25 قاڭتاردا «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن بۇكىلحالىقتىق تالقىلاۋ تۋرالى پرەزيدەنت نۇرسۇلتان ءابىش ۇلىنىڭ جارلىعى شىقتى. العاشقى 10 كۇنى ءوتىپ كەتكەن بۇكىلحالىقتىق تالقىلاۋ 2017 جىلعى 26 اقپانعا دەيىن وتكىزىلەدى. بۇكىل حالىقتىق تالقىلاۋعا ۇسىنىلعان «ق ر كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا نەگىزىنەن بيلىك تارماقتارىن قايتا ءبولۋ ماسەلەلەرى قاراستىرىلعان.

الايدا، زاڭ جوباسىن ۇسىنۋشى ورگان حالىققا ءوزى پىكىرى مەن كەڭەسىن ايتۋعا، حالىق بولىپ تالقىلاۋعا مۇمكىندىك بەرىپ وتىر.

وسى ورايدا «قامشى» پورتالى بەرىلگەن مۇمكىندىكتى پايدالانا وتىرىپ، ءتيىستى ورىنعا مىناداي ۇسىنىسىن حات ارقىلى جولدايدى:

ەلباسىمىز 1992 جىلى ءبىرىنشى دۇنيەجۇزى قازاقتارىنىڭ قۇرىلتايىندا: «بۇل دۇنيەدە ءبىزدىڭ(دۇنيەجۇزى قازاقتارىنىڭ. –رەد) ءبىر عانا وتانىمىز بار، ول – تاۋەلسىز قازاقستان. ءبىز تۋعان مەملەكەتىمىزدىڭ تاۋەلسىزدىگىن باياندى ەتۋگە، قۋاتىن ارتتىرۋعا، ونىڭ يگىلىگىنە، حالىقارالىق قوعامداستىقتا ابىرويىنىڭ وسۋىنە ادال قىزمەت ەتۋگە پارىزدارمىز»، - دەپ «بار قازاق - ءبىر قازاق» دەگەن سارىنداعى جالىندى ءسوز سويلەگەن بولاتىن. پرەزيدەنت نازاربايەۆتىڭ وسىنداي كەڭپەيىلدى كورەگەندىگىنىڭ، ساليقالى ساياساتىنىڭ ارقاسىندا سوناۋ تاۋەلسىزدىك العان جىلداردان باستاپ بۇگىنگە دەيىن اتاجۇرتقا ميلليوننان استام قازاق ورالدى.

قولدانىستاعى اتازاڭ – «ءبىز، ورتاق تاريحي تاعدىر بىرىكتىرگەن قازاقستان حالقى، بايىرعى قازاق جەرىندە مەملەكەتتىلىك قۇرا وتىرىپ، ءوزىمىزدى ەركىندىك، تەڭدىك جانە تاتۋلىق مۇراتتارىنا بەرىلگەن بەيبىتشىل ازاماتتىق قوعام دەپ ۇعىنا وتىرىپ ... وسى كونستيتۋسيانى قابىلدايمىز»، دەپ باستالادى. ياعني، بۇل مەملەكەتتىڭ بايىرعى قازاق جەرى ەكەنىن، باعزىدان قازاق مەكەن ەتىپ كەلە جاتقانىن اتازاڭدا العاشقى جولعا ايشىقتاپ تۇرىپ جازعان.

سوندىقتان دا، بۇل توپىراق، الىپ تەرريتورياسى بار قازاقستان – قازاقتارعا كونستيتۋسيادا جازىلعانداي ەركىندىكتى سىيلاۋى ءتيىس.

اتازاڭنىڭ پرەزيدەنت تۋرالى تاراۋىنىڭ، 40 بابىنىڭ، ەكىنشى تارماقشاسىندا

«2. رەسپۋبليكانىڭ پرەزيدەنتى — حالىق پەن مەملەكەتتىك بيلىك بىرلىگىنىڭ، كونستيتۋسيانىڭ مىزعىماستىعىنىڭ، ادام جانە ازامات قۇقىقتارى مەن بوستاندىقتارىنىڭ نىشانى ءارى كەپىلى» دەپ جازىلعان.

ەلباسى نۇرسۇلتان نازاربايەۆ كونستيتۋسيانىڭ كەپىلى، ۇلت كوشباسشىسى رەتىندە شەتەلدەگى قازاقتاردىڭ ەلگە كەلۋىنە جاعداي جاساپ، ەلگە ميلليون قازاقتى قوستى. ەلباسىنىڭ وسى سارا جولى تاريحقا قالاي التىن ارىپپەن جازىلاتىن بولسا، الەمدەگى قازاقتى ءبىر قازاق قالعانعا دەيىن ەلگە ورالتاتىنداي باپ اتازاڭدا دا التىن ارىپپەن جازىلۋى كەرەك.

ەلباسى باستاپ كەتكەن ۇلى كوش كەلەسى پرەزيدەنتتەردىڭ تۇسىندا دا جالعاسىن تابۋى ءۇشىن مىزعىماس كونستيتۋسيانىڭ ەكىنشى بولىمىندەگى 10-ىنشى باپقا «رەسپۋبليكا شەگiنەن تىس جەرلەردە تۇراتىن ەتنيكالىق قازاقتار قازاقستان رەسپۋبليكاسىنا كەدەرگىزسىز ورالادى جانە تۇرۋ مەرزىمىنە قاراماستان، قازاقستان رەسپۋبليكاسىنىڭ ازاماتتىعىن جەڭىلدەتىلگەن تارتىپپەن (تىركەۋ تارتىبىمەن) الادى» دەگەن تارماق قوسۋدى سۇرايمىز.

الەمنىڭ 40-تان استام ەلىندە تارىداي شاشىپ جۇرگەن 5 ميلليون قازاقتىڭ ەلگە ورالۋى جانە ولاردىڭ ق ر ازاماتى اتانۋى سياقتى كۇردەلى پروسەس ەلباسى سالىپ بەرگەن جولمەن جالعاسىن تابۋى قاجەت. قولدانىستاعى كوشى-قون زاڭىنىڭ تۇراقسىزدىعى كەسىرىنەن سوڭعى 7 جىلدا كوشى-قون ايتارلىقتاي تۇرالادى. ورالمانداردىڭ ازاماتتىق الا الماۋى، ولارعا ازاماتتىق بەرۋ ءتارتىبىنىڭ ءجيى وزگەرۋى شەتتەن كەلگەن قانداستارىمىزدى قيناعانى جاسىرىن ەمەس. سوندىقتان دا اتازاڭعا وزگەرتۋلەر ىشىندە «شەتەلدەن ورالعان قازاقتارعا ازاماتتىق بەرۋ» تۋرالى ۇسىنىسىمىز ورىن الادى دەپ سەنەمىز!

ۇسىنىس رەسمي تۇردە 010000، استانا قالاسى ەسىل اۋدانى ۇكىمەت ءۇيى قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك قۇقىق ءبولىمى، ەلەكتروندىق پوشتا – ap2017@akorda.kz ادرەسىنە جولدانادى.

«قامشى» پورتالى رەداكسياسى