استانادا 2017 جىلعى 3 اقپانداعى ق ر ۇكىمەتىنىڭ كەڭەيتىلگەن وتىرىسىندا بەرىلگەن مەملەكەت باسشىسىنىڭ تاپسىرمالارىن ورىنداۋ ماسەلەلەرى بويىنشا ق ر ۇكىمەتىنىڭ وتىرىسى ءوتىپ جاتىر.

ەسكە سالساق، الدىندا ق ر پرەزيدەنتى نۇرسۇلتان نازاربايەۆتىڭ قاتىسۋىمەن قازاقستان ۇكىمەتىنىڭ كەڭەيتىلگەن وتىرىسى ءوتتى، ونىڭ بارىسىندا ق ر پرەزيدەنتىنىڭ جولداۋىن ورىنداۋ بويىنشا مينيسترلەر كابينەتىنىڭ الدىنا ءبىرقاتار ناقتى مىندەتتەر قويىلعان بولاتىن.

پرەمەر-مينيستر باقىتجان ساعىنتايەۆ قر-داعى بيزنەس احۋالدى جاقسارتۋ بويىنشا ءبىراز جۇمىس جاسالعانىن، الايدا بيزنەسكە رەتتەۋ جۇكتەمەسى ارتۋىن جالعاستىرعانىن اتاپ ءوتتى.

«ءبىر جاعىنان ءبىز بيزنەس جۇرگىزۋدى جاقسارتۋ ءۇشىن زاڭدارعا وزگەرىستەر ەنگىزەمىز، پروسەدۋرالاردى جەڭىلدەتەمىز. سوڭعى بەس جىلدا رۇقسات قۇجاتتارىنىڭ سانىن 3،2 ەسەگە قىسقارتتىق. ال، ەكىنشى جاعىنان وسى كەزەڭدە بيزنەستىڭ مۇددەسىنە قاتىستى قابىلدانعان نورماتيۆتىك-قۇقىقتىق اكتىلەر سانى كەرىسىنشە 1،7 ەسەگە ارتتى. ولاردىڭ 85% - اكىمدىكتەر مەن ءماسليحاتتار اكتىلەرى»، - دەپ اتاپ ءوتتى ب. ساعىنتايەۆ.

وسىعان بايلانىستى پرەمەر-مينيستر ب. ساعىنتايەۆ ۇلتتىق ەكونوميكا جانە ادىلەت مينيسترلىكتەرىنە وسى ماسەلەنى شەشۋدى تاپسىردى. بۇدان وزگە، ۇلتتىق ەكونوميكا مينيسترلىگىنە مۇددەلى ورگاندارمەن جانە «اتامەكەن» ۇكپ-مەن بىرگە ءبىر ايدا بارلىق باقىلاۋ-قاداعالاۋ فۋنكسيالارىن اۋقىمدى تەكسەرۋدى اياقتاۋ تاپسىرىلدى.  

«ءبىرىنشى كەزەكتە بيزنەسكە كوتەرىڭكى تالاپتار مەن اكىمشىلىك كەدەرگىلەردى قىسقارتۋ قاجەت. زاڭنامالىق اكتىلەرگە بارلىق قاجەتتى وزگەرىستەردى اعىمداعى جىلى قابىلداۋ كەرەك»، - دەپ باسا ايتتى ب. ساعىنتايەۆ.

پرەمەر-مينيستر ب. ساعىنتايەۆ مەملەكەت باسشىسى تاراپىنان سالىق ورگاندارىنا كوپ سوگىس ايتىلعانىن اتاپ ءوتتى. اسىرەسە، نەگىزسىز تەكسەرىستەر مەن سالىق زاڭناماسىن ىس-تاجىريبەدە قولدانۋ قيىندىقتارىنا قاتىستى.

وسىعان بايلانىستى ب. ساعىنتايەۆ ق ر قارجى مينيسترلىگى مەملەكەتتىك كىرىستەر كوميتەتىنىڭ بيزنەستى تەكسەرۋدى وڭتايلاندىرۋ تۇرعىسىنداعى جۇمىسىن قايتا قۇرۋدى تاپسىردى. بۇدان بولەك، پرەمەر-مينيستر ءبىر ايدا باس پروكۋراتۋرامەن بىرگە نەگىزسىز جۇرگىزىلگەن ىستەردى رەتتەۋدى تاپسىردى.

«وسىنداي ىستەردى جۇرگىزگەندەر جازاسىن الۋى ءتيىس»، - دەپ اتاپ ءوتتى ب. ساعىنتايەۆ.

سونداي-اق، پرەمەر-مينيستر ب. ساعىنتايەۆ ۇلتتىق ەكونوميكا مينيسترلىگىنە مۇددەلى ورگاندارمەن بىرگە جاڭا سالىق كودەكسىن ازىرلەۋ كەزىندە اكىمشىلەندىرۋدى تۇبەگەيلى جەڭىلدەتۋدى جانە ونى بارىنشا قاراپايىم قىلۋدى تاپسىردى.

«ونىڭ الدىندا بىرىكتىرىلگەن سالىق جانە كەدەندىك كودەكس ازىرلەۋ جوسپارلانعان بولاتىن. الايدا، پرەزيدەنتتىڭ تاپسىرماسىنا سايكەس ۇلتتىق ەكونوميكا جانە قارجى مينيسترلىكتەرىنە جەكە سالىق جانە كەدەندىك كودەكستەردى ازىرلەۋ قاجەت»، - دەپ قورىتىندىلادى ب. ساعىنتايەۆ.