سيريالىق رەتتەۋ جونىندەگى حالىقارالىق كەزدەسۋ (استانا پروسەسى) بارىسىندا باتىستان كەلگەن ديپلوماتتار كەزدەسۋدىڭ ناتيجەسىن Rixos قوناق ءۇيىنىڭ بارىندا وتىرىپ كۇتۋگە ءماجبۇر بولعان دەپ جازىپتى Financial Times. kazinfo.today سايتى پۋبليكاسيانى ورىسشاعا اۋدارعان بولاتىن. ەلىمىزدىڭ ساياسي بەدەلىنە قاتىستى دۇنيەنىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.

«ءبىز ءوزىمىزدى ويىن-ساۋىق كەشكە شاقىرىلماعان قوناق رەتىندە سەزىنۋدەمىز... جان-جاعىمىزدا نە بولىپ جاتقاننان بەيحابارمىز»، — دەپتى ءبىر ديپلومات. «بۇگىنگى تاياۋ شىعىس ديپلوماتياسى رەسەيگە ءجىپسىز بايلانىپ وتىر. رەسەي نە دەسە، سول بولادى» دەگەن سويلەم كەزدەسەدى ماتەريالدا. رەسەي، تۋرسيا، يراننىڭ قاتىسۋىمەن وتكەن كەلىسسوز بارىسى جابىق فورماتتى وتكىزىلدى. باسىلىم جۋرناليستەرى ماسكەۋ مەن انكارانىڭ جاقىنداسۋىنا بايلانىستى اقش-تىڭ جيىنعا قاتىسپاعانىن ەرەكشە اتاپ ءوتتى.

استاناعا ۆاشينگتون ارنايى وكىل جىبەرمەگەن. قازاقستانداعى اقش-تىڭ ەلشىسى ديسكۋسسيا بارىسىن باقىلاپ وتىرعان. سيريالىق وپپوزيسيونەرلەردىڭ بىرەۋى «اقش پەن باتىس بىزگە ەشقاشان شىنايى كومەك قولىن سوزعان ەمەس. ءقازىر ولار قايدا، قاراڭىزدارشى؟ بۇرىشتان سىعالاپ قاراپ وتىر» دەپتى.

ناسر حاريري وپپوزيسياسىنىڭ دەلەگاتى بولسا «سيرياعا ىقپالى بار مەملەكەتتەر شىن مانىسىندە بەلگىلى ءبىر ناتيجەگە قول جەتكىزگىلەرى كەلەتىن سياقتى. سونداي سەزىم تۋىندادى» دەپ سويلەدى.

ەستەرىڭىزگە سالا كەتەيىك، 23-24 قاڭتار كۇندەرى استانا قالاسىندا سيريا ۇكىمەتى مەن وپپوزيسيا وكىلدەرىنىڭ قاتىسۋىمەن كەلىسسوز جۇرگىزىلگەن بولاتىن. ۇيىمداستىرۋشى – رف پرەزيدەنتى ۆلاديمير پۋتين. ماسەلەنى تالقىلاۋ بارىسىندا رەسەي، تۇركيا، يران سوعىستى توقتاتۋ رەجيمىن باقىلايتىن ءۇش جاقتى مەحانيزم قۇراتىن بولىپ ۋادەلەستى.  بىتىمگە كەلۋ رەجيمى 2016 جىلدىڭ 30 جەلتوقسانىندا حابارلانعان بولاتىن. بۇل ۋاعدالاستىقتىڭ تەرروريستىك ۇيىمدارعا قاتىسى جوق.

كرەمل بولسا، استانا پروسەسى ءساتتى ءوتتى دەپ باعا بەرىپ وتىر. بۇل ءوز كەزەگىندە جەنيەۆالىق كەلىسسوزدەر پروسەسىن جانداندىرۋعا سەپ بولادى دەدى رف پرەزيدەنتىنىڭ باسپا ءسوز حاتشىسى دميتريي پەسكوۆ.