حالىقارالىق "جۋرناليستەردى قورعاۋ كوميتەتى" (Committee to Protect Journalists - CPJ) قازاقستان بيلىگىن "قارجى جىمقىرۋ" ءىسى بويىنشا قامالعان تاۋەلسىز، وپپوزيسيالىق جۋرناليست جانبولات مامايدى بوساتۋعا شاقىردى. بۇل تۋرالى ازاتتىق حابارلايدى.

"قازاقستان بيلىگى بۇقارالىق اقپارات قۇرالدارى الاڭىن وزگەشە ويلايتىنداردان تازالاۋدى جۇيەلى تۇردە جۇرگىزىپ كەلدى جانە جانبولات مامايدىڭ قامالۋى - وسى باعىتتاعى تاعى ءبىر قادام" دەپ مالىمدەدى CPJ-نىڭ ورتالىق ازيا بويىنشا ۇيلەستىرۋشىسى نينا وگنيانوۆا. ونىڭ سوزىنشە، استانا "تريبۋنا. ساياسي قالام" گازەتى باس رەداكتورىنىڭ مىندەتىن اتقارۋشى جانبولات مامايدى دەرەۋ بوساتىپ، ونى كاسىبي قىزمەتى ءۇشىن قۋدالاۋىن توقتاتۋى ءتيىس.

ۇكىمەتتەگى كوررۋپسيا جانە باسقا دا قوعامدىق وزەكتى ماسەلەلەر تۋرالى جازىپ جۇرگەن ماماي 11 اقپاندا تەرگەۋ اياسىندا ەكى ايعا قامالعان. مامايدى اقپاننىڭ 10-ى كۇنى سىبايلاس جەمقورلىققا قارسى ءىس-قيمىل ۇلتتىق بيۋروسى قىزمەتكەرلەرى ءقازىر شەتەلدە قۋعىندا جۇرگەن وپوزيسيالىق ساياساتكەر، "بتا بانك" ديرەكتورلار كەڭەسىنىڭ بۇرىنعى ءتوراعاسى مۇحتار ءابليازوۆتىڭ ىسىنە قاتىسى بار دەگەن كۇدىكپەن ۇستاعان. تەرگەۋ ورگانى 28 جاستاعى جانبولات مامايدى "بتا بانكتەن" ۇرلانعان اقشانىڭ ءبىر بولىگىنىڭ ءىزىن "ساياسي قالام. تريبۋنا" گازەتى ارقىلى قارجىلىق وپەراسيالار جاساپ جاسىرعان" دەگەن كۇدىكپەن تەرگەپ جاتىر.

ماماي ەگەر كۇدىكتى دەپ تانىلسا، جەتى جىلعا دەيىن سوتتالۋى مۇمكىن.

ءبىراق جانبولات ماماي وزىنە تاعىلعان ايىپتى جوققا شىعارىپ، بۇل ءىستى ءوزىنىڭ جۋرناليستىك قىزمەتى مەن "ساياسي قالام. تريبۋنا" گازەتىن جابۋعا باعىتتالعان ساياسي استارى بار ارەكەتى دەپ سانايتىنىن مالىمدەگەن. ءابليازوۆ تا مامايمەن ەشقاشان كەزدەسپەگەنىن ايتىپ، جاڭا ايىپتى "ابسۋرد" دەپ اتاعان.

ماماي قامالعانعا دەيىن ازاتتىققا ءوزىن الدەبىرەۋلەردىڭ اڭديتىنى تۋرالى ايتقان.