اقش پرەزيدەنتى دونالد ترامپقا قاتىستى ءتۇرلى شىمشىما سوزدەر، اۋىر سىندار ازايار ەمەس. كاليفورنيا شتاتىنىڭ بۇرىنعى گۋبەرناتورى ارنولد شۆارسەنەگگەر دونالد ترامپتى سوزبەن تۇيرەپ ءوتتى.

«دونالد، مەندە كەرەمەت يدەيا بار. قىزمەت ورنىمىزدى اۋىستىرساق قالاي قارايسىڭ؟ سەن قايتادان تەلەارنادا قىزمەت جاسايسىڭ. سەبەبى، سەن رەيتينگتى كوپ جينايتىن ساراپشىسىڭ عوي. ال، مەن سەنىڭ جۇمىسىڭمەن اينالىسامىن جانە جۇرت قايتادان ۋايىمسىز ۇيىقتايتىن بولادى»، – دەدى ارنولد.

ترامپ «داڭقتىلىق شاكىرتى» رەاليتي-شوۋدىڭ جۇرگىزۋشىسى جانە اتاقتى امەريكالىق اكتەردىڭ ۇسىنىسىنا بىردەن جاۋاپ بەردى. ترامپ جاۋابىن تۆيتتەر پاراقشاسىندا جاريالادى.

«ارنولد شۆارسەنەگگەر كاليفورنياداعى گۋبەرناتورلىق قىزمەتىن ناشار اتقارعان ەدى، ءبىراق ول «داڭقتىلىق شاكىرتى» شوۋىندا ءوزىن، ءتىپتى، ناشار كورسەتتى. الايدا ول تىرىستى، قولىنان كەلگەنىن ىستەدى عوي»، – دەپ مىسقىلداي جاۋاپ بەردى ترامپ.

ارنولد شۆارسەنەگگەر 2003 جىلى كاليفورنيانىڭ 38ء-شى گۋبەرناتورى بولىپ سايلانعان. قوعامدىق پىكىردىڭ ساۋالناماسى بويىنشا، شتاتتىڭ 71%-ى ونى ءوز مىندەتىن دۇرىس اتقارا المايدى دەپ كورسەتكەن. 2011 جىلى بۇرىنعى گۋبەرناتور قىزمەتىنەن كەتتى.

اقش-تىڭ زاڭناماسى بويىنشا، اكتەر ەلدىڭ پرەزيدەنتتىگىنە سايلانا المايدى. ويتكەنى ول شتاتتىڭ اۋماعىندا ەمەس، اۆستريادا دۇنيەگە كەلگەن. 

The National Prayer Breakfast؟ pic.twitter.com/KYUqEZbJIE

— Arnold (@Schwarzenegger) 2 فيەۆراليا 2017 گ.