گەرمانيا بيلىگى بوسقىنداردىڭ وتانىنا قايتۋ ءۇشىن €1200 تولەيدى دەپ حابارلايدى izvestia.ru. وسىلايشا بوسقىنداردى ۇيىنە قايتۋعا ۇگىتتەمەك.

گەمانيانىڭ ءىىم «باستاپقى كومەك پليۋس» اتتى جاڭا باعدارلاماسىن جاسادى. ونى قارجىلاندىرۋ ءۇشىن  €40 ملن. ءبولىندى.

باعدارلاما 2017 جىلدىڭ 1 اقپانىنان باستاپ ىسكە قوسىلدى. ول بويىنشا 45 ەلدىڭ ميگرانتتارى قامتىلادى. باعدارلامانىڭ نەگىزى – بوسقىنداردىڭ ءوز ەركىمەن وتانىنا ورالۋى.

قارجىلىق كومەك 12 جاستان جوعارى ازاماتتارعا قاراستىرىلعان. قارجى اۋدارۋ ەكى كەزەڭنەن تۇرادى. العاشقىسىن گەرمانيادان كەتىپ بارا جاتقاندا، قالعان بولىگىن وتانىندا 6 اي تۇرعاننان كەيىن بەرەدى.

ميگراسيالىق ساياسات ساراپشىسى كاتارينا ەندەرس اتالمىش باعدارلامانىڭ كۇماندى تۇستارى كوپ ەكەنىن ايتادى.

«بوسقىنداردىڭ ءوز ءۇيىن، وتانىن تاستاپ كەلۋىنىڭ سەبەبىن ەسكەرۋ كەرەك. بۇل كەدەيشىلىك، ەرتەنگى كۇنگە سەنىمسىزدىك، سوعىس پەن شەكتەۋلەر. ءبىر رەتتى تولەم، ولاردىڭ وتانىنان ورالعاننان كەيىنگى ماسەلەلەرىن شەشە المايدى. كوپتەگەن بوسقىندار ەۋروپا ەلىنە كەلۋ ءۇشىن دەلدالدارعا كوپ اقشا بەردى. سوندىقتان نەمىس بيلىگى ولاردى قابىلداۋعا قارسى بولعان جاعدايدا، ولار باسقا ەلدەن پانا ىزدەيدى» دەدى كاتارينا ەندەرس.

ساراپشىنىڭ ايتۋىنشا گەرمانيا كانسلەرى انگەلا مەركەل سايلاۋشىلاردىڭ قولداۋىنا يە بولا الماي وتىر. اتالمىش باعدارلامانى ەنگىزۋ ارقىلى كوشباسشى دەڭگەيىندە قالىپ قويۋدى كوزدەيدى.

«كوپتەگەن تۇرعىندار بوسقىنداردىڭ تولاسسىز كەلىپ جاتقانىنا الاڭداپ وتىر. بۇل جاعداي «وڭ پارتياسىنىڭ» اتاعىن اسقاقتاتتى. انگەلا مەركەلدىڭ باسشىلىعىنداعى باسقارۋشى پارتيا سايلاۋ الدىندا وزىنە ۇپاي جيناۋعا تالپىنىپ ءجۇر» دەپ اتاپ ءوتتى ەندەرس.

الايدا بۇل شارالار دا ماسەلەنى شەشە المايدى. گەرمانيا تۇرعىندارىنىڭ ويىنشا كانسلەر انگەلا مەركەل ەلدە ميگراسيالىق داعدارىس ورناعانىنا جاۋاپتى.

«باستاپقى كەزدە نەمىس بيلىگى بوسقىنداردى ءوز ەلىنە شاقىردى. ەندى قارجىلىق كومەك ارقىلى ولاردان قۇتىلۋدى ويلاپ وتىر. بوسقىندار كوبىنە سوعىس، تەرروريزم، اشتىق  ورناعان ەلدەردەن كەلگەنىن ەسكەرۋ كەرەك» دەپ ءوز ويىمەن ءبولىستى بەرلين تۇرعىنى اننا.