حالىقارالىق قۇقىق قورعاۋ "حيۋمان رايتس ۋوچ" (HRW) ۇيىمى تۇركىمەنستاندا وتەتىن پرەزيدەنت سايلاۋى قارساڭىندا مالىمدەمە جاساپ، ەركىن جانە تازا سايلاۋ وتەتىنىنە كۇمان كەلتىرگەن. بۇل تۋرالى ورتالىق ازيا جاڭالىقتار قىزمەتى حابارلاپ وتىر.

ۇيىم تاراتقان مالىمدەمەدە ءسوز بوستاندىعى جانە اقپاراتقا قول جەتىمدىلىك جوق ەلدە، ازاماتتاردىڭ سايلاۋدا ەركىن تاڭداۋ جاساۋىنا مۇمكىندىك بەرىلمەيتىندىگى ايتىلعان.

"تۇركىمەنستاندا ەشقاشان تازا جانە ادىلەتتى سايلاۋ بولعان ەمەس. مۇنداي پىكىردى تۇركىمەنستانداعى ادام قۇقىقتارى جاعدايىن ۇزاق ۋاقىتتان بەرى باقىلاپ كەلە جاتقاندىقتان ايتىپ وتىرمىز. ادام قۇقىعى ورەسكەل بۇزىلعان ەلدە ءسوز بوستاندىعى، اشىق باسپا ءسوز، ەركىن جينالۋ دەگەن مۇلدەم بولمايدى"، - دەپ اتاپ وتەدى HRW ۇيىمىنىڭ ەۋروپا جانە ورتالىق ازيا جونىندەگى جەتەكشىسى حيۋ ۋيلليامسون.

ۋيلليامسون تۇركىمەنستان بيلىگى حالىقارالىق ۇكىمەتتىك ەمەس ۇيىمداردى، سولاردىڭ ىشىندە "حيۋمان رايتس ۋوچتى" ەلىنە جىبەرمەيتىنىن ايتادى.

"تۇركىمەنستاننىڭ حالىقارالىق ارىپتەستەرى ۇكىمەتكە ادام قۇقىقتارىنىڭ قورعالۋى ءۇشىن، رەفورما جاسالۋ ءۇشىن قىسىم جاساۋ كەرەك"، - دەپ اتاپ وتەدى حيۋ ۋيلليامسون.

تۇركىمەنستاننىڭ قازىرگى پرەزيدەنتى 59 جاستاعى گۋربانگۋلى بەردىمۋحامەدوۆ ەلىن 2007 جىلدان بەرى باسقارىپ كەلەدى. ول پرەزيدەنت سايلاۋىنا ءۇشىنشى جىل قاتارىنان ءتۇسىپ وتىر. 2016 جىلدىڭ قىركۇيەگىندە تۇركىمەنستان جاڭا كونستيتۋسيا قابىلدادى. وعان سايكەس، پرەزيدەنت جەتى جىلعا سايلانادى.