ءومىرزاق اقجىگىت ەسىمدى Facebook الەۋمەتتىك جەلىسىن پايدالانۋشى "قازاقستان" تەلەارناسىندا كورسەتىلەتىن "سالەم، قازاقستان" باعدارلاماسىندا ونەر كورسەتكەن "وردا" توبىنا قاتىستى ءوز پىكىرىن ءبىلدىردى. 

""سالەم، قازاقستاندا" نە بار دەسەم، "وردا" بار ەكەن. تورتەۋى 4 جاققا قاراپ تۇراتىن ەدى، ۇشەۋى قالىپتى. (بۇرىن 5 بولعان ەكەن). بار ءتوزىمىمدى بويىما جيىپ، كورىپ وتىردىم. "عاشىق بولساڭ" مەن "ولاي ەمەستەن" ەشقانداي ايىرماشالىق كورمەدىم. ويتكەنى، مۇندا نە جوق - ءبارى بار سەكىلدى. قىشقىرا ما-اۋ، قىڭسىلاي ما-اۋ، مياۋلاي ما-اۋ، شىڭعىرا ما-اۋ، شيقىلداۋ ما-اۋ، ءبىراق، ول جەردە ەشقانداي ءان جوق! "ءان بار!" دەيتىن ادامنىڭ پسيحيكاسى دۇرىستىعىنا كۇمانىم بار. سەكىرۋ، جۇلقىنۋ، بۇلقىنۋ، كورەرمەنگە ارتىن بەرىپ كيرەلەڭدەۋ، يرەلەڭدەۋ، تاعى دا "ءبارى" بار. ەڭ اقىرى سۋ قاراڭعى سوقىرلار كيەتىن قارا كوزىلدىرىك تە، "شوپجەلكە" پريچەسكا دا بار. تەك ونەر جوق!

ءبىر ۋاقىتتا اتىشۋلى "91" توبى شىقتى. وزبەكتەر "سامارقاندا ءبىر اپام بار، ول مەنەن دە سوراقى" دەپ بەكەر ايتپايدى ەكەن، "ورداما" جىلاپ كورىسكەندەي بولدىم. شىدامىمنىڭ شەگى ءبىر ساعاتقا جەتپەي ءۇزىلدى.

حاباردى جۇرگىزۋشى جىگىت  "15 جىل بويى "وردانىڭ" اندەرىمەن سۋسىنداپ كەلەمىن، جاساي بەر!" دەپ جاتىر. 15 جىل بويى كوكتەي قاۋلاپ كەتكەن "وردالار" سۋسىنداتىپ كەلە جاتقان ۇرپاقتى ويلادىم. كوڭىلىم قۇلازىدى. ءبىر تاۋلىك وزىمە ءوزىم كەلە الماي ءجۇردىم. تەك كەشە كەشتە ءشامشىنىڭ كينوسىن كورىپ، اندەرىن تىڭداپ، تازا اۋاعا شىققانداي، ۇستىمدەگى بىلعانعان كيىمنەن قۇتىلعانداي اسەردە بولدىم.

"كەڭەس وكىمەتى قۇلادى، ەندى وركەنيەتتىڭ بۇلاعىنا باس قويامىز دەپ ەدىك، سويتسەك، كاناليزاسياسىنا قوسىلىپ كەتىپپىز عوي" دەپ مۇحتار اعامىز ايتقانداي، ءشامشى، اسەت، نۇرعيسا، ت.ب. ساڭلاقتاردىڭ ساف اندەرىنەن سۋسىنداپ وسكەن ءبىز شىن باقىتتى ەكەنبىز عوي! وسىنى ويلاعاندا بارىپ، بىلتىر جەر كوميسسياسىنىڭ وتىرىستارىنا جاستاردى شاقىرىپ كەلتىرە المايتىنىمىزدىڭ، جالپى ولاردىڭ نەگە وسىنشا ساياسي بەيتاراپتىعىنىڭ سىرىن ۇققانداي بولدىم. اناۋ زالداعى جاستارعا ماعىنالى ولەڭ دە، اسەم ءان دە كەرەك ەمەس، ولارعا قولدارىن كوككە كوتەرىپ، ىرعاقپەن تەڭسەلىپ تۇرۋ عانا كەرەك. ولار ءبىزدىڭ ۇرپاق سەكىلدى ءوز قاتارى، ءوز زامانداستارىنىڭ ءبىر دە ءبىر ءانىن قوسىلىپ ايتا المايدى دا! جوق بولسا نەنى ايتسىن... "پوتەرياننوە پوكولەنيە" دەگەن وسى. ولار سەنىڭ جەرىڭدى ءقايتسىن، ۇلتىڭنىڭ توبەسىنە تونگەن قاۋىپ-قاتەردى، ەلىڭنىڭ بولاشاعىن ءقايتسىن...

ارينە، كوپكە توپىراق شاشۋدان اۋلاقپىن، تەك ءوز پىكىرىمدى، مازالاعان ويىمدى ايتتىم".