قىتايلىق عالىمدار ايدان گەليي يزوتوبىن ءوندىرىپ، ونى الداعى ۋاقىتتا تەرمويادرولىق رەاكتورلاردا قولدانباقشى. عالىمداردىڭ ايتۋى بويىنشا بۇل ءادىس قىتايدىڭ ەنەرگيا قاجەتتىلىگىن تولىقتاي قامتاماسىز ەتەدى، - دەپ حابارلايدى Baq.kz

عالىمدار كۇندەگى تەرمويادرولىق رەاكسيالاردىڭ سالدارىنان پايدا بولىپ، كەيىننەن عارىشتا سەيىلىپ كەتەتىن گەليي-3 يزوتوبىنان ەنەرگيا الۋدى كوزدەپ وتىر. گەليي-3 جەرگە تۇسپەيدى، سەبەبى جەردىڭ قالىڭ اتموسفەرالىق قاباتى ونىڭ وتۋىنە كەدەرگى جاسايدى. ال ايدا گەليي-3 اي توزاڭىمەن ارالاسىپ سوندا قالادى. عالىمدار بۇل باعالى قوسپا ايدا 10 ميلليون تونناعا جەتەدى دەيدى. اي توزاڭىنان گەلييدىڭ يزوتوبىن جىلىتۋ ارقىلى ءبولىپ الىپ، ارتىنشا ول گازدى جەرگە جىبەرۋ كوزدەلۋدە. گەليي -3ء-تى ءوندىرۋ باعدارلاماسى بويىنشا جۇمىس ىستەپ جاتقان قىتايلىق مامانداردىڭ جۇرگىزگەن ەسەپتەرىنە سۇيەنسەك گەلييدىڭ 0،02 گراممى مۇنايدىڭ باررەلىنە تەڭ ەنەرگيا ءبولىپ شىعاراتىن كورىنەدى. اتالمىش توپتىڭ جەتەكشىسى ايداعى گەليي يزوتوبى جەر تۇرعىندارىن الداعى 10 مىڭ جىلعا ەنەرگيامەن قامتاماسىز ەتۋگە جەتەتىندىگىن ايتىپ وتىر. بۇگىنگى كۇنى جۇڭگو الەمدەگى ەڭ ءىرى ءوندىرۋشى جانە ەنەرگيانى قولدانۋشى ەل بولىپ وتىر. جۇڭگو ۇكىمەتى قورشاعان ورتانى قورعاۋ ماسەلەسىنە اسا ۇقىپتىلىقپەن قاراپ، ونىڭ جۇمىسىن كۇشەيتۋدى مەملەكەتتىڭ نەگىزگى ساياساتىنا دا ەنگىزىپ قويعان.

قامشى-اقپارات