» الۆارەستىڭ (48-1-1، 34 كو) قارسىلاسى بولۋى مۇمكىن.

Fightnews.com سايتى جازۋىنشا، مۇنداي قاۋەسەت بوكسسۇيەر قاۋىمنىڭ اراسىندا تارالىپ جاتىر-مىس. سول قاۋەسەتكە سەنسەك، الۆارەس - يسلام جەكپە-جەك 6 مامىردا تەحاستاعى "داللاس كوۆبويز" ستاديونىندا ءوتۋى مۇمكىن دەلىنەدى. ارەنا 80 مىڭ ادامعا ارنالعان.

الۆارەس پەن يسلام WBO بەلبەۋىنە تالاسۋى مۇمكىن. وتانداسىمىز بۇل ۇيىمنىڭ رەيتينگىندە بەسىنشى تۇر.

ايتا كەتەيىك، 26 جاستاعى الۆارەس ورتا سالماقتا WBC، WBA، IBF جانە IBO بەلبەۋلەرىنىڭ يەسى قازاقستاندىق گەنناديي گولوۆكيننىڭ (36-0، 33 كو) قارسىلاسى بولۋى مۇمكىن. 2017 جىلى مەكسيكالىق GGG-نىڭ سالماق دارەجەسىنە كوتەرىلۋدى جوسپارلاپ وتىر.

ەسكە سالساق، قانات يسلام وتكەن جىلعى سۇحباتتارىنىڭ بىرىندە شارشى الاڭدا مەكسيكالىق بوكسشى، WBC تۇجىرىمى بويىنشا 2015 جىلعى بريلليانت بەلدىكتىڭ يەگەرى ساۋل الۆارەسپەن جۇدىرىقتاسۋدى قالايتىنىن ايتقان ەدى..

«شىن مىقتىمەن ايقاسقاندا عانا، ءوزىڭنىڭ مىقتىلىعىڭدى دالەلدەي الاسىڭ. بوكستا جۇرگەنىمە تالاي جىل بولدى. ول جاساعان سوققىنى مەن دە جاسايمىن. مەن ونىمەن كەزدەسەمىز دەپ ويلايمىن جانە الداعى ۋاقىتتا ول مايدان بولادى دەپ سەنەمىن»،- دەگەن ەدى قانات يسلام.