شىمكەنت قالاسىنىڭ اكىمى جالقاۋ جانە توپاس پوليسەيلەردى جۇمىستان شىعاراتىنىن ايتىپ، سىنادى، - دەپ حابارلايدى Tengrinews.kz

شىمكەنت قالاسىنىڭ ءتورت اۋدانىنىڭ جەرگىلىكتى پوليسيا قىزمەتىنىڭ باسشىلارى ءسوز ەستىدى. عابيدوللا ءابدىراحىموۆ پوليسيا باسشىلارىن ەسەپ بەرۋ ءۇشىن جانە كورسەتكىش ءۇشىن جۇمىس ىستەپ جۇرگەندەرىن ايتتى. 

"مەن كەيبىر جەرگىلىكتى پوليسيا قىزمەتىنىڭ باسشىلارى ورنىندا قالاتىنىنا سەنىمدى ەمەسپىن. مەن اۋداندىق جەرگىلىكتى پوليسيا بولىمشەلەرىنىڭ جۇمىسىنا قاناعاتتانبايمىن. ەسەپ بەرۋ ءۇشىن عانا جۇمىس ىستەپ جۇرسىزدەر. سىزدەر تۇرعىنداردان ەمەس، ىىم-نەن قورقاسىزدار. ال، پوليسيا تۇرعىندار ءۇشىن جۇمىس ىستەۋى قاجەت! ەڭ باستى باعانى اكىم ەمەس، باسقا ءبىر باستىقتار ەمەس، تۇرعىندار بەرەدى. ەگەر قىزمەتكەرلەر جۇمىسىن دۇرىس ىستەي الماسا، جۇمىستان بوساتۋ قاجەت. جالقاۋ جانە قولىنان ءىس كەلمەيتىندەرگە پوليسيادا ورىن جوق. بۇل دەگەنىمىز ۇلكەن مىندەت، پوليسياعا ادامدار ءوزىنىڭ الەۋمەتتىك ستاتۋسىن جوعارىلاتۋ ءۇشىن ەمەس، ءتارتىپ ورناتۋ ءۇشىن كەلۋى ءتيىس"، - دەپ شۇيلىكتى شىمكەنت اكىمى. 

عابيدوللا ءابدىراحىموۆتىڭ ويىنشا، قالا اۋداندارىندا جابايى ساۋدا، تاكسي جۇرگىزۋشىلەرى، تاۋلىككە جالعا بەرىلەتىن پاتەرلەر جانە بوس قالعان قۇرىلىس الاڭدارىمەن جۇمىس ءالسىز تۇردە جۇرگىزىلىپ كەلەدى. 

سونىمەن قاتار، قالا اكىمى، تەمەكى تۇقىلىن قايدا بولسا، سوندا تاستاپ جۇرە بەرەتىن ادامدارمەن كۇرەستى كۇشەيتۋ كەرەكتىگىن ايتتى. 

"كوپتەگەن قۇقىقبۇزۋشىلىق ءبىزدىڭ جۇمىستى تولىق اتقارماي جاتقانىمىزدان بولىپ جاتىر. نەگە تەمەكى تۇقىلىن تاستايسىڭ؟ سەبەبى قوقىس جاشىكتەرى جوق. جاعالاۋلاردا نەگە قوقىس كوپ؟ سەبەبى قوقىس كونتەينەرلەرى جوق، ال وزىمەن بىرگە قوقىستى قاپقا سالىپ الىپ كەتۋدى كوبىسى ويلانا بەرمەيدى"، - دەدى عابيدوللا ءابدىراحىموۆ. 

قالا اكىمى وسى ماسەلەلەردى شەشۋگە پوليسەيلەر مەن كوممۋنالدىق قىزمەت ماماندارىنا ءبىر اي ۋاقىت بەردى. وسىعان قاراماستان، اكىم قالاداعى جەرگىلىكتى پوليسيا قىزمەتىنىڭ جۇمىسىنا جاقسى باعا بەردى. قالا بويىنشا قىلمىستىق قۇقىقبۇزۋشىلىق (اسا اۋىر قىلمىس پەن اۋىر قىلمىستار) ازايدى. ادام ولىمىنە الىپ كەلەتىن جول-كولىك وقيعالارى ازايدى. ءبىر جىلدا 93 ميلليون 357 مىڭ تەڭگەگە اكىمشىلىك ايىپپۇل تولتىرىلىپتى.