بەلگىلى ساياساتتانۋشى دوسىم ساتبايەۆ يمانعالي تاسماعامبەتوۆتىڭ ۆيسە-پرەمەرلىك قىزمەتىنەن الىنىپ، رەسەيگە ەلشى بوپ كەتۋىن وسىلاي باعالاپ وتىر، - دەپ حابارلايدى Qamshy.kz.

دوسىم ساتبايەۆ بۇل رەتتە ي. تاسماعامبەتوۆتىڭ وسىعان دەيىن ەلشىلىك قىزمەتتەن وتپەگەنىن العا تارتادى. ساياساتتانۋشىنىڭ ايتۋىنشا، ەلشىلىك قىزمەت يمەكەڭنىڭ ساياساتكەر رەتىندە تولىسا ءتۇسۋى ءۇشىن ۇتىمدى باسپالداق بولماق.

«بىلايشا ايتقاندا، ول (ي. تاسماعامبەتوۆ – رەد.بارلىعىنان ءوتتى. ەندى مىنا سوڭعى، ۆيسە-پرەمەرلىكتەن (ءتىپتى، ءبىرىنشى ۆيسە-پرەمەرلىك تە ەمەس) كەتۋى وعان پايدالى بولۋى ا مۇمكىن. بيۋروكراتيالىق يەرارحيا تۇرعىسىنان الساق، بۇل – قىزمەتىنىڭ تومەندەۋى. ءبىراق، بارلىق سوققىنى قابىلدايتىن ۆيسە-پرەمەرلىكتەن گورى (ونىڭ ۇستىنە كەشەگى كەڭەيتىلگەن جيىندا ەلباسى بارلىق جاۋاپكەرشىلىكتى ۇكىمەتتىڭ موينىنا ءىلىپ قويدى) مەملەكەتتەگى ءبىرىنشى ادامنىڭ سولتۇستىك كورشىدەگى «كوزى» بولعان الدەقايدا جاقسى. ) بۇدان بولەك، ەلشىلىك قىزمەت ەلدەگى ەليتا ارالىق شايقاستىڭ اياقتالۋىن سىرتتا كۇتۋدىڭ كەرەمەت مۇمكىندىگى. سوڭعى تۇتقىنداۋلار ول شايقاستىڭ ءالى دە جالعاساتىنىن كورسەتىپ وتىر. پرەزيدەنتتىڭ ۇكىمەت قۇرامىنان «بەسىنشى كولوننا» ىزدەۋى، مەملەكەتتىك قارجىعا قاتىستى سالعىرتتىق پەن قىلمىستىق ارەكەتتەردى انىقتاۋ جونىندەگى ارنايى كوميسسيا قۇرۋ تۋرالى شەشىم دە كوپتەگەن شەنەۋنىكتەردى ويلاندىرىپ تاستاسا كەرەك»، - دەيدى د. ساتبايەۆ.

وسىلايشا تاسماعامبەتوۆتىڭ سوڭعى تاعايىندالۋىنان وڭ ناتيجەلەر كۇتەتىن ساياساتتانۋشى نەگىزگى ماسەلە يمەكەڭنىڭ ەلشىلىكتەن كەيىنگى قىزمەتتىك كارەراسىندا ەكەنىن جانە ەلشىلىك قىزمەتتە ءجۇرىپ ەل ىشىندەگى ساياسي ماسەلەلەردى شەشۋگە ارالاسۋ مۇمكىندىگىنىڭ شەكتەۋلى بولاتىنىن ەسكەرتەدى.

وسى رەتتە د. ساتبايەۆتىڭ بىلتىر قىركۇيەك ايىندا تاسماعامبەتوۆتىڭ ۆيسە-پرەمەرلىك كرەسلوعا وتىرۋىن دا ۋاقىتشا تاعايىنداۋ دەپ باعالاعانىن ايتا كەتكەن ءجون.

جومارت ابدوللا ۇلى