وقو ءىىد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى بىلتىر الەۋمەتتىك جەلىلەر ارقىلى بوپسالاۋدىڭ 5 دەرەگىن انىقتاپ، قىلمىستىڭ بەتىن اشقان. بۇل تۋرالى دەپارتامەنتتىڭ باسپا ءسوز قىزمەتى حابارلاپ وتىر.

«وكىنىشكە وراي كوپتەگەن ادامدار كەزدەيسوق تانىستىق، ونىڭ ىشىندە الەۋمەتتىك جەلىلەر ارقىلى تانىسقاندا ءوزىنىڭ جەكە ءومىرىنىڭ قاۋىپسىزدىگى جايلى ويلامايدى. جەكە ومىرىنە قول سۇعۋشىلىقتىڭ قۇربانى بولۋى مۇمكىندىگى تۋرالى كۇدىكتەنبەيدى دە. ال، كەيبىر تەرىس پيعىلدى ادامدار، ءوزىنىڭ قۇربانىن الدىن الا كوزدەپ ونىڭ جەكە مالىمەتتەرى مەن اشكەرەلەيتىن فوتوسۋرەتتەرىن قولعا تۇسىرگەن سوڭ، قوماقتى قاراجات تالاپ ەتەدى»، - دەيدى پوليسەيلەر.

ماسەلەن، وتكەن جىلدىڭ سوڭىندا سارىاعاش اىىب-نە 26 جاستاعى بويجەتكەن حابارلاسىپ، تانىسى ءوزىن اشكەرەلەيتىن فوتوسۋرەتتەردى ينتەرنەت جەلىسىنە جۇكتەيمىن دەپ قوقىن-لوقى كورسەتىپ، 800 مىڭ تەڭگە تالاپ ەتكەنىن ءمالىم ەتكەن.

پوليسەيلەر جەدەل-ىزدەستىرۋ ءىس-شارالارى بارىسىندا 1983 جىلى تۋىلعان جەرگىلىكتى تۇرعىندى كۇدىكتى رەتىندە قۇرىقتادى. ءوز كىناسىن تولىق مويىنداعان كۇدىكتىنىڭ ايتۋىنشا، ول وسى ادىسپەن ماتەريالدىق جاعدايىن جاقسارتپاق بولىپتى. ايعاق زات رەتىندە اقشا، فوتو جانە ۆيدەوماتەريالدار تاركىلەندى. اتالعان جايت سارىاعاش ءاىىب-نىڭ سوتقا دەيىنگى ءبىرىڭعاي تەرگەپ-تەكسەرۋ تىزىلىمىنە تىركەلىپ، ق ر قك-نىڭ 194-بابىمەن «بوپسالاۋشىلىق» قىلمىستىق ءىس قوزعالدى. سوتقا دەيىنگى تەرگەۋ جۇمىستارى جۇرۋدە.

ينتەرنەت جەلىسىن پايدالانىپ بوپسالاۋشىلاردىڭ اراسىندا تەك ەر ادامدار عانا ەمەس، نازىك جاندىلار دا بۇل جولدى پايدالانۋدا. 2016 جىلدىڭ قازان ايىندا پوليسياعا شىمكەنت قالاسىنىڭ 57-جاستاعى تۇرعىنى كەلىپ، تانىسى ونى اشكەرەلەۋشى مالىمەتتەردى الەۋمەتتىك جەلىلەرگە جۇكتەيمىن دەپ قورقىتىپ، جابىرلەنۋشىدەن 100 مىڭ اقش دوللارىن تالاپ ەتكەنىن ايتقان.

اتالعان جايت سوتقا دەيىنگى ءبىرىڭعاي تەرگەپ-تەكسەرۋ تىزىلىمىنە تىكەلىپ، ق ر قك-نىڭ 194-بابىمەن «بوپسالاۋ» قىلمىستىق ءىس قوزعالدى. جۇرگىزىلگەن جەدەل-ىزدەستىرۋ ءىس-شارالارى بارىسىندا پوليسەيلەر اقشا الۋ كەزىندە شىمكەنت قالاسىنىڭ تۇرعىنى 1987 جىلعى ازاماتشانى قولعا ءتۇسىردى. سوتقا دەيىنگى تەرگەۋ امالدارى جۇرۋدە.