ءمۇعالىمنىڭ مۇڭ-زارىنا ءماجىلىس دەپۋتاتتارى دا نازار اۋداردى. ولار ۇستازداردى قاعازباستىلىقتان قۇتقارىپ، مەكتەپ قۇجاتتارىن حقكو جۇمىستارىمەن ينتەگراسيالاۋدى ۇسىندى، دەپ حابارلايدى Kazpravda.kz.
«قاعازعا كومىلىپ، بار ۋاقىتىن قۇجات تولتىرۋ مەن ەسەپ جازۋعا ارنايتىن ۇستازدان بالاعا جاۋاپكەرشىلىكپەن قاراۋدى، ساپالى ءبىلىم بەرۋدى تالاپ ەتە الامىز با؟ ءبىلىم جانە عىلىم مينيسترلىگى وسى جاعدايلارعا نازار اۋدارسا ەكەن. ماسەلەن «وقۋمەن جاپپاي قامتۋ» باعدارلاماسى ۇستازداردىڭ مويىنىنا ارتىلعان. ول 18 كەستەدەن تۇرادى، بۇعان بەكىتىلگەن ۋچاستكتى ارالاۋ، قوسىمشا قۇجاتتاردى تولتىرۋ جۇمىستارىن قوسىڭىز. مۇنى نەگە حقكو قىزمەتتەرىنىڭ قاتارىنا قوسپاسقا؟ مەكتەپ ءمۇعالىمى كۇنتىزبەلىك جوسپار، ۇزاقمەرزىمدىك جانە ورتا مەرزىمدى جوسپار، ساباق جوسپارى، وزىندىك دامۋ جوسپارى، مەكتەپ بولىمدەرىنىڭ جوسپارى ءتارىزدى قاعازدارعا كوپ ۋاقىتىن جۇمسايدى. ءارى بۇلاردىڭ بارلىعى فوتو ەسەپ تۇرىندە تاپسىرىلۋى كەرەك، ونىڭ ۇستىنە ەلەكتروندى جۋرنال مەن قاعاز جۋرنالدىڭ ماشاقاتى بار. بۇل ءمۇعالىمنىڭ دۇرىس جۇمىس ىستەۋىنە كەدەرگى كەلتىرىپ وتىر»، – دەپ حابارلايدى ءماجىلىس دەپۋتاتى گۇلنار بيجانوۆا.
سونداي-اق، ول مەكتەپ پەداگوگتارىنىڭ ءالى كۇنگە دەيىن جۇمىسقا قاجەتتى جابدىقتاردى ءوز ەسەبىنەن ساتىپ الاتىندىعىن دا اتاپ ءوتتى. وسىدان سوڭ ۇستازداردىڭ جۇمىسىنا سىن ايتۋعا بولا ما؟ قاعازباستىلىقتان قۇتىلماعان ۇستاز، قۇجات تولتىرۋمەن اۋرە بولىپ جۇرگەندە وقۋشىلار بىلگەنىن ىستەمەيدى مە؟
«بۇل ايتىلعان تالاپتاردى ورىنداۋ ءۇشىن كوپتەگەن ۇستازدار ءوزىنىڭ ونسىز دا ماردىمسىز ايلىعىنا قانشاما پاپكالار مەن قاعاز ساتىپ الۋعا ءماجبۇر. مەن ءتىپتى ەسەپ قاعازدارىن شىعارۋ ءۇشىن نەسيەگە ءتۇرلى-تۇستى قاعاز شىعاراتىن پرينتەر ساتىپ العانداردى دا بىلەمىن. ويتكەنى قاعاز شىعارۋ ولارعا قىمباتقا تۇسەدى»، – دەيدى گۇلنار بيجانوۆا.
وسىعان بايلانىستى دەپۋتات ءبىلىم جانە عىلىم مينيسترلىگىنەن مەكتەپ مۇعالىمدەرىن قاعازباستىلىقتان قۇتقارىپ، پەداگوگتارعا ءوزىنىڭ نەگىزگى جۇمىسى – بالا تاربيەسى جانە ءبىلىم بەرۋمەن اينالىسۋعا مۇمكىندىك بەرۋدى سۇرادى.
