تاجىكستان ءبىلىم جانە عىلىم مينيسترلىگىنىڭ بۇيرىعىنا سايكەس، جوو مەن مەكتەپتەردىڭ ايەل وقىتۋشىلارى جانە وقۋشى قىزدارى ناۋرىز ايىنىڭ باسىنان اياعىنا دەيىن اتلاس پەن ادراس ماتالارىنان تىگىلگەن ۇلتتىق كيىم كيىپ ءجۇرۋى ءتيىس. بۇل تۋرالى ازاتتىق راديوسىنىڭ جەرگىلىكتى وكىلدىگى حابارلادى.

ءبىلىم مينيسترلىگىنىڭ باسپا ءسوز حاتشىسى ەحسوني حۋشۆاكت حابارلاعانداي، 1 ناۋرىزدان باستاپ تاجىك قىزدارى ناۋرىز مەرەكەسىنە بايلانىستى ۇلتتىق كيىمدەرىن تاستاماي كيىپ جۇرۋلەرىنە رۇقسات بەرىلدى. ياعني، بۇل ۋاقىتتا ولارعا مەكتەپ فورماسىن كيۋ مىندەتتەلمەيدى.

مينيسترلىكتىڭ رەسمي حاتىندا كورسەتىلگەندەي، مۇنداعى باستى ماقسات - ۇلتتىق سالت-داستۇرلەردى جاڭعىرتۋ جانە ءداستۇرلى ەمەس يسلام اعىمدارىنا قارسى كۇرەسۋ بولىپ تابىلادى.

ناۋرىز مەرەكەسى تاجىكستاندا 21-24 ناۋرىز كۇندەرى ارالىعىندا تويلاناتىنىن اتاپ ءوتۋ كەرەك. ول ەلدەگى ەڭ نەگىزگى مەرەكەلەردىڭ ءبىرى بولىپ ەسەپتەلەدى.

وسىدان ەكى جىل بۇرىن انالار كۇنى (8 ناۋرىز) مەرەكەسى قارساڭىندا ەل پرەزيدەنتى ەمومالي راحمون بەلسەندى ايەلدەرمەن كەزدەسىپ، ەلدە قارا جامىلعان قىز-كەلىنشەكتەردىڭ كوبەيە باستاعانىنا الاڭدايتىنىن ايتقان بولاتىن.

"ءبىزدىڭ ايەلدەر ەشقاشان قارا جامىلماعان. ءتىپتى، قازاعا كيەتىن ايەلدەردىڭ كيىمدەرى دە ءبىر ءتۇستى قارا ەمەس. الايدا، تاجىكتىڭ كەيبىر قىزدارى مەن ايەلدەرى قاپ-قارا كيىمگە ورانىپ ءجۇر. ولار بۇل كيىمدى نە ءۇشىن كيىپ جۇرگەنىن بىلمەيدى نەمەسە بىلگىسى كەلمەيدى"، - دەدى ەمومالي راحمون بەلسەندى ايەلدەرمەن بولعان كەزدەسۋدە.

ايتا كەتەيىك، تاجىكستاندا يسلامنىڭ سالافيزم باعىتىن ۇستانۋعا زاڭمەن تىيىم سالىنعان.