ۇزىناعاشتا قاستاندىقپەن ولتىرىلگەن ءۇش ازاماتتىڭ (جارقىنبەك دولدان ۇلى، مۇحيات زارلىحان ۇلى، قادىلبەك الەمقان ۇلى) ءبىرى قادىلبەكتىڭ قىزى پەريزاتتىڭ مەزگىلسىز ومىردەن وزعان اكەسىنە ارناعان ساعىنىش ولەڭىن جاريالاۋدى ءجون كوردىك.
جىپ جىلى ءجۇزىڭ جادىمدا مەنىڭ،
جۇلدىزداي ءسوندىڭ جالىنداپ ەدىڭ.
اكەشىم ساعان ءان جازدىم بۇگىن
سەبەبى قاتتى ساعىنعان ەدىم...
ساعىنىپ قالدىم وكتەم ءۇنىڭدى،
ساعىنىش مونشاق وكپەمە ءىلىندى.
قول بۇلعاپ ماعان قوشتاسىپ كەتتىڭ،
قالاعان ەدىم كەتپەگەنىڭدى.
ءوزىڭ كيگىزىپ ەدىڭ تار شۇلىعىمدى،
قاراعانىڭدا بار سىر ۇعىلدى.
ءوزىڭ وسىرگەن كىمگە قالدىردىڭ،
بۇرشىگىن اتقان تال شىبىعىڭدى.
الىستا بولسام اسىعاتىنمىن،
ەركەلەپ كەلىپ اسىلاتىنمىن.
جامان ءتۇس كورىپ جاعدايىم قاشسا،
سەنى قۇشاقتاپ باسىلاتىنمىن.
جالعىز قالدىرىپ گۇلدەي وركەندى،
مۇڭ بەردىڭ ماعان بىلمەي كولەمدى.
قوشتاسىپ تۇرىپ كەلمەسكە كەتتىڭ،
قالاي كونەمىن بىلمەيمىن ەندى.
ساعىندىم اكە بەينەڭدى سەنىڭ،
جوعالاد مەنەن كەيدە ەندى سەنىم.
تىلسىم تۇستەرگە قورعان بولاتىن،
قۇشاقتاپ جاتام جەيدەڭدى سەنىڭ.
قايعى-مۇڭ مەنى جانشىلاپ جاتىر،
وكپەلى كەۋدەم ءان سۇراپ جاتىر.
قاراشى مىنە كوگەرشىنىڭنىڭ،
قاناتى سىنىپ قانسىراپ جاتىر.
دەپ جۇرگەن ەدىم باقىت تابامىن،
تاعدىر ۇقتىردى ۋاقىت تالابىن.
قوس قاناتىمنىڭ ءبىرى قيىلىپ،
تەڭىزگە قۇلاپ باتىپ بارامىن.
جالىنى ءسوندى جانىمنىڭ،
اسقارى قۇلاپ باعىمنىڭ.
ەستيمىسىڭ سەن مەنى؟!
ساعىندىم اكە ساعىندىم!
قادىلبەك پەريزات
پىكىر قالدىرۋ