سوڭعى كۇندەرى قىزۋ تالقىعا تۇسكەن ديماش قۇدايبەرگەنوۆ پەن رەسەيلىك ءانشى ۆيتاستىڭ اراسىنداعى داۋ-دامايعا قاتىستى ۆيتاس مالىمدەمە جاسادى. Facebook الەۋمەتتىك جەلىسىندەگى جەكە پاراقشاسىندا رەسەيلىك ءانشى حالىقتى سابىرعا شاقىرىپ، وزىنە باعىتتالعان تۇرپايى دا سىني سوزدەرىن دوعارۋىن وتىنگەن.

«قۇرمەتتى دوستار!

رەسمي مالىمدەمە جاساعىم كەلەدى: سوڭعى ءتورت كۇننىڭ ىشىندە مەنىڭ جەكە باسىما باعىتتالعان جاعىمسىز پىكىرلەر الەۋمەتتىك جەلىلەردە قاپتاپ كەتتى. سىزدەرگە ايتايىن دەگەنىم – مەن كەز كەلگەن شىعارماشىلىقپەن اينالىساتىن ادامنىڭ ەڭبەگىن باعالاپ، ونداي جاندارعا سىيلاستىقپەن قارايمىن. ءوزىمدى ءبىر كۇندەرى وزگە ادامنىڭ شىعارماشىلىق ومىرىنە ارالاسىپ، سوتقا جۇگىنەمىن دەپ ويلاعان ەمەسپىن. ەشقاشان دا بۇلاي ىستەمەيمىن.

سوڭعى كەزدەرى ءاربىر ءارتىستىڭ اينالاسىندا بولىپ جاتقان سوت پروسەستەرى – ءوز ەلىن تانىتۋشى پروديۋسەرلەر مەن كومپانيالاردىڭ اراسىنداعى كەلەڭسىزدىكتەر. تانىمال انشىلەردىڭ اراسىندا ءتۇرلى داۋ-دامايلار مەن سوت پروسەستەرى ۇنەمى بولىپ وتىرادى.، الايدا مۇنداي جاعدايدا كەز كەلگەن ادامنىڭ جەكە باسىن قورلايتىن جاعىمسىز پىكىرلەر مەن ءوزارا كەلەڭسىزدىكتەر تۋعىزۋعا بولمايدى. ودان دا بارلىقتارىڭىز سابىر ساقتاپ، ماعان «لايك» باسىڭىزدار.

قۇرمەتپەن، ۆيتاس!»، - دەيدى ءانشى.

ەستەرىڭىزگە سالا كەتسەك، وتاندىق ءانشى ديماش قۇدايبەرگەنوۆ قىتايدا ءوتىپ جاتقان «مەن ءانشىمىن» بايقاۋىنا قاتىسىپ، ەكى كەزەڭدە دە قارسىلاستارىنىڭ اراسىنان وزا شاۋىپ، ءبىرىنشى ورىنعا تابان تىرەگەن بولاتىن. بايقاۋدىڭ ەكىنشى كەزەڭىندە ءانشى ۆيتاستىڭ «وپەرا-2» ءانىن 4 وكتاۆا 2 تونعا جوعارى ورىنداپ، حالىقتى تاڭداي قاقتىرعان. جۇڭگو ەلىنىڭ ميللياردتاعان حالقى جاس ءانشى ديماشتىڭ تابىنۋشىلارىنا اينالىپ، قازاقستاندىق ءانشى ءبىراز تانىمالدىلىققا يە بولعان. وسى ورايدا رەسەيلىك ءانشى ۆيتاستىڭ پروديۋسەرى ديماش قۇدايبەرگەنوۆتىڭ «وپەرا-2» ءانىن رۇقساتسىز ورىندادى دەگەن ايىپپەن سوتقا ارىز-شاعىم تۇسىرگەن بولاتىن. سونىمەن قاتار قازاقستاندىق قولداۋشىلارى ديماشتى «قازاقتىڭ ۆيتاسى» دەگەن اتپەن دە اتاپ كەتكەن. الايدا، بۇل ءىس باستالعالى بەرى، ءانشى ۆيتاسقا باعىتتالعان ءتۇرلى جاعىمسىز پىكىرلەر كوبەيىپ، الەۋمەتتىك جەلىلەردە «ۆيتاستىڭ شىنايى داۋىسى وسىنداي» دەگەن ۆيدەولار قايتادان نازارعا ىلىگە باستادى.

قامشىگەر: نازەركە لابيحان