گازەتتەرگە ماجبۇرلەپ جازدىرۋدىڭ زاڭسىز ارەكەت ەكەنى دالەلدەنە باستادى. كۇزدە مەكتەپ مۇعالىمدەرىنىڭ ايتۋىمەن بۇل تاقىرىپتى بىرنەشە مارتە بۇقارالىق اقپارات قۇرالدارىندا كوتەرگەن ەدىك. 

قۇقىق قورعاۋ ورگاندارىنا دا حابار جەتكىزدىك. سولاردىڭ اراسىندا ءبىزدىڭ ۇسىنىسىمىزدى قولداعان – مەملەكەتتىك قىزمەت جانە سىبايلاستىق جەمقورلىققا قارسى كۇرەس جونىندەگى اگەنتتىك باسشىلارى. بۇگىنگى كەلگەن اقپارات بويىنشا ماسەلە قولعا الىنىپ، ايماقتاردا ارنايى شارالار وتكىزىلدى. 

مىسالى، تەمىرتاۋ قالاسىندا ءبىلىم ءبولىمىنىڭ باسشىلارىنا ۇستازداردان ماجبۇرلەۋ ارقىلى 600 مىڭ تەڭگە جيناعانى ءۇشىن قىلمىستىق ءىس قوزعالدى. تەرگەۋ ءجۇرىپ جاتىر. 

ارينە، بۇل ۇلكەن قىلمىس ەمەس، نەسىنە شۋلاتادى، بۇرىننان بەرى ۇيرەنشىكتى جاعداي عوي دەپ ايتاتىندار تابىلادى. ءبىراق ول – قاتە تۇسىنىك. ايلىعى ونسىز دا تومەن ۇستازدارعا 3 – 5 باسىلىمعا 10 مىڭ تەڭگەگە دەيىن تولەۋ از اقشا ەمەس.

ەكىنشى جاعى – قوعامداعى سىبايلاس جەمقورلىق وسىنداي «كىشكەنتاي» كولەمنەن باستالادى، ەت ۇيرەنەدى، جەڭىل قابىلدانادى. اينالىپ كەلىپ ۇلكەن قىلمىسقا اپارادى.  ال زاڭسىزدىقتىڭ زاردابىن ءوزى شەككەن مەكتەپ ۇستازى بالالارعا زاڭدى سىيلاۋ، قۇرمەتتەۋدى قالاي ۇيرەتەدى؟ 

سول سەبەپتەن سىبايلاس جەمقورلىقتى جويامىز دەسەك، وسىنداي كۇندەلىكتى كوزگە كورىنەتىن زاڭسىزدىقتى توقتاتۋ كەرەك. سوندا قوعامدا سەنىم پايدا بولادى. ال سەنىم بولعاسىن ودان دا باسقا قىلمىستارمەن بىرگە كۇرەسۋگە وڭايلاۋ بولماق.

سول سەبەپتەن بۇكىل ۇستازداردىڭ اتىنان مەملەكەتتىك قىزمەت جانە سىبايلاس جەمقورلىققا قارسى ءىس-قيمىل جونىندەگى اگەنتتىك باسشىلارىنا العىسىمدى ايتامىن!

مۇرات ابەنوۆ

دەرەككوز: zamana.kz