سوت قازاقستاندىق سەريالداردىڭ اكتەرى نۇرجان تويلىبايەۆتى ادام ءولتىرۋ ءىسى بويىنشا 11 جىلعا باس بوستاندىعىنان ايىردى، دەپ حابارلايدى Tengrinews.kz
38 جاستاعى ەر ادام بۇرىندارى زورلاۋ ءىسى بويىنشا جانە بۇزاقىلىق جاساعانى ءۇشىن سوتتالعان. نۇرجان تويلىبايەۆ "ماڭگى ەل"، "زاۋرە" جوبالارىنا قاتىسقان، سونىمەن قاتار "ايمان-شولپان" جانە "وگەي جۇرەك" سەريالدارىنا تۇسكەن. ءاردايىم بۇزاقىنى سومداعان، ونىڭ Instagram جەلىسىندەگى پاراقشاسىندا قازاقستاندىق شوۋ-بيزنەس جۇلدىزدارىمەن تۇسكەن جانە دە كينو تۇسىرىلىمدەرى بولىپ جاتقان سۋرەتتەرى جاريالانعان. سول جەردە وسى قايعىلى وقيعا بولعان. اكتەر سوت ۇكىمىمەن كەلىسپەيدى، اپەللياسيالىق شاعىم تۇسىرمەكشى. ەر ادام ونى ولتىرمەگەنىن، تەك ءوزىن قورعاعانىن ايتادى. اكتەردىڭ ايتۋىنشا، ونىڭ كۋاگەرلەرى جەتكىلىكتى.
بۇل وقيعا 2016 جىلى 10 قىركۇيەكتە فابريچنىي اۋىلىندا بولدى. مەن ءوز دوسىممەن ءبىر جوبانىڭ اياقتالۋىن جۋماقشى بولدىم. كاۋاپحاناعا كىردىك. كورشى ۇستەلدە ءبىر توپ ادام وتىردى، ولاردىڭ بىرەۋى ماعان قايتا-قايتا ءتيىسىپ، "جۇلدىز بولما دي كاپريو ەمەسسىڭ" دەدى. (...) ول (قايتىس بولعان مۇرات كارسلييەۆ) ءبىزدىڭ ورىنعا كەلىپ وتىردى. سول جەردە جانجالداسىپ كەتتىك. سىرتقا شىققانىمدا ول ءوزىنىڭ دوسىمەن شتوپر مەن پىشاق الىپ شابۋىل جاسادى. مەن ءوزىمدى قورعاۋ ءۇشىن، كاۋاپحانانىڭ كوسەۋىن الىپ، مۇراتتى ۇردىم، باسىنا ءتيدى. ونى جەدەل جاردەم الىپ كەتتى، 20 مينۋتتان سوڭ ول قايتىس بولىپ كەتىپتى. مەن قاشىپ ءجۇردىم، ءتورت اي تىعىلدىم"، - دەيدى نۇرجان تويلىبايەۆ.
جەلتوقساندا پوليسيا قىزمەتكەرلەرى ونى جالدامالى پاتەردەن ۇستاعان. باسىندا وعان "دەنساۋلىققا قاساقانا اۋىر زيان كەلتiرۋ" بابى بويىنشا ايىپ تاعىلعان، سودان كەيىن "ادام ءولتىرۋ" بابىنا اۋىستىرىلعان. تەرگەۋ ءجۇرىپ جاتقان ۋاقىتتا تويلىبايەۆتىڭ ايتۋىنشا، قايتىس بولعان مۇراتتىڭ ايەلى ماليكا كارسلييەۆاعا ءۇي مەن جەر تەلىمىن ۇسىنعان. ءبىراق ول بۇدان باس تارتىپ، ون ميلليون تەڭگە سۇراعان.
مۇرات كارسلييەۆ ينجەنەر-مونتاجداۋشى بولىپ ىستەگەن. ءوزىنىڭ ايەلى بالا-شاعاسىمەن فابريچنىي اۋىلىندا تۇرعان. ونىڭ ايەلى جانە ءتورت بالاسى ارتىندا قالدى. ماليكا كارسلييەۆا ءوز سۇحباتىندا سوت ونىڭ تالاپ ەتكەن سوماسىنىڭ ءبىر بولىگىن عانا قاناعاتتاندىرعانىن، ياعني ەكى ميلليون تەڭگە وتەپ بەرگەنىن ايتتى.
"مەن ءتورت بالامەن جالعىز قالدىم، جالعىز اسىراۋشىمىزدان ايىرىلدىق. مۇرات مونتاجداۋشى بولىپ قىزمەت ەتەتىن، ۇيالى بايلانىس ورناتاتىن. كۇزدە كافەگە بارعاننان كەيىن ول باقيلىق بولدى. ايىپتالۋشىنىڭ تۋىستارى قيراپ تۇرعان ءۇي ۇسىندى. ارينە، مەن بودان باس تارتتىم. مەن ولاردان "وزدەرىڭ وسىنداي ۇيدە تۇرار ما ەدىڭدەر" دەپ سۇرادىم. مەنىڭ كۇيەۋىم ەشقانداي دا شتوپر، پىشاق ۇستاماعان، نۇرجان ءوزى شابۋىل جاساعان. كۋاگەرلەر شاتاسىپ، بىرەسە ۇلكەن، بىرەسە كىشى پىشاق دەپ وتىر"، - دەيدى قايتىس بولعان ەر ادامنىڭ ايەلى.
"تويلىبايەۆ ق ر قىلمىستىق كودەكسىنىڭ 99-بابىنىڭ 1-بولىگى ("ادام ءولتىرۋ") بويىنشا 11 جىلعا باس بوستاندىعىنان ايىرىلدى. ول جازاسىن قاتاڭ رەجيمدەگى كولونيادا وتەيتىن بولادى. سوت ۇكىمى زاڭدى كۇشىنە ەنگەن جوق. تاراپتار 15 كۇن ىشىندە ءىستى قايتا قاراۋ ءۇشىن ارىز بەرە الادى"، - دەدى الماتى وبلىستىق سوتىنىڭ باسپا ءسوز قىزمەتىنىڭ ماماندارى.
سوتتالۋشىنىڭ ايەلى مەن ەكى بالاسى بار.
