پرەزيدەنتتىڭ جارلىعىمەن كونستيتۋسياعا وزگەرىس ەنگىزۋ تۋرالى بۇكىلحالىقتىق تالقىلاۋ قىزۋ ءجۇرىپ جاتىر. جەر تۋرالى 26 باپتاعى وزگەرىسكە حالىقتىڭ قالاي قارسى بولىپ جاتقانىن ازاماتتاردىڭ ارىنىنان، الەۋمەتتىك جەلىدەگى پىكىر تالاستان، تاكسيستەردىڭ اڭگىمەسىنەن ءبىلىپ جاتىرمىز.
حالىق كونستيتۋسياداعى وزگەرىس تۋرالى زاڭ جوباسىنان تىس، ءوز ۇسىنىستارىن دا ايتا باستادى. سولاردىڭ قاتارىنداعى كەشە عانا سىزدەردىڭ «قامشى» سايتتارىڭىزدا جاريالانعان ەكى ۇسىنىستى مەن دە قولدايمىن. كونستيتۋسياداعى ءتىل تۋرالى باپتىڭ ەكىنشى تارماعىنا ەكى باستان قارسى ەدىم. ال، شەتتەن ورالعان قازاقتارعا ازاماتتىق بەرۋدى اتازاڭمەن بەكىتۋدى قوس قولداپ قۇپتايمىن!
«ەلباسى باستاپ كەتكەن ۇلى كوش كەلەسى پرەزيدەنتتەردىڭ تۇسىندا دا جالعاسىن تابۋى ءۇشىن مىزعىماس كونستيتۋسيانىڭ ەكىنشى بولىمىندەگى 10-ىنشى باپقا «مىزعىماس كونستيتۋسيانىڭ ەكىنشى بولىمىندەگى 10-ىنشى باپقا «رەسپۋبليكا شەگiنەن تىس جەرلەردە تۇراتىن ەتنيكالىق قازاقتار قازاقستان رەسپۋبليكاسىنا كەدەرگىزسىز ورالادى جانە تۇرۋ مەرزىمىنە قاراماستان، قازاقستان رەسپۋبليكاسىنىڭ ازاماتتىعىن جەڭىلدەتىلگەن تارتىپپەن (تىركەۋ تارتىبىمەن) الادى» دەگەن تارماق قوسۋدى سۇرايمىز.» دەگەن تارماقشا قوسۋدى سۇرايمىز»، - دەپ جازعان ەكەنسىزدەر. بۇل باستامانى قولداۋشىلاردىڭ سانى كوپتىگى بايقالدى. سىزدەردىڭ باستامالارىڭىزدان شابىت الىپ، الەۋمەتتىك جەلىدە اتى بار تۇلعالار، وقىلىمى كوپ سايتتار دا وسى ماسەلەنى قاۋزاپتى.
شىندىعىندا دا ورالمانداردى ەلگە شاقىرىپ، ولارعا اتاجۇرتتىڭ ءتورىن ۇسىنۋ پرەزيدەنتتىڭ التىن ارىپپەن جازىلاتىن ەڭبەگى. پرەزيدەنت نازاربايەۆ «شەت ەلدەردە جۇرگەن اعايىندى ەلگە ورالتىپ قۋانتۋ – تاريحي ادىلەتتىلىكتى قالپىنا كەلتىرۋ بولاتىن»، - دەگەن ەكەن.
قازاقتار الەمگە بايلىق قۋىپ، باقىت قۋىپ شاشىراعان جوق. باس ساۋعالاپ، رەسەي يمپەرياسى مەن رەسەي قۇرعان سوۆەت وداعىنىڭ سۋىق ساياساتىنىڭ قۇربانى بولىپ، باقىتسىزدىقتان شەتەل اسىپ كەتتى. تاريحتىڭ وسى ادىلەتسىزدىگىن قالپىنا كەلتىرۋ – راسىمەن دە ەلابسى نۇرسۇلتان ءابىش ۇلىنىڭ التىن ارىپپەن جازىلاتىن تاريحي ەڭبەگى.
ەرتەڭ ەلگە باسشى بولىپ كەلگەن كەلەسى پرەزيدەنت بۇل ساياساتتى قالاي جالعايدى، شەتەلدەگى قازاقتار ماسەلەسىنە تۇڭعىش پرەزيدەنت نۇرسۇلتان نازاربايەۆ سياقتى ءمان بەرىپ، ماڭىز بەرىپ قاراي ما؟ ول جاعى بەلگىسىز. ەڭ ماڭىزدىسى ءقازىر الەمدەگى 5 ميلليون قازاقتىڭ جاھاندانۋ پروسەسىنە جۇتىلىپ بارا جاتقانى. وتە-موتە جالعىز عانا قازاق مەكتەبى قوساعاشپەن رەسەيدەگى ميلليونعا جۋىق قانداسىمىزدىڭ تاعدىرى قالاي بولماق؟ ميللياردتار اراسىنداعى ميلليون جارىم قانداسىمىزدىڭ ەرتەڭى نە بولماق؟ قىتايدا قازاق مەكتەپتەرى تۇگەلگە جۋىق جابىلىپ ءبىتتى. قۇجاتتارىنا امالسىز وزبەك دەپ جازدىرىپ جۇرگەن وڭتۇستىك كورشىمىزدەگى قانداستارىمىز نەنىڭ كۇيىن كەشپەك؟ ازاماتتىق الۋ تۋرالى اتازاڭدا باپ جازىلسا، كوشى-قون زاڭى ءبىر سىلكىنىپ، كوش شەتەلدە ەشبىر قازاق قالماعانعا دەيىن جالعاسار ەدى دەپ ويلايمىن.
ءتىپتى، ماقالاعا جازىلعان پىكىرلەر اراسىندا «شەتەلدەن كەلگەن اعايىن شەكارادان اتتاسىمەن بىردەن ازاماتتىق بەرىلسىن» دەپ جازىلىپتى. بۇل، حالىقتىڭ دا شەتەلدەگى اعايىنعا، الىستاعى قانداستارعا ىقىلاسىنىڭ كەڭ، قۇشاعىنىڭ اشىق ەكەنىن كورسەتسە كەرەك. باستامالارىڭىزدى قولداي وتىرىپ، ءوزىم ولەڭىن ءسۇيىپ وقيتىن تالعات اقىن ەشەن ۇلىنىڭ مىناۋ ەكى شۋماق ولەڭىمەن حاتىمدى اياقتايمىن:
اۋەلدەن-اق تاعدىرىمىز الاعاي دا بۇلاعاي،
سەن ەشكىمگە قاراماي،
ەشتەڭەگە قاراماي،
كوشىڭ تۇزە!
بۇقاراڭدى باستا، كەل.
ازاپپەن كەل، توزاقپەن كەل،
قاش تا كەل،
ۇرىم-قىرىم اس تا كەل.
كوشىڭ تۇزە!
كۇتپەسە دە ۇلىعى،
كوزى ءتورت بوپ توسقان ەل.
كورسەك – بىرگە،
تۋعان ەلدىڭ تويىندا
بوستاندىقتىڭ ءشاربات ءدامىن تاتايىق.
ولسەك – بىرگە،
تۋعان جەردىڭ سايىندا
قۇشاعىمىز اجىراماي جاتايىق!
مۇقاعالي سارىبايەۆ،
وڭتۇستىك قازاقستان وبلىسى، قازىعۇرتتان.
پىكىر قالدىرۋ