كەشە 12 اقپان كۇنى وڭتۇستىك استانامىزدىڭ تورىندە رەسپۋبليكا سارايىندا جىراۋ، مەملەكەتتىك سىيلىقتىڭ لاۋرەاتى، كومپوزيتور، ءانشى، ءماجىلىس دەپۋتاتى بەكبولات تىلەۋحاننىڭ تاۋەلسىزدىكتىڭ 25 جىلدىعىنا ارنالعان «ەلىم مەنىڭ» اتتى شىعارماشىلىق كەشى ءوتتى.

قاشاندا قالت ايتپايتىن قازاقتىڭ كورنەكتى اقىنى قادىر مىرزا ءالى بەكبولات ءىنىسى تۋرالى: "بەكبولاتتىڭ بارىنا تاۋبە دەيىك! ول بولماسا، قازاق مۋزىكاسى قۇرقۇلاقپەن اۋىرىپ، بۇكىل ءتىسى ساۋدىراپ ءتۇسىپ قالعانداي ەكەن..." دەپ باعا بەرگەن ونەر يەسىنىڭ كەشىنە حالىق نىق تولى جينالىپ، كونسەرتتىڭ باستالۋىن اسىعا كۇتتى. 

كەش قوناقتارى  قاتارىندا التىنبەك قورازبايەۆ، تۇڭعىشباي جامانقۇلوۆ، ارمان قىرىقباي، مۇحامەدجان تازابەك سىندى تانىمال تۇلعالار بولدى.

كونسەرتتە بەكبولات تىلەۋحاننىڭ ورىنداۋىندا جىراۋلاردىڭ جاۋھار جىرلارى ورىندالدى. ولاردىڭ ىشىندە شالكيىز، اقتامبەردى، دوسپامبەتتىڭ جىرىنا قانىق بولدى. سونداي-اق، اباي قۇنانباي ۇلى مەن دۋلات باباتاي ۇلىنىڭ ءماندى دە ماعىنالى جىرلارى ورىندالىپ، ءداستۇرلى انگە شولدەپ قالعان حالىق ريزا بولىپ قايتىستى.

سونداي-اق، كونسەرتتە باۋىرلاس نوعاي، قىرعىز ەلىنىڭ ونەرپازدارى دا توبە كورسەتتى. جۇڭگو ەلىنەن كەلگەن قانداسىمىز دا جىراقتاعى ءبىر جارىم ميلليون قازاق حالقىنىڭ اتىنان ىستىق سالەمىن جولداپ، حالىقتى انىمەن ءبىر سەرپىلتىپ تاستادى.

كەشتى ارنايى تاماشالاۋ ءۇشىن قىتايداعى قازاق بالۋاندارى دا كەلدى. ولار قىتايدا وتكەن جەكپە-جەك ءتۋرنيرىنىڭ فينالىندا بىر-بىرىمەن جۇدىرىقتاسا الماي، جارىستان شەتتەتىلگەن ەدى. بالۋانداردىڭ بۇل ارەكەتىن قازاق جانكۇيەرلەرى جوعارى باعالادى.

سونداي-اق، كەش قوناقتارى بولعان دوسىمجان تاڭاتاروۆ، قايرات نۇرتاس، ەرنار ايدار، يبراگيم ەسكەندىر، ايگەرىم قالاۋبايەۆا مەن "الاش ۇلى" توبى حالىققا ءان ارناپ، تىڭدارماندى ءان ءالديىنىڭ بەسىگىندە تەربەدى.

ەستەرىڭىزگە سالا كەتەيىك، 19 قاڭتار كۇنى استانادا بەكبولات تىلەۋحاننىڭ تاۋەلسىزدىكتىڭ 25 جىلدىعىنا وراي «ەلىم مەنىڭ» اتتى كونسەرتى وتكەن بولاتىن. 3500 ادامعا ارنالعان «قازاقستان» ورتالىق كونسەرت زالىندا ادام لىق تولى بولىپ، انشىلىگىن جوعارى باعالايتىن تىڭداۋشىلارى ءداستۇرلى ءان ونەرىنەن باستاپ، ەسترادالىق ءاننىڭ جاۋھارلارىمەن سۋسىندادى.

مارال شايحى