28ء-شى دۇنيەجۇزىلىك قىسقى ۋنيۆەرسيادانىڭ اشىلۋ سالتاناتىنا قازاقستان رەسپۋبليكاسىنىڭ ارنايى قوناعى بىرىككەن اراب امىرلىكتەرىنىڭ ۆيسە-پرەمەرى، پرەزيدەنت ىستەرى ءمينيسترى مانسۋر يبن زايد ان-ناحاييان بولدى، - دەپ حابارلايدى Tengrinews.kz ءتىلشىسى.
اشىق دەرەككوزدەردىڭ مالىمەتىنشە، شەيح مانسۋر 1970 جىلدىڭ 20 قاراشاسىندا دۇنيەگە كەلگەن. بىرىككەن اراب امىرلىكتەرىنىڭ ۆيسە-پرەمەرى جانە پرەزيدەنت ىستەرى ءمينيسترى. ابۋ-دابي امىرلىگىنىڭ باسقارۋشى كورولدىك وتباسىنىڭ مۇشەسى. دۋباي بيلەۋشىسى شەيح موحاممەد ال-ماكتۋمنىڭ قىزىن العان. سونداي-اق، ونىڭ Virgin Galactic جانە Sky News Arabia كومپانيالارىندا ۇلەسى بار ءارى ءباا حالىقارالىق مۇناي ينۆەستيسيالىق كومپانياسىن باسقارادى.
سونداي-اق، شەيح مانسۋر City Football Group كومپانياسىنىڭ باسشىسى، بۇل كومپانياعا "مانچەستەر سيتي"، "مەلبۋرن سيتي" جانە "نيۋ-يورك سيتي" فۋتبول كلۋبتارى كىرەدى. "ءال-جازيرا" سپورت قوعامىن باسقارادى. بۇل قوعامدا فۋتبول، ۆولەيبول، گاندبول جانە باسكەتبول كلۋبتارى بار.
